តើគម្រោងអភិវឌ្ឍន៍ដើម្បីប្រជាពលរដ្ឋ ឬបង្កទុក្ខលំបាកឱ្យប្រជាពលរដ្ឋ?

(កណ្ដាល)៖ ប្រជាពលរដ្ឋរស់នៅតាមបណ្ដោយទំនប់ចាបយំ ស្ថិតក្នុងភូមិព្រែករាំង១ សង្កាត់កំពង់សំណាញ់ ក្រុងតាខ្មៅ ខេត្តកណ្ដាល កំពុងបង្ហាញការមិនពេញចិត្ត និងស្នើសុំឱ្យអាជ្ញាធរពាក់ព័ន្ធ ជាពិសេសក្រសួងសាធារណការ និងដឹកជញ្ជូន និងមន្ទីរសាធារណការនិងដឹកជញ្ជូនខេត្តកណ្ដាល និងលោក ឃឹម សំភារ ចៅហ្វាយក្រុងតាខ្មៅ ចុះពិនិត្យជាបន្ទាន់លើការអនុវត្តគម្រោងស្ថាបនាផ្លូវ និងដាក់លូរបស់ក្រុមហ៊ុនម៉ៅការមួយ ដែលត្រូវបានគេស្គាល់ថាជាក្រុមហ៊ុនរបស់ជនជាតិកូរ៉េ។

ការអភិវឌ្ឍន៍គឺជារឿងល្អ និងជាអ្វីដែលប្រជាពលរដ្ឋស្វាគមន៍ជានិច្ច ប៉ុន្តែការអភិវឌ្ឍន៍ដែលខ្វះការទទួលខុសត្រូវ ខ្វះការគ្រប់គ្រង និងបណ្ដោយឱ្យប៉ះពាល់ដល់សុវត្ថិភាពសាធារណៈ មិនគួរត្រូវបានមើលរំលងនោះឡើយ។

អ្វីដែលគួរឱ្យកត់សម្គាល់នោះ គឺការបិទផ្លូវអូសបន្លាយអស់រយៈពេលជាច្រើនខែ បង្កការលំបាកយ៉ាងខ្លាំងដល់ការធ្វើដំណើរ ការដឹកជញ្ជូន និងជីវភាពរស់នៅប្រចាំថ្ងៃរបស់ប្រជាពលរដ្ឋ។ កាន់តែគួរឱ្យព្រួយបារម្ភទៀតនោះ គឺនៅតាមការដ្ឋានមួយចំនួន ពុំឃើញមានវិធានការសុវត្ថិភាពគ្រប់គ្រាន់ ខណៈមានប្រជាពលរដ្ឋធ្លាប់ជួបគ្រោះថ្នាក់ធ្លាក់ចូលប្រឡាយកំពុងសាងសង់រួចមកហើយ។

សំណួរដែលសាធារណជនចង់ដឹង គឺតើក្រុមហ៊ុនម៉ៅការបានគោរពតាមស្តង់ដារបច្ចេកទេស និងលក្ខខណ្ឌសុវត្ថិភាពដែរឬទេ? ហេតុអ្វីបានជាទីតាំងដែលមានហានិភ័យដល់អាយុជីវិតប្រជាពលរដ្ឋ មិនទាន់ត្រូវបានកែលម្អ ឬកាយកប់ឱ្យមានសុវត្ថិភាពឡើងវិញ សូម្បីតែគិតមកដល់ថ្ងៃចេញផ្សាយនេះ?

អ្វីដែលធ្វើឱ្យមហាជនកាន់តែមានចម្ងល់នោះ គឺផ្លូវបេតុងដែលទើបសាងសង់ថ្មី មិនទាន់បានប្រើប្រាស់គ្រប់មួយឆ្នាំផង បែរជាត្រូវរុះរើ កាយកម្ទេច និងធ្វើឡើងវិញ។ បញ្ហានេះមិនមែនគ្រាន់តែជាសំណួរអំពីគុណភាពសំណង់ប៉ុណ្ណោះទេ ប៉ុន្តែជាសំណួរអំពីប្រសិទ្ធភាពនៃការរៀបចំផែនការ ការត្រួតពិនិត្យបច្ចេកទេស និងការប្រើប្រាស់ថវិកាផងដែរ។

ប្រជាពលរដ្ឋមានសិទ្ធិសួរថា តើការងារសាងសង់នេះមានការត្រួតពិនិត្យពីមន្ត្រីជំនាញជាប្រចាំដែរឬទេ? តើមានការវាយតម្លៃគុណភាពសំណង់មុនពេលប្រគល់ទទួលដែរឬទេ? ហើយប្រសិនបើមានភាពខ្វះខាត តើនរណាជាអ្នកទទួលខុសត្រូវចំពោះផលប៉ះពាល់ដែលប្រជាពលរដ្ឋកំពុងរងគ្រោះ?

មហាជនបានលើកឡើងថា ការលើកឡើងនេះ ដើម្បីឱ្យគម្រោងអភិវឌ្ឍន៍នានា អនុវត្តទៅដោយតម្លាភាព ប្រសិទ្ធភាព គុណភាព និងការទទួលខុសត្រូវខ្ពស់ចំពោះសង្គម។

ប្រជាពលរដ្ឋសង្ឃឹមថា ឯកឧត្តម ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន នឹងយកចិត្តទុកដាក់ពិនិត្យករណីនេះដោយផ្ទាល់ និងជំរុញឱ្យក្រុមហ៊ុនម៉ៅការពន្លឿនការងារ កែសម្រួលចំណុចហានិភ័យទាំងអស់ និងធានាគុណភាពសំណង់ឱ្យស្របតាមស្តង់ដារបច្ចេកទេស ដើម្បីកុំឱ្យគម្រោងដែលបង្កើតឡើងសម្រាប់បម្រើប្រជាពលរដ្ឋ ក្លាយជាបន្ទុក និងការលំបាកសម្រាប់ប្រជាពលរដ្ឋទៅវិញ។

ប្រជាពលរដ្ឋទទូចឱ្យអាជ្ញាធរ និងស្ថាប័នជំនាញពាក់ព័ន្ធ ចុះពិនិត្យជាក់ស្តែង និងបង្ហាញលទ្ធផលជាសាធារណៈ ដើម្បីបំបាត់មន្ទិលសង្ស័យ និងធានាថាការអភិវឌ្ឍន៍នៅក្នុងមូលដ្ឋានពិតជាផ្តល់ផលប្រយោជន៍ដល់ប្រជាពលរដ្ឋ មិនមែនទុកឱ្យប្រជាពលរដ្ឋរស់នៅជាមួយហានិភ័យ និងការលំបាកអូសបន្លាយដោយគ្មានដំណោះស្រាយនោះឡើយ៕