បុគ្គលឈ្មោះ «ម៉េង» រងការរិះគន់ ជុំវិញការចាក់ដី និងសង់របងសង្ស័យគ្មានច្បាប់នៅក្រុងតាខ្មៅ ខណៈមហាជនទទូចឱ្យអាជ្ញាធរអនុវត្តច្បាប់ដោយស្មើភាព

(កណ្តាល)៖ បុគ្គលឈ្មោះ «ម៉េង» កំពុងរងការរិះគន់ និងចោទសួរពីសំណាក់ប្រជាពលរដ្ឋជាច្រើន ក្រោយមានព័ត៌មានថា បាននិងកំពុងធ្វើសកម្មភាពចាក់ដី និងសាងសង់របងយក្សមួយកន្លែងនៅតាមបណ្តោយផ្លូវចូលវត្តតាក្របៅ ស្ថិតក្នុងភូមិព្រែកសំរោង៣ សង្កាត់តាខ្មៅ ក្រុងតាខ្មៅ ខេត្តកណ្តាល ដោយមានការសង្ស័យថា មិនទាន់មានលិខិតអនុញ្ញាតស្របច្បាប់ពីស្ថាប័នជំនាញពាក់ព័ន្ធនៅឡើយ។

តាមការលើកឡើងរបស់ប្រជាពលរដ្ឋក្នុងមូលដ្ឋាន សកម្មភាពខាងលើបានធ្វើឱ្យមហាជនមានចម្ងល់យ៉ាងខ្លាំង ខណៈអាជ្ញាធរគ្រប់លំដាប់ថ្នាក់តែងតែអំពាវនាវឱ្យម្ចាស់សំណង់ និងអ្នកអភិវឌ្ឍន៍គម្រោងនានា គោរពតាមនីតិវិធីច្បាប់ និងទទួលបានការអនុញ្ញាតជាមុនសិន មុនចាប់ផ្តើមអនុវត្តសកម្មភាពសាងសង់ ឬអភិវឌ្ឍដីធ្លីណាមួយ។

ប្រជាពលរដ្ឋបានលើកឡើងថា ការអនុវត្តច្បាប់មិនគួរមានស្តង់ដារពីរ ឬការលើកលែងចំពោះបុគ្គលណាម្នាក់ឡើយ ពោលគឺអ្នកមានអំណាច អ្នកមានទ្រព្យធន ឬប្រជាពលរដ្ឋទូទៅ ត្រូវស្ថិតក្រោមច្បាប់ដូចគ្នា។ ប្រសិនបើមានការរំលោភបំពានច្បាប់សំណង់ ឬច្បាប់គ្រប់គ្រងដីធ្លីមែន អាជ្ញាធរត្រូវចាត់វិធានការដោយគ្មានការយោគយល់ និងគ្មានការរើសអើង។

ជាពិសេស កន្លងមកថ្នាក់ដឹកនាំខេត្តកណ្តាល តែងតែជំរុញឱ្យមន្ត្រីជំនាញ និងអាជ្ញាធរមូលដ្ឋានពង្រឹងការអនុវត្តនីតិរដ្ឋ ទប់ស្កាត់សំណង់ខុសច្បាប់ និងរាល់សកម្មភាពដែលផ្ទុយនឹងបទប្បញ្ញត្តិជាធរមាន។ ដូច្នេះ ករណីនេះកំពុងក្លាយជាប្រធានបទដែលសាធារណជនកំពុងរង់ចាំមើលថា តើអាជ្ញាធរនឹងចាត់វិធានការបែបណា ដើម្បីធានាឱ្យមានភាពត្រឹមត្រូវ និងតម្លាភាព។

ពាក់ព័ន្ធករណីខាងលើនេះ ប្រភពីមូលដ្ឋានសង្កាត់តាខ្មៅបានប្រាប់បណ្ដាញសារព័ត៌មាន The Mirror News ថា ទាំងការចាក់ដី និងធ្វើរបងព័ទ្ធជុំដីរបស់ឈ្មោះ ម៉េង ខាងលើគឺមិនមានច្បាប់ត្រឹមត្រូវនោះទេ។

អ្នកតាមដានសង្គមមួយចំនួនបានបញ្ជាក់ថា ប្រសិនបើសកម្មភាពចាក់ដី និងសាងសង់របងខាងលើ ពិតជាមិនមានការអនុញ្ញាតត្រឹមត្រូវមែន នោះគួរត្រូវបានផ្អាកជាបន្ទាន់ និងអនុវត្តវិធានការតាមផ្លូវច្បាប់ឱ្យបានម៉ឺងម៉ាត់ ដើម្បីរក្សាសណ្តាប់ធ្នាប់សាធារណៈ និងការគ្រប់គ្រងការអភិវឌ្ឍនៅក្នុងមូលដ្ឋានឱ្យមានប្រសិទ្ធភាព។

ប្រជាពលរដ្ឋបានអំពាវនាវដល់អាជ្ញាធរសង្កាត់តាខ្មៅ រដ្ឋបាលក្រុងតាខ្មៅ និងរដ្ឋបាលខេត្តកណ្តាល មេត្តាចុះពិនិត្យទីតាំងជាក់ស្តែង ស្រាវជ្រាវឯកសារពាក់ព័ន្ធ និងបង្ហាញលទ្ធផលជាសាធារណៈប្រកបដោយតម្លាភាព។ ក្នុងករណីរកឃើញថា មានការអនុវត្តសកម្មភាពខុសច្បាប់ពិតប្រាកដ អាជ្ញាធរគួរចាត់វិធានការតាមនីតិវិធី រួមទាំងការផ្អាកការដ្ឋាន ការរុះរើ ឬវាយកម្ទេចសំណង់ដែលមិនស្របច្បាប់ ដោយមិនត្រូវទុកឱ្យមានគំរូអវិជ្ជមាននៅក្នុងសង្គមឡើយ។

មហាជនជឿជាក់ថា ការអនុវត្តច្បាប់ដោយស្មើភាព តម្លាភាព និងយុត្តិធម៌ គឺជាមូលដ្ឋានសំខាន់បំផុតក្នុងការពង្រឹងជំនឿទុកចិត្តរបស់ប្រជាពលរដ្ឋលើអាជ្ញាធរ និងធានាឱ្យការអភិវឌ្ឍនៅក្នុងខេត្តកណ្តាលប្រព្រឹត្តទៅដោយរបៀបរៀបរយ ស្របតាមគោលការណ៍នីតិរដ្ឋ និងចីរភាព។

គួរបញ្ជាក់ថា ពាក់ព័ន្ធករណីខាងលើនេះ គិតត្រឹមម៉ោងចេញផ្សាយនេះ អង្គភាព The Mirror News ពុំអាចសុំការបំភ្លឺបន្ថែមពីលោក ឃឹម សំភារ អភិបាលក្រុងតាខ្មៅបាននោះទេ ដោយទូរស័ព្ទខលចូលតែគ្មានមនុស្សលើក៕