អាជ្ញាធរខេត្តកណ្ដាលចុះត្រួតពិនិត្យឃ្លាំងស្តុកទំនិញនៅក្រុងតាខ្មៅ ដកហូតផលិតផលនាំចូលពីថៃ ១៨មុខ ទម្ងន់ជិត ៨០០គីឡូក្រាម ចាត់ការតាមច្បាប់

(កណ្ដាល)៖ អាជ្ញាធរខេត្តកណ្ដាល បានបន្តបើកប្រតិបត្តិការត្រួតពិនិត្យយ៉ាងតឹងរ៉ឹងលើការស្តុកទុក និងចែកចាយទំនិញនាំចូលពីប្រទេសថៃ ដោយនៅរសៀលថ្ងៃទី១៦ ខែមិថុនា ឆ្នាំ២០២៦ ក្រុមការងារចម្រុះបានចុះត្រួតពិនិត្យឃ្លាំងស្តុកទំនិញមួយកន្លែង ស្ថិតក្នុងសង្កាត់ដើមមៀន ក្រុងតាខ្មៅ និងបានដកហូតផលិតផលនាំចូលពីថៃចំនួន ១៨មុខ ដែលមានទម្ងន់សរុបប្រមាណ ៧៧៩គីឡូក្រាម ដើម្បីរក្សាទុក និងចាត់វិធានការតាមផ្លូវច្បាប់។

ប្រតិបត្តិការនេះ ដឹកនាំដោយ ឯកឧត្តម ខុន សេរីរដ្ឋា អភិបាលរងខេត្តកណ្ដាល ដោយមានការចូលរួមពីព្រះរាជអាជ្ញារងអមសាលាដំបូងខេត្ត មន្ត្រីអគ្គនាយកដ្ឋាន ក.ប.ប. អាជ្ញាធរក្រុងតាខ្មៅ និងកងកម្លាំងសមត្ថកិច្ចពាក់ព័ន្ធគ្រប់លំដាប់ថ្នាក់។

ជាលទ្ធផល មន្ត្រីជំនាញបានរកឃើញ និងដកហូតផលិតផលជាច្រើនប្រភេទ រួមមាន ទឹកប៉េងប៉ោះ ទឹកជ្រលក់ ម្សៅបំពង ប្រហិតគ្រប់ប្រភេទ កាពិ និងទឹកម្ទេស ដែលសុទ្ធសឹងជាទំនិញនាំចូលពីប្រទេសថៃ។ ផលិតផលទាំងនេះត្រូវបានយកទៅរក្សាទុក ដើម្បីបន្តនីតិវិធីស្រាវជ្រាវ និងអនុវត្តវិធានការស្របតាមច្បាប់ជាធរមាន។

ក្នុងឱកាសនោះ ឯកឧត្តម ខុន សេរីរដ្ឋា បានក្រើនរំលឹកដល់ម្ចាស់អាជីវកម្ម និងអ្នកនាំចូលទំនិញទាំងអស់ ឱ្យគោរពច្បាប់ និងបទប្បញ្ញត្តិពាក់ព័ន្ធនឹងការនាំចូល ការស្តុកទុក និងការចែកចាយផលិតផលម្ហូបអាហារ ព្រមទាំងត្រូវធានាឱ្យបាននូវគុណភាព សុវត្ថិភាព និងប្រភពច្បាស់លាស់នៃទំនិញ ដើម្បីការពារសុខភាព និងផលប្រយោជន៍របស់ប្រជាពលរដ្ឋជាអ្នកប្រើប្រាស់។ ជាពិសេស អាជ្ញាធរបានអំពាវនាវឱ្យបញ្ឈប់ការនាំចូល និងចែកចាយទំនិញពីប្រទេសថៃជាបន្តទៀត។

សូមបញ្ជាក់ថា ការចុះត្រួតពិនិត្យឃ្លាំងស្តុកទំនិញដែលសង្ស័យថាមានប្រភពនាំចូលពីប្រទេសថៃនេះ គឺជាការអនុវត្តតាមការណែនាំដ៏ម៉ឺងម៉ាត់របស់ សម្ដេចតេជោ ហ៊ុន សែន ប្រមុខរដ្ឋស្ដីទី ដែលបានជំរុញឱ្យស្ថាប័នពាក់ព័ន្ធស្រាវជ្រាវឱ្យដល់ឫសគល់ចំពោះបណ្ដាញនាំចូលទំនិញពីថៃ និងមន្ត្រីដែលអាចពាក់ព័ន្ធក្នុងការបើកដៃឱ្យមានការនាំចូលខុសគោលការណ៍។ ទន្ទឹមនឹងនេះ

ស្ថាប័នជំនាញក៏កំពុងបន្តពង្រីកការស៊ើបអង្កេត និងត្រួតពិនិត្យឃ្លាំងស្តុកទំនិញផ្សេងៗបន្ថែមទៀត ដើម្បីធានាប្រសិទ្ធភាពនៃការអនុវត្តច្បាប់ និងការពារផលប្រយោជន៍ជាតិ៕