អាជ្ញាធរក្រុងតាខ្មៅបន្តបើកយុទ្ធនាការចុះរដ្ឋបាលទប់ស្កាត់បទល្មើស Online Scams រក្សាសន្តិសុខ និងសុវត្ថិភាពជូនប្រជាពលរដ្ឋ

(កណ្ដាល)៖ អាជ្ញាធរក្រុងតាខ្មៅ បន្តពង្រឹងវិធានការទប់ស្កាត់ និងបង្ក្រាបបទល្មើសឆបោកតាមប្រព័ន្ធបច្ចេកវិទ្យា (Online Scams) ដោយចុះត្រួតពិនិត្យរដ្ឋបាលតាមគោលដៅសង្ស័យនានាក្នុងភូមិសាស្ត្រក្រុងតាខ្មៅ សំដៅធានាសន្តិសុខ សណ្ដាប់ធ្នាប់សាធារណៈ និងបង្កើនទំនុកចិត្តជូនប្រជាពលរដ្ឋ។

ប្រតិបត្តិការនេះ ធ្វើឡើងក្រោមការដឹកនាំ និងបញ្ជាផ្ទាល់ពីឯកឧត្តម គួច ចំរើន ប្រធានគណៈបញ្ជាការឯកភាពរដ្ឋបាលខេត្តកណ្ដាល លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្ដាល និងលោក ឃឹម សំភារ ប្រធានគណៈបញ្ជាការឯកភាពក្រុងតាខ្មៅ ដោយបានដាក់ចេញវិធានការចុះពិនិត្យផ្ទះជួល បន្ទប់ជួល ផ្ទះសំណាក់ ផ្ទះល្វែង បុរី និងឃ្លាំងផ្សេងៗ ដែលអាចជាទីតាំងសង្ស័យពាក់ព័ន្ធនឹងសកម្មភាពឆបោកតាមអនឡាញ។

ជាក់ស្ដែង នៅថ្ងៃទី១៩ ខែមិថុនា ឆ្នាំ២០២៦ ក្រុមការងារចម្រុះបានចុះត្រួតពិនិត្យទីតាំងមួយចំនួន រួមមានសហគ្រាសផលិតទឹកផ្លែឈើ និងទឹកចាហួយមួយកន្លែង ស្ថិតនៅភូមិព្រែកហូរលិច១ សង្កាត់ព្រែកហូរ បន្ទប់ជួលចំនួន២ទីតាំងក្នុងសង្កាត់ដើមមៀន និងផ្សារទំនើប ជេ.ភី.ហ្សេត. ប៊ូប៊ូ ហ្គាវ សេងហួត ស៊ូភើម៉ាឃីត ស្ថិតក្នុងសង្កាត់ព្រែកហូរ។

ក្រោយការត្រួតពិនិត្យយ៉ាងម៉ត់ចត់ និងល្អិតល្អន់ពីកម្លាំងជំនាញ សហការជាមួយអាជ្ញាធរមូលដ្ឋាន ជាលទ្ធផល ពុំមានការរកឃើញបទល្មើស Online Scams ឬសកម្មភាពខុសច្បាប់ណាមួយឡើយ នៅតាមទីតាំងដែលបានចុះពិនិត្យ។

យុទ្ធនាការនេះ សបញ្ជាក់ឱ្យឃើញពីការប្តេជ្ញាចិត្តរបស់អាជ្ញាធរ និងសមត្ថកិច្ច ក្នុងការបង្ការ ទប់ស្កាត់ និងបោសសម្អាតបទល្មើសបច្ចេកវិទ្យាគ្រប់ប្រភេទ ដើម្បីរក្សាបរិយាកាសសន្តិសុខ សណ្ដាប់ធ្នាប់ និងសុវត្ថិភាពសង្គម ឱ្យកាន់តែប្រសើរឡើង ស្របតាមគោលនយោបាយរបស់រាជរដ្ឋាភិបាលក្នុងការប្រយុទ្ធប្រឆាំងបទល្មើសឆបោកតាមប្រព័ន្ធអនឡាញ៕