រថយន្តដឹកខ្សាច់បង្កហានិភ័យដល់អ្នកដំណើរនៅក្បែរគល់ស្ពានព្រែកសំរោង! ពលរដ្ឋព្រួយបារម្ភពីសុវត្ថិភាព ខណៈអាជ្ញាធរហាក់ស្ងប់ស្ងាត់!

(កណ្ដាល)៖ សកម្មភាពដឹកជញ្ជូនខ្សាច់យ៉ាងមមាញឹកចេញពីដេប៉ូខ្សាច់មួយកន្លែងក្បែរគល់ស្ពានព្រែកសំរោង ស្ថិតក្នុងភូមិព្រែកសំរោង សង្កាត់តាខ្មៅ ក្រុងតាខ្មៅ ខេត្តកណ្ដាល កំពុងបង្កការព្រួយបារម្ភយ៉ាងខ្លាំងដល់ប្រជាពលរដ្ឋ និងអ្នកប្រើប្រាស់ផ្លូវសាធារណៈ។ រថយន្តធុនធំជាច្រើនគ្រឿងបានធ្វើចរាចរណ៍បន្តកន្ទុយគ្នា ខណៈខ្លះចតលើចិញ្ចើមផ្លូវ និងខ្លះទៀតចតបញ្ច្រាសទិស បង្កឱ្យផ្លូវរួមតូច និងបង្កើនហានិភ័យគ្រោះថ្នាក់ចរាចរណ៍ដល់អ្នកធ្វើដំណើរជារៀងរាល់ថ្ងៃ។

គួរបញ្ជាក់ថា កាលពីថ្ងៃទី០៧ ខែមេសា ឆ្នាំ២០២៦ រដ្ឋបាលខេត្តកណ្ដាលបានចេញសេចក្ដីជូនដំណឹងណែនាំដល់ម្ចាស់ដេប៉ូខ្សាច់ ថ្ម ម្ចាស់រថយន្តដឹកជញ្ជូន និងអាជីវករពាក់ព័ន្ធទាំងអស់នៅក្នុងភូមិសាស្ត្រក្រុងតាខ្មៅ ឱ្យអនុវត្តវិធានការយ៉ាងម៉ឺងម៉ាត់ ដើម្បីរក្សាសណ្ដាប់ធ្នាប់ សោភ័ណភាព និងសុវត្ថិភាពសាធារណៈ។ ក្នុងនោះ រដ្ឋបាលខេត្តបានតម្រូវឱ្យលាងសម្អាតផ្លូវឱ្យបានស្អាតជាប្រចាំ និងបានព្រមានថា ប្រសិនបើនៅតែបន្តឱ្យខ្សាច់ ឬថ្មជ្រុះប្រឡាក់ផ្លូវសាធារណៈ នឹងអាចប្រឈមនឹងការបិទអាជីវកម្មជាស្ថាពរ។

ទោះជាមានការណែនាំច្បាស់លាស់បែបនេះក៏ដោយ ប៉ុន្តែតាមការសង្កេតជាក់ស្ដែងនៅព្រឹកថ្ងៃទី០៤ ខែមិថុនា ឆ្នាំ២០២៦ រថយន្តដឹកខ្សាច់ជាច្រើនគ្រឿងនៅតែចតលយលើចិញ្ចើមផ្លូវសាធារណៈ និងមានរថយន្តធុនធំមួយចំនួនចតបញ្ច្រាសទិសនៅជាប់របងដេប៉ូ បង្កឱ្យចរាចរណ៍កាន់តែចង្អៀត និងគ្រោះថ្នាក់ ខណៈចំនួនអ្នកធ្វើដំណើរកំពុងមានការកើនឡើង។

អ្វីដែលមហាជនមើលឃើញថាជាបញ្ហាគួរឱ្យព្រួយបារម្ភបន្ថែមទៀតនោះ គឺមិនឃើញមានការលាងសម្អាតកង់រថយន្តមុនពេលចាកចេញពីដេប៉ូឡើយ។ ជាលទ្ធផល ខ្សាច់ដែលជាប់កង់រថយន្តបានធ្លាក់រាយប៉ាយលើផ្លូវ បង្កឱ្យមានធូលីហុយ ប៉ះពាល់ដល់បរិស្ថាន សុខភាពប្រជាពលរដ្ឋ និងបង្កហានិភ័យដល់អ្នកបើកបរម៉ូតូ និងយានយន្តផ្សេងៗ។

មហាជនបានលើកឡើងថា ស្ថានភាពដែលកំពុងកើតមាននេះ ហាក់ផ្ទុយពីខ្លឹមសារនៃសេចក្ដីណែនាំរបស់រដ្ឋបាលខេត្តកណ្ដាល និងស្មារតីនៃការគ្រប់គ្រងសណ្ដាប់ធ្នាប់សាធារណៈ។ ប្រសិនបើគ្មានការត្រួតពិនិត្យ និងអនុវត្តវិធានការច្បាប់ឱ្យបានម៉ឺងម៉ាត់ទេ នោះមិនត្រឹមតែប៉ះពាល់ដល់សុវត្ថិភាពរបស់ប្រជាពលរដ្ឋប៉ុណ្ណោះទេ ប៉ុន្តែថែមទាំងធ្វើឱ្យបាត់បង់ប្រសិទ្ធភាពនៃវិធានការរដ្ឋបាល និងបង្កជាគំរូមិនល្អដល់អាជីវកម្មផ្សេងៗទៀតផង។

ប្រជាពលរដ្ឋ និងអ្នកប្រើប្រាស់ផ្លូវ បានលើកជាសំណួរថា តើលោក ឃឹម សំភារ ចោហ្វាយក្រុងតាខ្មៅធ្វើអ្វី ហេតុអ្វីមិនចុះពិនិត្យឲ្យបានម៉ដ្ឋចត់ត្រឹមត្រូវ? ខណៈពួកគាត់សូមអំពាវនាវដល់រដ្ឋបាលខេត្តកណ្ដាល និងស្ថាប័នជំនាញពាក់ព័ន្ធ មេត្តាចុះពិនិត្យ និងចាត់វិធានការឱ្យបានទាន់ពេលវេលាលើដេប៉ូខ្សាច់ខាងលើ ដើម្បីធានាថា ការធ្វើអាជីវកម្មប្រព្រឹត្តទៅស្របតាមច្បាប់ និងមិនបង្កផលប៉ះពាល់ដល់សុវត្ថិភាពសាធារណៈ បរិស្ថាន និងសណ្ដាប់ធ្នាប់សង្គម។

ការអភិវឌ្ឍ និងការធ្វើអាជីវកម្មគឺជាកត្តាសំខាន់សម្រាប់សេដ្ឋកិច្ច ប៉ុន្តែការអភិវឌ្ឍនោះក៏ត្រូវអមដោយការទទួលខុសត្រូវចំពោះសង្គម ការគោរពច្បាប់ និងការយកចិត្តទុកដាក់ចំពោះសុវត្ថិភាពរបស់ប្រជាពលរដ្ឋផងដែរ៕