ផ្លូវបេតុងខ្ទេចខ្ទីក្រោមភ្នែកអាជ្ញាធរ ប្រជាពលរដ្ឋរស់ក្នុងទុក្ខវេទនា ការគ្រប់គ្រងបរាជ័យ ឬមិនអើពើ?
(កណ្ដាល)៖ ប្រជាពលរដ្ឋរស់នៅតាមបណ្តោយផ្លូវបេតុងមួយខ្សែ នៅភូមិលៀក ឃុំគោកត្រប់ ស្រុកកណ្ដាលស្ទឹង ខេត្តកណ្ដាល កំពុងរងផលប៉ះពាល់យ៉ាងធ្ងន់ធ្ងរ ទាំងផ្លូវជីវភាព និងផ្លូវអារម្មណ៍ ដោយសារសកម្មភាពដឹកជញ្ជូនដីគ្មានការគ្រប់គ្រងត្រឹមត្រូវ។
តាមការបញ្ជាក់ពីប្រជាពលរដ្ឋនៅថ្ងៃទី២៩ ខែមេសា ឆ្នាំ២០២៦ បានឲ្យដឹងថា ក្នុងរដូវប្រាំង ផ្លូវហុយធូលីឡើងងងឹតមេឃ បង្កការលំបាកក្នុងការដកដង្ហើម និងប៉ះពាល់ដល់សុខភាព ខណៈនៅរដូវវស្សា ផ្លូវបែកភក់ជ្រាបទឹក ក្លាយជាអន្ទាក់គ្រោះថ្នាក់សម្រាប់អ្នកធ្វើដំណើរ។ បញ្ហានេះមិនមែនកើតឡើងបណ្ដោះអាសន្នទេ ប៉ុន្តែបន្តយូរមកហើយដោយគ្មានដំណោះស្រាយច្បាស់លាស់។
ប្រភពដដែលបន្តថា រាល់ថ្ងៃមានឡានរាប់រយគ្រឿង ជាពិសេសប្រភេទយីឌុប ធ្វើចរាចរណ៍ដឹកដីឆ្លងកាត់ផ្លូវនេះ ដោយគ្មានការកំណត់ទម្ងន់ ឬការគ្រប់គ្រងត្រឹមត្រូវ។ ផ្លូវបេតុងដែលធ្លាប់មានស្ថានភាពល្អ បច្ចុប្បន្នត្រូវបានបំផ្លាញខ្ទេចខ្ទី ស្ទើរតែមិនអាចប្រើប្រាស់បាន។ ដីដែលដឹកនោះ ត្រូវបានយកទៅចាក់នៅតំបន់ទួលពង្រ ខណ្ឌដង្កោ រាជធានីភ្នំពេញ និងមួយចំនួនទៅតាមបណ្តោយផ្លូវជាតិលេខ២។
បញ្ហានេះកំពុងបង្កសំណួរយ៉ាងខ្លាំងចំពោះតួនាទី និងការទទួលខុសត្រូវរបស់អាជ្ញាធរពាក់ព័ន្ធ ជាពិសេសក្រោមការដឹកនាំរបស់លោក អ៊ូច សៅវឿន ចៅហ្វាយស្រុកកណ្ដាលស្ទឹង និងលោក បូរី វង្សសានិត្យ ប្រធានមន្ទីរសាធារណការ និងដឹកជញ្ជូន ខេត្តកណ្តាល។ ការខូចខាតផ្លូវសាធារណៈដល់កម្រិតនេះ មិនអាចកើតឡើងបានឡើយ ប្រសិនបើមានការត្រួតពិនិត្យ និងអនុវត្តច្បាប់យ៉ាងតឹងរឹង។
តាមគោលការណ៍ច្បាប់ និងបទប្បញ្ញត្តិពាក់ព័ន្ធនឹងការដឹកជញ្ជូនលើសទម្ងន់ យានយន្តគ្រប់ប្រភេទត្រូវគោរពតាមកម្រិតទម្ងន់ដែលបានកំណត់ និងមិនអាចបង្កការខូចខាតដល់ហេដ្ឋារចនាសម្ព័ន្ធសាធារណៈបានឡើយ។ ករណីរំលោភ អាចនាំឲ្យមានទណ្ឌកម្ម រួមទាំងការផាកពិន័យ ការផ្អាកប្រតិបត្តិការ និងការទាមទារជួសជុលសំណងវិញ។
លើសពីនេះ បញ្ហានេះក៏បង្ហាញពីភាពខ្សោយក្នុងការសម្របសម្រួលរវាងអាជ្ញាធរមូលដ្ឋាន និងមន្ទីរជំនាញ ដែលបណ្ដាលឲ្យមានការប្រើប្រាស់ផ្លូវសាធារណៈដោយគ្មានស្តង់ដារ និងគ្មានការទទួលខុសត្រូវច្បាស់លាស់។
ក្នុងន័យនេះ ប្រជាពលរដ្ឋសូមអំពាវនាវយ៉ាងទទូចដល់លោក សេង ឈួន រដ្ឋលេខាធិការ ក្រសួងសាធារណការ និងដឹកជញ្ជូន និងជាប្រធានក្រុមការងារត្រួតពិនិត្យយានយន្តលើសទម្ងន់ ព្រមទាំងលោក ប៉េង ពោធិ៍នា រដ្ឋមន្រ្តីក្រសួងសាធារណការ និងដឹកជញ្ជូន មេត្តាចាត់វិធានការបន្ទាន់ ដើម្បីបង្ក្រាបសកម្មភាពដឹកជញ្ជូនលើសទម្ងន់ និងស្តារផ្លូវដែលបានខូចខាតឡើងវិញ។
ការអភិវឌ្ឍមិនគួរត្រូវបានសម្រេចលើការបំផ្លាញហេដ្ឋារចនាសម្ព័ន្ធ និងការលំបាករបស់ប្រជាពលរដ្ឋទេ។ ប្រសិនបើមិនមានវិធានការបន្ទាន់ ស្ថានភាពនេះនឹងបន្តធ្វើឲ្យបាត់បង់ទាំងទ្រព្យសម្បត្តិសាធារណៈ និងទំនុកចិត្តរបស់ប្រជាពលរដ្ឋចំពោះអាជ្ញាធរ៕
