លោក ម៉េង ស្រ៊ុន ដឹកនាំកិច្ចប្រជុំបូកសរុបការងារ និងបន្តចូលរួមអភិវឌ្ឍវិស័យព្រះពុទ្ធសាសនានៅឃុំអមលាំង

(កំពង់ស្ពឺ)៖ នាព្រឹកថ្ងៃទី១៤ ខែមិថុនា ឆ្នាំ២០២៦ លោក ម៉េង ស្រ៊ុន សមាជិកអចិន្ត្រៃយ៍ នៃគណៈកម្មាធិការគណបក្សខេត្តកំពង់ស្ពឺ ប្រធានក្រុមការងារគណបក្សចុះមូលដ្ឋានឃុំអមលាំង និងជាប្រធានគណៈកម្មការគ្រប់គ្រង ខ២៦.២ បានអញ្ជើញជាអធិបតីដឹកនាំកិច្ចប្រជុំបូកសរុបលទ្ធផលការងារគណបក្សប្រចាំខែឧសភា និងផ្សព្វផ្សាយផែនការសកម្មភាពរួមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៦ ឆ្នាំ២០២៧ ដែលបានប្រព្រឹត្តទៅនៅស្នាក់ការគណបក្សឃុំអមលាំង ស្រុកថ្ពង ខេត្តកំពង់ស្ពឺ។

កិច្ចប្រជុំនេះបានបង្ហាញពីការយកចិត្តទុកដាក់ខ្ពស់របស់លោក ម៉េង ស្រ៊ុន ក្នុងការពង្រឹងប្រសិទ្ធភាពការងារគណបក្សនៅថ្នាក់មូលដ្ឋាន ពិនិត្យវាយតម្លៃលទ្ធផលការងារកន្លងមក ព្រមទាំងដាក់ចេញទិសដៅ និងផែនការជាក់ស្តែង ដើម្បីធានាឱ្យការអនុវត្តការងារនានាសម្រេចបានលទ្ធផលល្អប្រសើរ ស្របតាមគោលនយោបាយ និងទិសដៅរួមរបស់គណបក្ស។

ក្រោយបញ្ចប់កិច្ចប្រជុំ លោក ម៉េង ស្រ៊ុន បានបន្តដឹកនាំក្រុមការងារគណបក្សនាំយកសម្ភារៈ និងបច្ច័យមួយចំនួនទៅប្រគេនជូនវត្តតាំហោង ស្ថិតនៅភូមិតាំហោង ឃុំអមលាំង ស្រុកថ្ពង ខេត្តកំពង់ស្ពឺ ដើម្បីចូលរួមចំណែកក្នុងការកសាងព្រះវិហារ និងលើកស្ទួយវិស័យព្រះពុទ្ធសាសនា។

សម្ភារៈ និងបច្ច័យដែលបានប្រគេនរួមមាន ស៊ីម៉ង់ត៍ម៉ាក K ចំនួន ២តោន អង្ករ ១០បេ ទឹកបរិសុទ្ធ ១០កេស ព្រមទាំងបច្ច័យជូនតាជី យាយជី ចំនួន ២៥នាក់ ដោយម្នាក់ៗទទួលបាន ១០,០០០រៀល ដែលសរុបជាទឹកប្រាក់អស់ចំនួន ១,៦១៥,០០០រៀល។

សកម្មភាពដ៏ប្រកបដោយសប្បុរសធម៌ និងទំនួលខុសត្រូវសង្គមរបស់លោក ម៉េង ស្រ៊ុន នាពេលនេះ បានឆ្លុះបញ្ចាំងឱ្យឃើញពីភាពជាថ្នាក់ដឹកនាំគំរូ ដែលមិនត្រឹមតែយកចិត្តទុកដាក់លើការងារនយោបាយ និងការអភិវឌ្ឍមូលដ្ឋានប៉ុណ្ណោះទេ ប៉ុន្តែថែមទាំងបានចូលរួមយ៉ាងសកម្មក្នុងការថែរក្សា និងលើកកម្ពស់វិស័យព្រះពុទ្ធសាសនា ដែលជាប្រភពនៃសីលធម៌ គុណធម៌ និងសាមគ្គីភាពក្នុងសង្គមខ្មែរផងដែរ។

ប្រជាពលរដ្ឋ និងពុទ្ធបរិស័ទក្នុងមូលដ្ឋាន បានសម្តែងនូវការកោតសរសើរ និងវាយតម្លៃខ្ពស់ចំពោះទឹកចិត្តសប្បុរស ក៏ដូចជាការខិតខំបំពេញការងារដោយភាពទទួលខុសត្រូវរបស់លោក ម៉េង ស្រ៊ុន ដែលតែងតែនៅជាប់ជាមួយប្រជាពលរដ្ឋ ស្តាប់សំណូមពរ និងរួមចំណែកដោះស្រាយបញ្ហានានា ដើម្បីជំរុញការអភិវឌ្ឍមូលដ្ឋានឱ្យកាន់តែរីកចម្រើនជាបន្តបន្ទាប់៕