ពលរដ្ឋស្នើលោកចៅហ្វាយស្រុកកៀនស្វាយ និងមន្ទីរសាធារណការ ចុះពិនិត្យផ្លូវលេខ១១០ ក្បែរស្ពានក្រវាត់ក្រុងទី៣ ខូចខាតធ្ងន់ធ្ងរ បង្កក្តីបារម្ភពីសុវត្ថិភាពអ្នកធ្វើដំណើរ

(កណ្ដាល)៖ ប្រជាពលរដ្ឋរស់នៅ និងធ្វើដំណើរឆ្លងកាត់តាមផ្លូវលេខ១១០ ស្ថិតនៅចំណុចក្បែរស្ពានក្រវាត់ក្រុងទី៣ ភូមិព្រែកស្វាយ២ ឃុំឈើទាល ស្រុកកៀនស្វាយ ខេត្តកណ្ដាល បានបង្ហាញការព្រួយបារម្ភយ៉ាងខ្លាំងចំពោះស្ថានភាពផ្លូវដែលកំពុងរងការខូចខាតយ៉ាងដំណំ មានជង្ហុក ដក់ទឹក បែកភក់ និងមានខ្សាច់គ្របលើចិញ្ចើមផ្លូវយ៉ាងក្រាស់ ដែលអាចបង្កហានិភ័យគ្រោះថ្នាក់ចរាចរណ៍ដល់អ្នកប្រើប្រាស់ផ្លូវជារៀងរាល់ថ្ងៃ។

ប្រជាពលរដ្ឋមួយចំនួនបានលើកឡើងថា ពួកគាត់មិនធ្លាប់ស្គាល់មុខ ឬបានឃើញលោក ឡូវ សុខសាន ចៅហ្វាយស្រុកកៀនស្វាយ ចុះពិនិត្យមើលស្ថានភាពផ្លូវនៅក្នុងមូលដ្ឋាននោះទេ ខណៈបញ្ហាផ្លូវខូចនៅតំបន់នេះបានអូសបន្លាយរយៈពេលយូរមកហើយ និងបង្កការលំបាកដល់ការធ្វើដំណើររបស់ប្រជាពលរដ្ឋយ៉ាងខ្លាំង។

ប្រជាពលរដ្ឋ សូមសំណូមពរដល់លោក ឡូវ សុខសាន ចៅហ្វាយស្រុកកៀនស្វាយ និងលោក បូរី វង្សសានិត្យ ប្រធានមន្ទីរសាធារណការ និងដឹកជញ្ជូនខេត្តកណ្ដាល មេត្តាចុះពិនិត្យស្ថានភាពជាក់ស្តែងនៅទីតាំងខាងលើ និងរៀបចំផែនការជួសជុលឱ្យបានឆាប់រហ័ស ដើម្បីធានាសុវត្ថិភាពជូនប្រជាពលរដ្ឋ និងបញ្ចៀសគ្រោះថ្នាក់ដែលអាចកើតមានជាយថាហេតុ។

ប្រជាពលរដ្ឋបានលើកឡើងទៀតថា ផ្លូវលេខ១១០ បច្ចុប្បន្នមានសភាពខ្ទេចខ្ទីយ៉ាងខ្លាំង ហើយប្រសិនបើមិនមានការយកចិត្តទុកដាក់ជួសជុលទាន់ពេលវេលាទេ នោះបញ្ហានឹងកាន់តែធ្ងន់ធ្ងរ និងអាចបណ្តាលឱ្យកើតមានគ្រោះថ្នាក់ជាញឹកញាប់។

គួររំលឹកផងដែរថា កាលពីពេលកន្លងមក សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រីនៃព្រះរាជាណាចក្រកម្ពុជា ធ្លាប់បានណែនាំជាបន្តបន្ទាប់ឱ្យអាជ្ញាធរថ្នាក់ក្រោមជាតិ ពិសេសអភិបាលរាជធានី-ខេត្ត អភិបាលក្រុង-ស្រុក-ខណ្ឌ ត្រូវចុះដល់មូលដ្ឋានជាប្រចាំ ដើម្បីស្វែងយល់ពីទុក្ខលំបាក និងដោះស្រាយបញ្ហាជាក់ស្តែងជូនប្រជាពលរដ្ឋឱ្យបានទាន់ពេលវេលា។

ជាក់ស្តែង នៅថ្ងៃទី៥ ខែមិថុនា ឆ្នាំ២០២៦ ស្ថានភាពផ្លូវនៅចំណុចខាងលើ ត្រូវបានប្រជាពលរដ្ឋអះអាងថា ពិតជាមានការខូចខាតយ៉ាងធ្ងន់ធ្ងរមែន ដែលទាមទារឱ្យមានការយកចិត្តទុកដាក់ និងអន្តរាគមន៍ជាបន្ទាន់ពីអាជ្ញាធរ និងមន្ត្រីជំនាញពាក់ព័ន្ធ។

ប្រជាពលរដ្ឋសង្ឃឹមថា សំណូមពរនេះនឹងត្រូវបានថ្នាក់ដឹកនាំពាក់ព័ន្ធយកចិត្តទុកដាក់ ដោយចាត់វិធានការចុះពិនិត្យ និងជួសជុលផ្លូវឱ្យបានឆាប់រហ័ស ដើម្បីលើកកម្ពស់សុវត្ថិភាព និងគុណភាពជីវិតរបស់ប្រជាពលរដ្ឋក្នុងមូលដ្ឋាន៕