សំណង់ភូមិគ្រឹះសង្ស័យអត់ច្បាប់នៅអង្គស្នួល ខណៈអាជ្ញាធរមិនទាន់បំភ្លឺច្បាស់លាស់!

(កណ្ដាល)៖ ករណីសំណង់ភូមិគ្រឹះសង្ស័យអត់ច្បាប់មួយកន្លែង ស្ថិតនៅឈៀងទល់មុខមណ្ឌលសុខភាពព្រៃពួច ភូមិសល់ដី ឃុំព្រៃពួច ស្រុកអង្គស្នួល ខេត្តកណ្ដាល កំពុងបង្កការព្រួយបារម្ភពីសំណាក់ប្រជាពលរដ្ឋក្នុងតំបន់ ពាក់ព័ន្ធនឹងប្រសិទ្ធភាពនៃការគ្រប់គ្រង និងអនុវត្តច្បាប់របស់អាជ្ញាធរមូលដ្ឋាន។

តាមការសង្កេតជាក់ស្តែង សំណង់នេះមានទំហំធំ និងកំពុងសាងសង់យ៉ាងសកម្ម ប៉ុន្តែបង្កើតឲ្យមានចម្ងល់ថា តើមានច្បាប់អនុញ្ញាតត្រឹមត្រូវដែរឬទេ? ប្រជាពលរដ្ឋបានលើកឡើងថា ប្រសិនបើសំណង់នេះគ្មានច្បាប់ នោះវាមិនគួរត្រូវបានអនុញ្ញាតឱ្យសាងសង់ដល់ដំណាក់កាលបច្ចុប្បន្នឡើយ ប្រសិនបើមានការត្រួតពិនិត្យយ៉ាងតឹងរឹង និងទាន់ពេលវេលា។

ក្រោមការដឹកនាំរបស់លោក នូ សុវណ្ណារិទ្ធិ អភិបាលស្រុកអង្គស្នួល និងការត្រួតពិនិត្យការងារដោយលោក តាំង ម៉េងលាង អភិបាលរងខេត្តកណ្ដាល ប្រជាពលរដ្ឋបានលើកសំណួរថា តើមានវិធានការណ៍អ្វីខ្លះត្រូវបានអនុវត្ត ដើម្បីទប់ស្កាត់សំណង់អត់ច្បាប់ និងធានាឱ្យមានការអនុវត្តច្បាប់ដោយតម្លាភាព និងស្មើភាព?

ការមើលរំលង ឬអនុវត្តច្បាប់មិនស្មើភាព អាចបង្កើតជាគំរូអវិជ្ជមានក្នុងសង្គម បណ្ដាលឱ្យបាត់បង់ជំនឿរបស់ប្រជាពលរដ្ឋលើអាជ្ញាធរ។ លើសពីនេះ ករណីសំណង់សង្ស័យអត់ច្បាប់មិនត្រឹមតែប៉ះពាល់ដល់របៀបរៀបរយសាធារណៈប៉ុណ្ណោះទេ ប៉ុន្តែអាចនាំឱ្យកើតមានហានិភ័យផ្នែកសុវត្ថិភាព បរិស្ថាន និងគុណភាពជីវិតរបស់ប្រជាពលរដ្ឋនៅជុំវិញផងដែរ។

សាធារណជនបានលើកឡើងថា ការអនុញ្ញាតឱ្យសំណង់សង្ស័យអត់ច្បាប់បន្តដំណើរការ ដោយគ្មានការបង្ហាញវិធានការច្បាស់លាស់ អាចបង្កើតការសង្ស័យពីប្រសិទ្ធភាពនៃការអនុវត្តច្បាប់ និងប៉ះពាល់ដល់គោលការណ៍ស្មើភាពក្នុងសង្គម។

យ៉ាងណាក៏ដោយ ព័ត៌មានពីមន្ត្រីពាក់ព័ន្ធមិនទាន់មានភាពច្បាស់លាស់នៅឡើយ ដោយមិនអាចសុំការបំភ្លឺពីលោក តាំង ម៉េងលាង អភិបាលរងខេត្តកណ្ដាលទទួលបន្ទុកសំណង់ លោក នូ សុវណ្ណារិទ្ធិ អភិបាលស្រុកអង្គស្នួល និងលោក រស់ រ៉ុម អភិបាលរងស្រុកទទួលបន្ទុកសំណង់បាននៅឡើយ។ ខណៈដែលលោក ស៊ិន សាវី នាយករដ្ឋបាលសាលាស្រុកអង្គស្នួល បានបញ្ជាក់ថា លោកមិនបានដឹងអំពីករណីនេះទេ ហើយបានឲ្យដឹងថាការងារសំណង់ត្រូវបានប្រគល់ឲ្យលោក រស់ រ៉ុម ជាអ្នកទទួលបន្ទុក។

មហាជនបានលើកឡើងទៀតថា អាជ្ញាធរពាក់ព័ន្ធគួរត្រូវចុះពិនិត្យជាក់ស្តែង បង្ហាញព័ត៌មានជាសាធារណៈ និងអនុវត្តវិធានការតាមច្បាប់ដោយតឹងរឹង ប្រសិនបើរកឃើញការបំពានពិតប្រាកដ។ ការអនុវត្តច្បាប់ដោយយុត្តិធម៌ តម្លាភាព និងគ្មានអភ័យឯកសិទ្ធិ គឺជាគន្លឹះសម្រាប់ការពាររបៀបរៀបរយសង្គម និងរក្សាទុកជំនឿរបស់ប្រជាពលរដ្ឋក្នុងដំណើរការអភិវឌ្ឍន៍ប្រកបដោយចីរភាព៕