ក្មេងទំនើង១០នាក់ បង្ហោះម៉ូតូពេញផ្លូវសាធារណៈ ត្រូវអាវុធហត្ថខេត្តកំពង់ស្ពឺបង្ក្រាប ដកហូតម៉ូតូទុក៣ខែ

(កំពង់ស្ពឺ)៖ ក្រុមក្មេងទំនើងចំនួន ១០នាក់ ដែលនាំគ្នាធ្វើសកម្មភាពបង្ហោះម៉ូតូយ៉ាងអនាធិបតេយ្យនៅលើដងផ្លូវសាធារណៈ បង្កការភ័យខ្លាចដល់ប្រជាពលរដ្ឋ និងប៉ះពាល់ដល់សណ្ដាប់ធ្នាប់សាធារណៈ ត្រូវបានកម្លាំងជំនាញកងរាជអាវុធហត្ថខេត្តកំពង់ស្ពឺ ធ្វើការបង្ក្រាប និងឃាត់ខ្លួនយកមកអប់រំណែនាំ ធ្វើកិច្ចសន្យាបញ្ឈប់សកម្មភាព ព្រមទាំងដកហូតម៉ូតូរក្សាទុកជាបណ្តោះអាសន្ន។

ប្រតិបត្តិការនេះធ្វើឡើងក្រោមការដឹកនាំ និងអនុវត្តយ៉ាងម៉ឺងម៉ាត់តាមបទបញ្ជារបស់លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ ក្នុងគោលបំណងទប់ស្កាត់ និងបង្ក្រាបរាល់សកម្មភាពក្មេងទំនើងដែលបង្កអសន្តិសុខ និងភាពអនាធិបតេយ្យក្នុងសង្គម។

ប្រភពពីសមត្ថកិច្ចបានឱ្យដឹងថា នៅវេលាម៉ោងប្រមាណ ៩:៣០នាទីយប់ ថ្ងៃទី១៣ ខែមិថុនា ឆ្នាំ២០២៦ ក្រុមក្មេងទំនើងខាងលើបាននាំគ្នាបង្ហោះម៉ូតូនៅលើផ្លូវលេខ១០៦ ស្ថិតក្នុងភូមិពាណិជ្ជកម្ម សង្កាត់រការធំ ក្រុងច្បារមន ខេត្តកំពង់ស្ពឺ ដោយមិនគិតពីគ្រោះថ្នាក់ដែលអាចកើតមានចំពោះខ្លួនឯង និងអ្នកដទៃ។ សកម្មភាពនេះមិនត្រឹមតែបំពានច្បាប់ចរាចរណ៍ប៉ុណ្ណោះទេ ប៉ុន្តែថែមទាំងបង្កការរំខានដល់សណ្ដាប់ធ្នាប់សាធារណៈ និងធ្វើឱ្យប្រជាពលរដ្ឋមានការព្រួយបារម្ភផងដែរ។

ក្រោយការស្រាវជ្រាវ និងបង្ក្រាប សមត្ថកិច្ចបានឃាត់ខ្លួនក្មេងទំនើងទាំង១០នាក់ និងដកហូតវត្ថុតាងរួមមាន ម៉ូតូចំនួន ៥គ្រឿង និងទូរស័ព្ទដៃចំនួន ១២គ្រឿង ដើម្បីចាត់ការតាមនីតិវិធី។
បច្ចុប្បន្ន ក្រុមក្មេងទំនើងទាំងនេះត្រូវបានអាវុធហត្ថខេត្តកំពង់ស្ពឺ យកមកអប់រំណែនាំ និងធ្វើកិច្ចសន្យាចំពោះមុខឪពុកម្តាយ អាណាព្យាបាល ឱ្យបញ្ឈប់ជាដាច់ខាតនូវសកម្មភាពទំនើងគ្រប់រូបភាព ខណៈម៉ូតូទាំង៥គ្រឿង ត្រូវបានដកហូតរក្សាទុករយៈពេល ៣ខែ នៅទីបញ្ជាការកងរាជអាវុធហត្ថខេត្តកំពង់ស្ពឺ។

វិធានការដ៏ម៉ឺងម៉ាត់នេះ ត្រូវបានមហាជនសាទរថា ជាការចូលរួមចំណែកយ៉ាងសំខាន់ក្នុងការពង្រឹងសន្តិសុខ សណ្ដាប់ធ្នាប់សង្គម និងជាការព្រមានដល់ក្រុមក្មេងទំនើងផ្សេងៗ មិនឱ្យយកដងផ្លូវសាធារណៈធ្វើជាកន្លែងបង្ហាញសកម្មភាពប្រថុយគ្រោះថ្នាក់ ដែលអាចនាំឱ្យកើតមានគ្រោះថ្នាក់ធ្ងន់ធ្ងរដល់អាយុជីវិត និងទ្រព្យសម្បត្តិរបស់ប្រជាពលរដ្ឋ៕