បង្ក្រាបរោងចក្រផលិតបារីអេឡិចត្រូនិចខុសច្បាប់២ទីតាំងនៅតាកែវ! អាជ្ញាធរកម្ពុជា-ចិនរួមដៃវាយបំបែក ខណៈហានិភ័យដល់យុវជនកំពុងគួរឲ្យព្រួយបារម្ភ

(តាកែវ)៖ រោងចក្រផលិតបារីអេឡិចត្រូនិចខុសច្បាប់ចំនួន២ទីតាំង ស្ថិតក្នុងក្រុងដូនកែវ ខេត្តតាកែវ ត្រូវបានកម្លាំងសមត្ថកិច្ចកម្ពុជា សហការជាមួយសមត្ថកិច្ចចិន ចុះបង្ក្រាប និងបិទដំណើរការជាបន្ទាន់ បន្ទាប់ពីការស្រាវជ្រាវយ៉ាងយកចិត្តទុកដាក់ រកឃើញថា ទីតាំងទាំងនោះបានលួចផលិតបារីអេឡិចត្រូនិច ដែលជាផលិតផលត្រូវបានច្បាប់កម្ពុជាហាមឃាត់។

ការបង្ហើបព័ត៌មាននេះ ត្រូវបានធ្វើឡើងដោយលោក វ៉ី សំណាង អភិបាលខេត្តតាកែវ ក្នុងឱកាសទទួលគណៈកម្មាធិការទី៣ នៃរដ្ឋសភា ដែលបានចុះសិក្សាស្វែងយល់អំពីវឌ្ឍនភាពការងារ និងបញ្ហាប្រឈមនានារបស់រដ្ឋបាលខេត្ត នៅព្រឹកថ្ងៃទី២៣ ខែមិថុនា ឆ្នាំ២០២៦។

យោងតាមការបញ្ជាក់របស់លោកអភិបាលខេត្ត ប្រតិបត្តិការបង្ក្រាបនេះបានធ្វើឡើងក្រោយការសហការស៊ើបអង្កេតរវាងសមត្ថកិច្ចនៃប្រទេសទាំងពីរ ដោយរកឃើញថា រោងចក្រទាំងនោះបានផលិតបារីអេឡិចត្រូនិចខុសច្បាប់ ក្នុងគោលបំណងចែកចាយលើទីផ្សារ ទោះបីជារដ្ឋាភិបាលកម្ពុជាបានដាក់ចេញវិធានការហាមឃាត់យ៉ាងតឹងរ៉ឹងក៏ដោយ។

មហាជនបានសម្តែងការគាំទ្រចំពោះចំណាត់ការដ៏ម៉ឺងម៉ាត់នេះ ដោយចាត់ទុកថា ជាសារព្រមានដ៏ខ្លាំងមួយចំពោះជនឆ្លៀតឱកាស ដែលនៅតែបន្តរកស៊ីលើផលិតផលបង្កគ្រោះថ្នាក់ដល់សុខភាពសាធារណៈ និងអនាគតយុវជន។

គួររំលឹកថា អាជ្ញាធរជាតិប្រយុទ្ធប្រឆាំងគ្រឿងញៀន និងក្រសួងសុខាភិបាល ធ្លាប់បានចេញសេចក្តីប្រកាសជាបន្តបន្ទាប់ អំពាវនាវឱ្យប្រជាពលរដ្ឋ ជាពិសេសយុវជន និងសិស្សានុសិស្ស បញ្ឈប់ការប្រើប្រាស់បារីអេឡិចត្រូនិច ដោយសារវាមានផលប៉ះពាល់ធ្ងន់ធ្ងរដល់សុខភាព រួមទាំងអាចបង្កជាជំងឺផ្លូវដង្ហើម ជំងឺបេះដូង ប៉ះពាល់ប្រព័ន្ធប្រសាទ និងអាចនាំឱ្យបាត់បង់ជីវិតក្នុងករណីធ្ងន់ធ្ងរ។

លើសពីនេះ បារីអេឡិចត្រូនិចត្រូវបានអ្នកជំនាញជាច្រើនចាត់ទុកថា ជាច្រកផ្លូវមួយនាំឱ្យយុវវ័យឈានទៅរកការប្រើប្រាស់សារធាតុញៀនផ្សេងៗ ខណៈការរីករាលដាលរបស់វាកំពុងក្លាយជាបញ្ហាសង្គមដែលទាមទារឱ្យមានការចូលរួមទប់ស្កាត់ពីគ្រប់ភាគី។

មហាជនក៏បានអំពាវនាវឱ្យអាជ្ញាធរពាក់ព័ន្ធបន្តស្រាវជ្រាវ និងចាត់វិធានការតឹងរ៉ឹងចំពោះទីតាំងផលិត ឬចែកចាយបារីអេឡិចត្រូនិចខុសច្បាប់នៅទូទាំងប្រទេស ដើម្បីការពារសុខុមាលភាពប្រជាពលរដ្ឋ និងរក្សាសុវត្ថិភាពសង្គមឱ្យកាន់តែមានប្រសិទ្ធភាព៕