ដេប៉ូខ្សាច់ «ចាន់ ណា» និង «៨៨៨ តាំង រ៉ានី» នៅតែបន្តដឹកខ្សាច់អត់គ្របត្រឹមត្រូវ តើអាជ្ញាធរស្រុកកៀនស្វាយនឹងចាត់វិធានការយ៉ាងណា?

(កណ្ដាល)៖ ប្រជាពលរដ្ឋ និងអ្នកធ្វើដំណើរតាមបណ្ដោយផ្លូវជាតិលេខ១ ស្ថិតក្នុងភូមិស្ដៅកន្លែង ឃុំដីឥដ្ឋ ស្រុកកៀនស្វាយ ខេត្តកណ្ដាល បានបន្តលើកឡើងនូវក្តីបារម្ភជាថ្មី បន្ទាប់ពីនៅព្រឹកថ្ងៃទី១០ ខែមិថុនា ឆ្នាំ២០២៦ គេសង្កេតឃើញរថយន្តដឹកខ្សាច់ចេញពីដេប៉ូខ្សាច់ «ចាន់ ណា» និងដេប៉ូខ្សាច់ «៨៨៨ តាំង រ៉ានី» នៅតែបន្តដឹកជញ្ជូនខ្សាច់ដោយមិនគ្របតង់ឲ្យបានត្រឹមត្រូវ បណ្តាលឲ្យខ្សាច់ហុយ និងធ្លាក់រាយប៉ាយតាមដងផ្លូវជាតិដដែល។

បញ្ហានេះមិនមែនជារឿងថ្មី ឬទើបកើតឡើងម្តងម្កាលនោះទេ។ ផ្ទុយទៅវិញ ប្រភពពីប្រជាពលរដ្ឋ និងអ្នកធ្វើដំណើរបានអះអាងថា សកម្មភាពបែបនេះបានកើតឡើងជាបន្តបន្ទាប់ និងត្រូវបានគេសង្កេតឃើញជាញឹកញាប់ ដោយហាក់បីដូចជាមិនមានការកែតម្រូវ ឬការអនុវត្តច្បាប់ឲ្យបានតឹងរ៉ឹងពីសំណាក់អាជ្ញាធរពាក់ព័ន្ធនោះឡើយ។

មហាជនបានលើកឡើងថា ការដឹកខ្សាច់មិនគ្របឲ្យបានត្រឹមត្រូវ មិនមែនគ្រាន់តែជាការខ្វះទំនួលខុសត្រូវរបស់ម្ចាស់អាជីវកម្មប៉ុណ្ណោះទេ ប៉ុន្តែអាចក្លាយជាហានិភ័យធ្ងន់ធ្ងរដល់សុវត្ថិភាពសាធារណៈ។ ខ្សាច់ដែលហុយចូលភ្នែកអ្នកបើកបរម៉ូតូ និងរថយន្ត អាចធ្វើឲ្យបាត់បង់ការមើលឃើញភ្លាមៗ ខណៈខ្សាច់ដែលធ្លាក់លើផ្លូវអាចបង្កឲ្យម៉ូតូរអិលដួល និងនាំទៅរកគ្រោះថ្នាក់ដែលមិនអាចប៉ាន់ស្មានបាន។

លើសពីនេះ ការហុយធូលីខ្សាច់ជាប្រចាំក៏បង្កផលប៉ះពាល់ដល់សុខភាពប្រជាពលរដ្ឋរស់នៅតាមដងផ្លូវ ជាពិសេសកុមារ មនុស្សចាស់ និងអ្នកមានជំងឺផ្លូវដង្ហើម។ ចំណែកសោភ័ណភាព និងបរិស្ថានសាធារណៈក៏ត្រូវរងផលប៉ះពាល់ផងដែរ ដោយផ្លូវថ្នល់ក្លាយជាកន្លែងកខ្វក់ និងគ្មានសណ្តាប់ធ្នាប់។

មហាជនបានចោទជាសំណួរថា បើសកម្មភាពនេះកើតឡើងជាបន្តបន្ទាប់ និងត្រូវបានផ្សព្វផ្សាយជាច្រើនលើកច្រើនសារមកហើយ តើហេតុអ្វីបានជានៅតែបន្តកើតមាន? តើការអនុវត្តច្បាប់ស្តីពីចរាចរណ៍ផ្លូវគោក និងបទប្បញ្ញត្តិពាក់ព័ន្ធ ត្រូវបានអនុវត្តស្មើភាពគ្នាចំពោះគ្រប់អាជីវកម្មដែរឬទេ?

ប្រជាពលរដ្ឋក៏បានដាក់ជាសំណួរទៅកាន់លោក ឡូវ សុខសាន អភិបាលស្រុកកៀនស្វាយ និងជាប្រធានគណៈបញ្ជាការឯកភាពរដ្ឋបាលស្រុកថា តើលោកនឹងមានវិធានការបែបណាបន្ថែមទៀត ប្រសិនបើម្ចាស់ដេប៉ូខ្សាច់ខាងលើនៅតែបន្តមិនគោរពច្បាប់ និងមិនអនុវត្តវិធានការសុវត្ថិភាពក្នុងការដឹកជញ្ជូន?

ក្នុងនាមជាប្រធានគណៈបញ្ជាការឯកភាពរដ្ឋបាលស្រុក ដែលមានតួនាទីដឹកនាំ សម្របសម្រួល និងអនុវត្តច្បាប់ដើម្បីរក្សាសណ្តាប់ធ្នាប់សាធារណៈ ប្រជាពលរដ្ឋសង្ឃឹមថា អាជ្ញាធរស្រុកនឹងមិនត្រឹមតែទទួលព័ត៌មានប៉ុណ្ណោះទេ ប៉ុន្តែត្រូវចាត់វិធានការជាក់ស្តែង និងមានប្រសិទ្ធភាព ដើម្បីបញ្ចប់បញ្ហាដែលបានអូសបន្លាយជាយូរមកនេះ។

ការអនុវត្តច្បាប់មិនគួរត្រឹមតែមាននៅលើក្រដាស ឬធ្វើឡើងម្តងម្កាលនោះទេ។ ប្រសិនបើការបំពាននៅតែបន្តដោយគ្មានវិធានការទប់ស្កាត់ច្បាស់លាស់ នោះអាចធ្វើឲ្យសាធារណជនមានចម្ងល់អំពីប្រសិទ្ធភាពនៃការគ្រប់គ្រង និងការអនុវត្តច្បាប់នៅមូលដ្ឋាន។

សុវត្ថិភាពចរាចរណ៍ អាយុជីវិតប្រជាពលរដ្ឋ និងការគោរពច្បាប់ មិនគួរត្រូវបានប្តូរជាមួយផលប្រយោជន៍អាជីវកម្មណាមួយឡើយ។ ដូច្នេះ មហាជនកំពុងរង់ចាំមើលថា តើអាជ្ញាធរពាក់ព័ន្ធនឹងចាត់វិធានការយ៉ាងម៉ឺងម៉ាត់ ដើម្បីបញ្ឈប់សកម្មភាពដឹកខ្សាច់អត់គ្រប ដែលកំពុងបង្កក្តីបារម្ភដល់អ្នកប្រើប្រាស់ផ្លូវជារៀងរាល់ថ្ងៃនេះដែរឬទេ៕