លួចសាងសង់សំណង់រឹងមាំចូលដីចំណីទន្លេបាសាក់! តើជាការមើលស្រាលច្បាប់ ឬជាបញ្ហាខ្វះការត្រួតពិនិត្យពីអាជ្ញាធរ ឬពីលោកចៅហ្វាយក្រុង ឃឹម សំភារ?

(កណ្ដាល)៖ ករណីសំណង់រឹងមាំមួយកន្លែង ដែលកំពុងសាងសង់គ្រឹះជើងតាងចូលលើដីចំណីទន្លេបាសាក់ ស្ថិតនៅភូមិកោះគ ឃុំរកាខ្ពស់ ក្រុងតាខ្មៅ ខេត្តកណ្ដាល បានក្លាយជាប្រធានបទក្តៅ និងបង្កការព្រួយបារម្ភយ៉ាងខ្លាំងពីសំណាក់ប្រជាពលរដ្ឋ ខណៈសំណង់នេះត្រូវបានរាយការណ៍ថា ពុំមានការសុំច្បាប់អនុញ្ញាតត្រឹមត្រូវពីអាជ្ញាធរមានសមត្ថកិច្ចនោះឡើយ។

ក្រោយមានការផ្សព្វផ្សាយ និងរាយការណ៍ពីប្រជាពលរដ្ឋចូលក្នុងក្រុម «ប្រជាជនខេត្តកណ្ដាល» លោក ឃឹម សំភារ អភិបាលក្រុងតាខ្មៅ បានបញ្ជាឲ្យក្រុមការងារជំនាញចុះពិនិត្យទីតាំងជាក់ស្តែង ដើម្បីសិក្សា និងផ្ទៀងផ្ទាត់ព័ត៌មាននៅថ្ងៃបន្ទាប់។ ការឆ្លើយតបនេះជាសញ្ញាវិជ្ជមានមួយ ប៉ុន្តែសម្រាប់មហាជន វាមិនទាន់គ្រប់គ្រាន់ក្នុងការឆ្លើយសំណួរថា តើហេតុអ្វីបានជាសំណង់រឹងមាំមួយអាចសាងសង់ឡើងដល់ដំណាក់កាលនេះបាន ដោយគ្មានការទប់ស្កាត់ទាន់ពេលវេលា?

មហាជនបានលើកឡើងថា បញ្ហាសំខាន់មិនមែនស្ថិតនៅត្រឹមការចុះពិនិត្យក្រោយពេលប្រជាពលរដ្ឋរាយការណ៍នោះទេ ប៉ុន្តែស្ថិតនៅលើប្រសិទ្ធភាពនៃការត្រួតពិនិត្យ និងការអនុវត្តច្បាប់ជាប្រចាំរបស់អាជ្ញាធរមូលដ្ឋាន។ ប្រជាពលរដ្ឋជាច្រើនបានចោទជាសំណួរថា ប្រសិនបើគ្មានអ្នកថតរូប និងបង្ហោះព័ត៌មាន តើសំណង់នេះនឹងអាចបន្តសាងសង់រហូតដល់បញ្ចប់ដោយគ្មានអ្នកណាដឹងឬយ៉ាងណា?

ដីចំណីទន្លេ គឺជាទ្រព្យសម្បត្តិសាធារណៈរបស់រដ្ឋ ដែលត្រូវការការការពារយ៉ាងតឹងរ៉ឹង ព្រោះការរំលោភបំពានអាចបង្កផលប៉ះពាល់ដល់បរិស្ថាន លំហូរទឹក សុវត្ថិភាពច្រាំងទន្លេ និងផែនការអភិវឌ្ឍរយៈពេលវែងរបស់រាជរដ្ឋាភិបាល។ ការអនុញ្ញាតឲ្យមានការសាងសង់ដោយគ្មានច្បាប់ ឬការមិនចាត់វិធានការទាន់ពេលវេលា អាចបង្កើតជាគំរូអាក្រក់ និងលើកទឹកចិត្តឱ្យមានការរំលោភដីសាធារណៈបន្ថែមទៀត។

គួររំលឹកថា ឯកឧត្តម គួច ចំរើន អភិបាលខេត្តកណ្ដាល ធ្លាប់បានដាក់បទបញ្ជាយ៉ាងច្បាស់លាស់ឱ្យរុះរើសំណង់ទាំងឡាយណាដែលរំលោភលើដីសាធារណៈរបស់រដ្ឋ និងបានជំរុញឱ្យអាជ្ញាធរគ្រប់លំដាប់ថ្នាក់អនុវត្តច្បាប់ដោយគ្មានការលើកលែង។ ដូច្នេះ ករណីថ្មីនេះ គឺជាតេស្តដ៏សំខាន់មួយសម្រាប់អាជ្ញាធរមូលដ្ឋានក្នុងការបង្ហាញពីឆន្ទៈ និងសមត្ថភាពក្នុងការអនុវត្តច្បាប់ឱ្យមានប្រសិទ្ធភាព។

ប្រជាពលរដ្ឋសង្ឃឹមថា ការចុះពិនិត្យលើកនេះ នឹងមិនបញ្ចប់ត្រឹមការធ្វើរបាយការណ៍ ឬការពិនិត្យជាផ្លូវការប៉ុណ្ណោះទេ ប៉ុន្តែត្រូវមានការបង្ហាញលទ្ធផលឱ្យបានច្បាស់លាស់ និងចាត់វិធានការតាមផ្លូវច្បាប់ប្រសិនបើរកឃើញថាមានការរំលោភពិតប្រាកដ។ ព្រោះការការពារដីសាធារណៈ មិនមែនជាកាតព្វកិច្ចរបស់អាជ្ញាធរតែម្នាក់ឯងទេ ប៉ុន្តែជាការទទួលខុសត្រូវរួមក្នុងការរក្សាទុកទ្រព្យសម្បត្តិជាតិឱ្យនៅគង់វង្សសម្រាប់មនុស្សជំនាន់ក្រោយ។

មហាជនកំពុងរង់ចាំមើលថា តើសំណង់ដែលកំពុងសាងសង់ចូលដីចំណីទន្លេបាសាក់នេះ នឹងត្រូវបានអនុវត្តច្បាប់យ៉ាងម៉ឺងម៉ាត់ដូចករណីមុនៗដែរឬទេ ឬក៏នឹងក្លាយជារឿងដែលស្ងប់ស្ងាត់ទៅវិញក្រោយការចុះពិនិត្យមួយលើក? នេះជាចំណុចដែលអាជ្ញាធរពាក់ព័ន្ធត្រូវផ្តល់ចម្លើយជាក់ស្តែងជូនសាធារណជន៕