បង្ក្រាបទីតាំង Scam Online ដ៏ធំនៅស្រុកមុខកំពូល! ឃាត់ជនជាតិចិន ៩នាក់ រឹបអូសទូរស័ព្ទជិត ១០០គ្រឿង និងសម្ភារៈបច្ចេកវិទ្យាជាច្រើន

(កណ្ដាល)៖ កម្លាំងសមត្ថកិច្ចចម្រុះ ក្រោមការដឹកនាំផ្ទាល់របស់លោក ហាក់ សុខមករា អភិបាលខេត្តកណ្ដាល និងសម្របសម្រួលនីតិវិធីដោយលោក លាង អ៊ូ ព្រះរាជអាជ្ញារងអមសាលាដំបូងខេត្តកណ្ដាល បានបើកប្រតិបត្តិការបង្ក្រាបទីតាំងសង្ស័យប្រព្រឹត្តបទល្មើស Scam Online មួយកន្លែង ស្ថិតនៅផ្ទះវីឡាលេខ ០០៩ ផ្លូវលេខ៥ បុរីអាម៉ូរី ៧មករា ក្នុងភូមិជ្រែមួយរយ ឃុំសំបួរមាស ស្រុកមុខកំពូល ខេត្តកណ្ដាល កាលពីថ្ងៃទី១០ ខែមិថុនា ឆ្នាំ២០២៦។

ក្នុងប្រតិបត្តិការនេះ សមត្ថកិច្ចបានឃាត់ខ្លួនជនជាតិចិនចំនួន ៩នាក់ និងរឹបអូសវត្ថុតាងជាច្រើនរួមមាន ទូរស័ព្ទដៃ ៩៦គ្រឿង កុំព្យូទ័រលើតុ ៤គ្រឿង កុំព្យូទ័រយួរដៃ ៤គ្រឿង ព្រមទាំងរថយន្តម៉ាក Ford Pick-up ពណ៌ស ១គ្រឿងផងដែរ។

លោក ហាក់ សុខមករា បានបញ្ជាក់ថា តាមការស៊ើបអង្កេត និងភស្តុតាងប្រមូលបាន ជនសង្ស័យទាំងនេះពិតជាបានជាប់ពាក់ព័ន្ធនឹងសកម្មភាពឆបោកតាមប្រព័ន្ធអនឡាញ (Scam Online) ប្រាកដមែន។ បច្ចុប្បន្ន ជនសង្ស័យទាំង ៩នាក់ រួមទាំងវត្ថុតាងទាំងអស់ ត្រូវបានបញ្ជូនទៅកាន់ស្នងការដ្ឋាននគរបាលខេត្តកណ្ដាល ដើម្បីបន្តនីតិវិធីស្រាវជ្រាវ និងចាត់ការតាមផ្លូវច្បាប់។

ប្រភពព័ត៌មានបានឱ្យដឹងថា ជនបរទេសទាំងនេះបានជួលស្នាក់នៅទីតាំងខាងលើតាំងពីថ្ងៃទី២៨ ខែមេសា ឆ្នាំ២០២៦។ តាមការត្រួតពិនិត្យបឋមដោយជំនាញបច្ចេកវិទ្យា បានរកឃើញសកម្មភាពឆបោកតាមប្រព័ន្ធអនឡាញដែលមានគោលដៅទៅលើជនរងគ្រោះនៅប្រទេសចិន ហើយប្រតិបត្តិការនេះត្រូវបានសង្ស័យថាបានចាប់ផ្តើមតាំងពីថ្ងៃទី១៩ ខែកុម្ភៈ ឆ្នាំ២០២៦មកម្ល៉េះ។

បច្ចុប្បន្ន ជនសង្ស័យ និងវត្ថុតាងត្រូវបានប្រគល់ជូនជំនាញស្នងការដ្ឋាននគរបាលខេត្តកណ្ដាល ដើម្បីបន្តការស៊ើបអង្កេតឱ្យបានស៊ីជម្រៅ ខណៈទីតាំងផ្ទះវីឡាខាងលើត្រូវបានសមត្ថកិច្ចបិទ និងឃ្លុំទុកជាបណ្ដោះអាសន្ន ដើម្បីរង់ចាំចំណាត់ការតាមនីតិវិធីច្បាប់។

ប្រតិបត្តិការនេះត្រូវបានចាត់ទុកថាជាវិធានការម៉ឺងម៉ាត់របស់អាជ្ញាធរ ក្នុងការបង្ការ និងបង្ក្រាបបទល្មើសបច្ចេកវិទ្យាឆ្លងដែន ដែលកំពុងគំរាមកំហែងដល់សន្តិសុខ និងសណ្តាប់ធ្នាប់សង្គម៕