អាវុធហត្ថកំពង់ស្ពឺចុះអប់រំយុវជនជាង១,៥០០នាក់! បើកយុទ្ធនាការសហគមន៍គ្មានគ្រឿងញៀន គ្មានក្មេងទំនើង និងផ្សព្វផ្សាយលេខទូរស័ព្ទអន្តរាគមន៍បន្ទាន់Hotline 1292

(កំពង់ស្ពឺ)៖ ដើម្បីរួមចំណែកកសាងសហគមន៍មានសុវត្ថិភាព និងគ្មានគ្រឿងញៀន លោកឧត្តមសេនីយ៍ត្រី ម៉េង ស្រ៊ុន មេបញ្ជាការកងរាជអាវុធហត្ថខេត្តកំពង់ស្ពឺ បានដាក់បទបញ្ជាយ៉ាងម៉ឺងម៉ាត់ឱ្យកម្លាំងជំនាញ បន្តចុះផ្សព្វផ្សាយលើកកម្ពស់ការអប់រំដល់យុវជន ស្តីពីគ្រោះថ្នាក់នៃគ្រឿងញៀន បារីអេឡិចត្រូនិច ក្មេងទំនើង និងការប្រើប្រាស់លេខទូរស័ព្ទអន្តរាគមន៍សង្គ្រោះបន្ទាន់ Hotline 1292។

ជាក់ស្តែង នាព្រឹកថ្ងៃទី២៩ ខែមេសា ឆ្នាំ២០២៦ លោកវរសេនីយ៍ទោ ណុល ដារ៉ា ប្រធានមន្ទីរស្រាវជ្រាវ និងបង្ក្រាបបទល្មើស បានដឹកនាំកម្លាំងជំនាញកងរាជអាវុធហត្ថខេត្តកំពង់ស្ពឺ សហការជាមួយក្រុមការងារសហភាពសហព័ន្ធយុវជនខេត្ត ចុះអនុវត្តកម្មវិធីអប់រំផ្សព្វផ្សាយនៅវិទ្យាល័យ សម្ដេចឪ សម្ដេចម៉ែ ស្ថិតក្នុងភូមិតានួន ឃុំពោម្រាល ស្រុកបសេដ្ឋ ខេត្តកំពង់ស្ពឺ។

កម្មវិធីនេះ ទទួលបានការចូលរួមសហការយ៉ាងសកម្មពីគណៈគ្រប់គ្រងសាលា លោកគ្រូ អ្នកគ្រូ និងសិស្សានុសិស្សសរុបចំនួន ១,៥៥៥នាក់ ក្នុងនោះសិស្សស្រី ៨០៥នាក់ ដែលបង្ហាញពីការយកចិត្តទុកដាក់ខ្ពស់ចំពោះបញ្ហាសង្គម និងការពារអនាគតយុវជនពីគ្រោះថ្នាក់នៃគ្រឿងញៀន។

ក្នុងឱកាសនោះ លោកវរសេនីយ៍ទោ ណុល ដារ៉ា និងក្រុមការងារ បានធ្វើការពន្យល់យ៉ាងលម្អិតអំពីផលប៉ះពាល់ធ្ងន់ធ្ងរនៃគ្រឿងញៀន និងបារីអេឡិចត្រូនិច ដែលកំពុងក្លាយជាក្តីព្រួយបារម្ភសម្រាប់សង្គម ជាពិសេសក្នុងចំណោមយុវវ័យ។ ជាមួយគ្នានេះ ក៏បានអប់រំអំពីផលវិបាកនៃអំពើក្មេងទំនើង ដែលអាចបំផ្លាញអនាគត និងបង្កអសន្តិសុខក្នុងសហគមន៍។

លើសពីនេះ ក្រុមការងារក៏បានផ្សព្វផ្សាយអំពីការប្រើប្រាស់លេខទូរស័ព្ទអន្តរាគមន៍សង្គ្រោះបន្ទាន់ 1292 ដោយណែនាំពីរបៀបទំនាក់ទំនង និងអត្ថប្រយោជន៍ក្នុងការរាយការណ៍ព័ត៌មាន ឬសុំជំនួយបន្ទាន់ ដែលមានក្រុមការងារប្រចាំការទទួលបន្ទុក ២៤ម៉ោងលើ២៤ម៉ោង នៅមណ្ឌលប្រតិបត្តិការ បញ្ជាការដ្ឋានកងរាជអាវុធហត្ថខេត្តកំពង់ស្ពឺ។

សកម្មភាពនេះ ត្រូវបានចាត់ទុកថាជាផ្នែកមួយនៃយុទ្ធនាការពង្រឹងការអប់រំ និងការពារយុវជន ឱ្យឆ្ងាយពីគ្រឿងញៀន និងអំពើហិង្សា ដើម្បីរួមគ្នាកសាងសហគមន៍ស្អាតស្អំ និងមានសន្តិសុខប្រកបដោយចីរភាព៕