រោងសិប្បកម្មកែច្នៃប្លាស្ទិកអត់ច្បាប់នៅក្រុងតាខ្មៅ បង្កក្លិនរំខានពលរដ្ឋ! មន្ទីរបរិស្ថានចុះពិនិត្យភ្លាមៗ និងដាក់កំហិតឱ្យអនុវត្តតាមបច្ចេកទេសជាកំហិត

(កណ្ដាល)៖ បន្ទាប់ពីមានការត្អូញត្អែរពីប្រជាពលរដ្ឋអំពីក្លិនមិនល្អ និងក្តីបារម្ភពីផលប៉ះពាល់បរិស្ថាន សិប្បកម្មកែច្នៃប្លាស្ទិកមួយកន្លែង ស្ថិតនៅភូមិព្រែកសំរោង សង្កាត់រកាខ្ពស់ ក្រុងតាខ្មៅ ខេត្តកណ្ដាល ត្រូវបានក្រុមការងារមន្ទីរបរិស្ថានខេត្តកណ្ដាល ចុះពិនិត្យជាក់ស្តែង និងរកឃើញថា ទីតាំងនេះនៅមិនទាន់មានច្បាប់អនុញ្ញាតត្រឹមត្រូវ និងខ្វះស្តង់ដារបច្ចេកទេសបរិស្ថានជាច្រើនចំណុច។

ប្រតិបត្តិការចុះពិនិត្យនេះ ធ្វើឡើងកាលពីថ្ងៃទី២២ ខែមិថុនា ឆ្នាំ២០២៦ ដឹកនាំដោយលោក អាន តូរ៉ា ប្រធានការិយាល័យគាំពារបរិស្ថាន នៃមន្ទីរបរិស្ថានខេត្តកណ្ដាល ដោយមានការចូលរួមពីមន្ត្រីជំនាញរដ្ឋបាលក្រុងតាខ្មៅ និងអាជ្ញាធរសង្កាត់រកាខ្ពស់។

យោងតាមលទ្ធផលនៃការត្រួតពិនិត្យ ក្រុមការងារបានរកឃើញថា សិប្បកម្មកែច្នៃប្លាស្ទិកខាងលើ មិនទាន់មានឯកសារច្បាប់ពាក់ព័ន្ធវិស័យបរិស្ថាននៅឡើយទេ ព្រមទាំងមិនមានអាងប្រព្រឹត្តកម្មសម្អាតសំណល់រាវត្រឹមត្រូវ និងការគ្រប់គ្រងសំណល់រឹង សំណល់រាវ នៅមានភាពខ្វះខាត ដែលអាចបង្កផលប៉ះពាល់ដល់បរិស្ថាន និងសុខភាពប្រជាពលរដ្ឋជុំវិញ ប្រសិនបើមិនមានការកែលម្អឱ្យបានឆាប់រហ័ស។

ប្រភពដដែលបានបញ្ជាក់ថា សិប្បកម្មនេះបានចាប់ផ្តើមដំណើរការតាំងពីខែមករា ឆ្នាំ២០២៦ ដោយមានម្ចាស់អាជីវកម្មឈ្មោះ ឌួង ណារិន។

ជុំវិញព័ត៌មានដែលបានផ្សព្វផ្សាយថា មានទុយោបង្ហូរសំណល់រាវសារធាតុគីមីចូលទៅក្នុងព្រែកសំរោង ក្រុមការងារបានពិនិត្យផ្ទាល់ និងបញ្ជាក់ថា ទុយោនោះមិនមែនជាប្រព័ន្ធបង្ហូរទឹករបស់សិប្បកម្មឡើយ ប៉ុន្តែជាទុយោបង្ហូរទឹកចេញពីស្រះឈូករបស់ប្រជាពលរដ្ឋ ដែលមានប្រវែងប្រមាណត្រឹម ៤ម៉ែត្រប៉ុណ្ណោះ។

ទោះជាយ៉ាងណា ករណីនេះក៏បានបង្ហាញឱ្យឃើញថា ការបើកដំណើរការអាជីវកម្មឧស្សាហកម្ម ឬសិប្បកម្មណាមួយ ដោយមិនទាន់បំពេញលក្ខខណ្ឌច្បាប់ និងស្តង់ដារបច្ចេកទេសបរិស្ថាន គឺជាបញ្ហាដែលមិនគួរមើលរំលងនោះទេ ព្រោះអាចបង្កការព្រួយបារម្ភ និងប៉ះពាល់ដល់សហគមន៍ជុំវិញ។

ជាមួយគ្នានេះ មន្ទីរបរិស្ថានខេត្តកណ្ដាលបានដាក់កំហិតឱ្យម្ចាស់សិប្បកម្មអនុវត្តជាបន្ទាន់នូវវិធានការសំខាន់ៗ រួមមាន ការសម្អាត និងដឹកជញ្ជូនសំណល់ឱ្យបានត្រឹមត្រូវ ការសាងសង់អាងប្រព្រឹត្តកម្មសម្អាតសំណល់រាវតាមស្តង់ដារបច្ចេកទេស និងការរៀបចំឯកសារច្បាប់ពាក់ព័ន្ធវិស័យបរិស្ថានឱ្យបានគ្រប់គ្រាន់។

តំណាងម្ចាស់សិប្បកម្មបានទទួលយក និងឯកភាពអនុវត្តតាមការណែនាំរបស់អាជ្ញាធរ និងមន្ត្រីជំនាញ ខណៈប្រជាពលរដ្ឋសង្ឃឹមថា ការកែតម្រូវទាំងនេះនឹងត្រូវអនុវត្តជាក់ស្តែង ដើម្បីធានាបរិស្ថានស្អាត និងសុខុមាលភាពរស់នៅរបស់អ្នកភូមិនាពេលខាងមុខ។ គិតត្រឹមម៉ោងចេញផ្សាយនេះ អង្គភាព​ The Mirror News ពុំអាចសុំការបំភ្លឺបន្ថែមពីលោក ឃឹម សំភារ អភិបាលក្រុងតាខ្មៅបាននោះទេ ដោយទូរស័ព្ទខលចូលតែគ្មានមនុស្សលើក៕