ក្ដៅៗ! សំណង់សង្ស័យគ្មានច្បាប់បានកំពុងសម្រុកសាងសង់នៅស្រុកកៀនស្វាយ ខណៈអភិបាលស្រុកបញ្ជាក់នឹងឱ្យផ្អាកសាងសង់ និងស្នើសុំច្បាប់

(កណ្តាល)៖ ប្រជាពលរដ្ឋបានសម្តែងការព្រួយបារម្ភ ក្រោយសង្កេតឃើញសំណង់មួយកន្លែងស្ថិតនៅជាប់ផ្លូវបេតុង ក្នុងភូមិចិនកោះ ឃុំគគីរ ស្រុកកៀនស្វាយ ខេត្តកណ្តាល ដែលត្រូវបានអះអាងថា មិនទាន់មានលិខិតអនុញ្ញាតសាងសង់ ខណៈការសាងសង់នៅតែបន្តធ្វើឡើងយ៉ាងសកម្ម។

ជាក់ស្តែង នៅព្រឹកថ្ងៃទី១ ខែកក្កដា ឆ្នាំ២០២៦ កម្មករនៅតែបន្តដំណើរការសាងសង់ជាប្រក្រតី ដោយមិនទាន់ឃើញមានការចុះត្រួតពិនិត្យ ឬចាត់វិធានការពីអាជ្ញាធរជំនាញនៅទីតាំងនោះនៅឡើយ ដែលធ្វើឱ្យមហាជនចោទជាសំណួរថា តើសំណង់ខាងលើមានលិខិតអនុញ្ញាតត្រឹមត្រូវដែរឬទេ?

មជ្ឈដ្ឋានទូទៅយល់ថា ការអនុវត្តច្បាប់ស្តីពីសំណង់ គួរតែអនុវត្តដោយតម្លាភាព ស្មើភាព និងគ្មានការរើសអើងចំពោះគ្រប់ភាគី ដើម្បីជៀសវាងការរិះគន់ថា «សំណង់ហោះមុនច្បាប់» ឬការអនុវត្តច្បាប់មិនស្មើគ្នា ដែលអាចប៉ះពាល់ដល់ទំនុកចិត្តរបស់ប្រជាពលរដ្ឋលើការគ្រប់គ្រងរដ្ឋបាលមូលដ្ឋាន។

ពាក់ព័ន្ធនឹងករណីនេះ លោក ឡូវ សុខសាន អភិបាលស្រុកកៀនស្វាយ បានបញ្ជាក់ថា សំណង់ខាងលើមិនទាន់មានលិខិតអនុញ្ញាតសាងសង់នោះទេ។ លោកបានឱ្យដឹងថា រដ្ឋបាលស្រុកនឹងចេញសេចក្តីជូនដំណឹងឱ្យម្ចាស់សំណង់ផ្អាកការសាងសង់ជាបណ្តោះអាសន្ន និងតម្រូវឱ្យដាក់ពាក្យស្នើសុំលិខិតអនុញ្ញាតសាងសង់តាមនីតិវិធីច្បាប់។

ជាមួយគ្នានេះ ប្រជាពលរដ្ឋក៏បានអំពាវនាវដល់លោកមេឃុំគគីរ និងអាជ្ញាធរពាក់ព័ន្ធ មេត្តាចាត់កម្លាំងជំនាញចុះពិនិត្យទីតាំងជាក់ស្តែង ស្រាវជ្រាវឯកសារពាក់ព័ន្ធ និងអនុវត្តវិធានការតាមផ្លូវច្បាប់ ប្រសិនបើរកឃើញថាមានការសាងសង់មិនស្របតាមបទប្បញ្ញត្តិ ដើម្បីធានាថាការអនុវត្តច្បាប់មានប្រសិទ្ធភាព តម្លាភាព និងស្មើភាពចំពោះគ្រប់ភាគី៕