សំណង់ផ្ទះត្រចៀកកាំនៅស្រុកស្រីសន្ធរ៖ បើមានច្បាប់ពិត ហេតុអ្វីមិនបង្ហាញជាសាធារណៈ?

(កំពង់ចាម)៖ ករណីសំណង់ផ្ទះត្រចៀកកាំមួយកន្លែង កំពុងសាងសង់នៅភូមិព្រែកឪជ្រឹង ឃុំព្រែករំដេង ស្រុកស្រីសន្ធរ ខេត្តកំពង់ចាម នៅតែបន្តបង្កឱ្យមានការជជែកវែកញែក និងចម្ងល់ជាច្រើនពីសំណាក់ប្រជាពលរដ្ឋ និងអ្នកសារព័ត៌មាន ជាពិសេសក្រោយពីអាជ្ញាធរខ្លះអះអាងថា សំណង់នេះមានច្បាប់អនុញ្ញាតត្រឹមត្រូវ ប៉ុន្តែមិនទាន់មានការបង្ហាញឯកសារជាក់ស្តែងជាសាធារណៈនៅឡើយ។

សំណួរដែលសាធារណជនកំពុងចោទសួរយ៉ាងទូលំទូលាយនោះគឺ៖ បើសំណង់នេះមានច្បាប់អនុញ្ញាតត្រឹមត្រូវមែន តើច្បាប់នោះនៅឯណា? ហេតុអ្វីមិនបិទលិខិតអនុញ្ញាតសាងសង់ និងលិខិតបើកការដ្ឋាននៅមុខការដ្ឋាន ដើម្បីឱ្យប្រជាពលរដ្ឋ និងអាជ្ញាធរមូលដ្ឋានអាចពិនិត្យបានដោយតម្លាភាព?

ជាទូទៅ សំណង់ដែលមានការអនុញ្ញាតត្រឹមត្រូវ ត្រូវមានឯកសារបច្ចេកទេស និងលិខិតអនុញ្ញាតពាក់ព័ន្ធជាច្រើន រួមមាន ប្លង់ស្ថាបត្យកម្ម ប្លង់គ្រឿងផ្គុំរចនាសម្ព័ន្ធ ប្លង់ប្រព័ន្ធអគ្គិសនី ប្លង់ប្រព័ន្ធទឹក លិខិតអនុញ្ញាតសាងសង់ និងលិខិតបើកការដ្ឋានសំណង់ ដែលចេញដោយអាជ្ញាធរ ឬស្ថាប័នជំនាញមានសមត្ថកិច្ច។ ជាពិសេស សម្រាប់សំណង់ផ្ទះត្រចៀកកាំ ដែលជាប្រភេទសំណង់អាជីវកម្ម ឬសំណង់មានលក្ខណៈពិសេស អាចត្រូវការការពិនិត្យលើស្តង់ដារសុវត្ថិភាព បច្ចេកទេសរចនាសម្ព័ន្ធ ប្រព័ន្ធរំដោះទឹក ប្រព័ន្ធការពារអគ្គិភ័យ និងការប្រើប្រាស់ដីឱ្យស្របតាមផែនការរៀបចំដែនដីផងដែរ។

ម្យ៉ាងវិញទៀត ប្រសិនបើសំណង់នេះមានការអនុញ្ញាតពីថ្នាក់ខេត្តពិតប្រាកដមែន ហេតុអ្វីបានជាអាជ្ញាធរឃុំដែលជាម្ចាស់មូលដ្ឋាន មិនទាន់បានឃើញឯកសារទាំងនោះ? ហើយហេតុអ្វីបានជាការបកស្រាយពីមន្ត្រីពាក់ព័ន្ធនៅតែមិនអាចបង្ហាញភស្តុតាងច្បាស់លាស់ជូនសាធារណជនបាន?

ការបន្តទុកឱ្យមានភាពស្រពិចស្រពិលបែបនេះ មិនត្រឹមតែប៉ះពាល់ដល់ទំនុកចិត្តរបស់ប្រជាពលរដ្ឋប៉ុណ្ណោះទេ ប៉ុន្តែអាចធ្វើឱ្យកើតមានការយល់ឃើញថា មានការអនុវត្តច្បាប់មិនស្មើភាព ឬមានការអនុគ្រោះណាមួយនៅពីក្រោយករណីនេះផងដែរ។

សាធារណជន សូមសំណូមពរដល់លោក អ៊ុន ចិន្តា អភិបាលខេត្តកំពង់ចាមមេត្តាចាត់តាំងមន្ត្រីជំនាញពាក់ព័ន្ធ ចុះពិនិត្យសំណង់ខាងលើឱ្យបានច្បាស់លាស់ ពិនិត្យទាំងលើឯកសារច្បាប់ និងស្តង់ដារបច្ចេកទេសសំណង់ ព្រមទាំងបំភ្លឺជូនសាធារណជនឱ្យបានច្បាស់ថា «តើសំណង់នេះមានការអនុញ្ញាតស្របច្បាប់ និងគោរពតាមនីតិវិធីបច្ចេកទេសដែរឬទេ»។

តម្លាភាព គណនេយ្យភាព និងការអនុវត្តច្បាប់ដោយស្មើភាពចំពោះមុខច្បាប់ គឺជាមូលដ្ឋានសំខាន់ក្នុងការពង្រឹងទំនុកចិត្តរបស់ប្រជាពលរដ្ឋ។ ប្រសិនបើសំណង់មានច្បាប់ សូមបង្ហាញច្បាប់។ ប្រសិនបើគ្មានច្បាប់ សូមអនុវត្តវិធានការតាមផ្លូវច្បាប់ឱ្យបានម៉ឺងម៉ាត់ ដើម្បីធានាថា គ្មានបុគ្គលណាម្នាក់អាចឈរលើច្បាប់បានឡើយ៕