ង្រឹងសមត្ថភាពមន្ត្រីនគរបាល! ស្នងការដ្ឋានព្រៃវែងបើកវគ្គបំប៉នជំនាញសន្តិសុខ និងកសាងសំណុំរឿង

(ព្រៃវែង)៖ ដើម្បីពង្រឹងសមត្ថភាពវិជ្ជាជីវៈ និងលើកកម្ពស់ប្រសិទ្ធភាពការងាររបស់កម្លាំងនគរបាលក្នុងការស្រាវជ្រាវសន្តិសុខ និងកសាងសំណុំរឿង លោកឧត្តមសេនីយ៍ទោ ឈឿន ប៊ុនឆន ស្នងការនៃស្នងការដ្ឋាននគរបាលខេត្តព្រៃវែង បានអញ្ជើញចូលរួមជាអធិបតីក្នុងពិធីបើកវគ្គបំប៉នជំនាញពង្រឹងតួនាទីភារកិច្ចស្រាវជ្រាវការងារសន្តិសុខ និងវគ្គបំប៉នជំនាញកសាងសំណុំរឿង នៅស្នងការដ្ឋាននគរបាលខេត្តព្រៃវែង។

ពិធីបើកវគ្គបំប៉ននេះ បានប្រព្រឹត្តទៅនារសៀលថ្ងៃពុធ ទី២៩ ខែមេសា ឆ្នាំ២០២៦ ក្រោមអធិបតីភាពដ៏ខ្ពង់ខ្ពស់របស់ឯកឧត្តម ឧត្តមសេនីយ៍ឯក សាស្ត្រាចារ្យរង ឆេង ពន្លក គ្រូនគរបាលជាតិ ដោយមានការចូលរួមពីថ្នាក់ដឹកនាំ និងមន្ត្រីជំនាញពាក់ព័ន្ធជាច្រើនរូប។

ក្នុងកម្មវិធីនេះ មានការចូលរួមពីលោកឧត្តមសេនីយ៍ វរសេនីយ៍ស្នងការរងដែលពាក់ព័ន្ធ លោកនាយការិយាល័យទាំង៣០ លោកអធិការនគរបាលក្រុង-ស្រុកទាំង១៣ ព្រមទាំងលោកមេបញ្ជាការ និងនាយផ្នែកស៊ើបការនៃវរនគរបាលការពារព្រំដែនគោកលេខ៦០៧ រួមជាមួយនាយផ្នែកសន្តិសុខនៃអធិការដ្ឋាននគរបាលក្រុង-ស្រុកទាំង១៣ និងសិក្ខាកាមជាច្រើននាក់។

ក្នុងឱកាសនោះ ឯកឧត្តម ឆេង ពន្លក និងលោកឧត្តមសេនីយ៍ទោ ឈឿន ប៊ុនឆន បានធ្វើការចែករំលែកបទពិសោធន៍ការងារសំខាន់ៗ ពាក់ព័ន្ធនឹងនីតិវិធីច្បាប់ ការកសាងសំណុំរឿង ការកំណត់មុខសញ្ញាជនសង្ស័យ និងបច្ចេកទេសក្នុងការស្រាវជ្រាវសន្តិសុខ ដើម្បីឱ្យមន្ត្រីនគរបាលអាចយកទៅអនុវត្តបានប្រកបដោយប្រសិទ្ធភាព និងស្របតាមគោលការណ៍ច្បាប់។

ថ្នាក់ដឹកនាំក៏បានក្រើនរំលឹក និងដាស់តឿនដល់សិក្ខាកាមទាំងអស់ ឱ្យយកចិត្តទុកដាក់សិក្សារៀនសូត្រ ត្រងត្រាប់ស្ដាប់ និងខិតខំប្រឹងប្រែងអនុវត្តការងារឱ្យបានត្រឹមត្រូវតាមតួនាទីភារកិច្ចដែលថ្នាក់ដឹកនាំបានប្រគល់ជូន ដោយផ្តោតលើការងារឱ្យច្បាស់លាស់ ការសរសេរឯកសារឱ្យបានត្រឹមត្រូវ និងការកសាងសំណុំរឿងឱ្យមានភាពរឹងមាំ និងជាក់លាក់។

ជាពិសេស សិក្ខាកាមទាំងអស់ត្រូវបានលើកទឹកចិត្តឱ្យមានការដេញដោល សួរសំណួរ និងផ្លាស់ប្ដូរយោបល់ជាមួយគ្រូឧទ្ទេស និងថ្នាក់ដឹកនាំជំនាញ ដើម្បីស្វែងយល់ឱ្យបានស៊ីជម្រៅលើបញ្ហាពាក់ព័ន្ធនឹងការស៊ើបអង្កេត ការកសាងសំណុំរឿង និងការសរសេរកំណត់ហេតុបទល្មើសផ្សេងៗ។

ពិធីបើកវគ្គបំប៉ននេះ បានប្រព្រឹត្តទៅនៅសាលប្រជុំធំទួលបារាយណ៍អណ្ដែត នៃស្នងការដ្ឋាននគរបាលខេត្តព្រៃវែង ក្នុងគោលបំណងពង្រឹងធនធានមនុស្ស និងលើកកម្ពស់គុណភាពការងាររបស់កម្លាំងនគរបាលឱ្យកាន់តែមានប្រសិទ្ធភាព ក្នុងការបម្រើសន្តិសុខ សណ្តាប់ធ្នាប់ និងយុត្តិធម៌សង្គម៕