ឯកឧត្តម នាយឧត្តមសេនីយ៍ ឈន សារ៉ាណេ អញ្ជើញចូលរួមពិធីសូត្រមន្តបង្សុកូល ១០៨អង្គ បង្ហាញសាមគ្គីភាពក្នុងឱកាសចូលឆ្នាំថ្មី

(ភ្នំពេញ)៖ ឯកឧត្តម នាយឧត្តមសេនីយ៍ ឈន សារ៉ាណេ អនុរដ្ឋលេខាធិការ ក្រសួងមហាផ្ទៃ នៅថ្ងៃអង្គារទី២១ ខែមេសា ឆ្នាំ២០២៦ បានអញ្ជើញចូលរួមក្នុងពិធីសូត្រមន្ត បង្សុកូល និងរាប់បាត្រព្រះសង្ឃចំនួន ១០៨អង្គ ក្នុងឱកាសបុណ្យចូលឆ្នាំថ្មី ប្រពៃណីជាតិខ្មែរ ឆ្នាំមមី អដ្ឋស័ក ពុទ្ធសករាជ ២៥៧០ គ្រឹស្តសករាជ ២០២៦។

ពិធីបុណ្យដ៏មានអត្ថន័យនេះ បានប្រារព្ធឡើងក្រោមអធិបតីភាពដ៏ខ្ពង់ខ្ពស់ ឯកឧត្តមអគ្គិសន្តិបណ្ឌិត ស សុខា ឧបនាយករដ្ឋមន្ត្រី និងរដ្ឋមន្ត្រីក្រសួងមហាផ្ទៃ ព្រមទាំងលោកជំទាវ កែ សួនសុភី ស សុខា នៅទីស្តីការក្រសួងមហាផ្ទៃ។

ពិធីសាសនានេះ ត្រូវបានចាត់ទុកថាជាសកម្មភាពប្រពៃណីដ៏សំខាន់មួយ ដែលបង្ហាញពីការគោរពព្រះពុទ្ធសាសនា និងការរក្សាទំនៀមទម្លាប់ខ្មែរ ក្នុងឱកាសចូលឆ្នាំថ្មី ដោយជំរុញឲ្យមានសាមគ្គីភាព សន្តិភាព និងសេចក្តីសុខក្នុងសង្គម។

ពិធីបែបនេះ ក៏ជាឱកាសល្អក្នុងការពង្រឹងតម្លៃវប្បធម៌ជាតិ និងលើកកម្ពស់ស្មារតីសង្គមឲ្យកាន់តែរឹងមាំ ខណៈដែលមន្រ្តីរដ្ឋ និងប្រជាពលរដ្ឋអាចចូលរួមជាមួយគ្នាក្នុងស្មារតីរួមសុខរួមទុក្ខ និងគោរពប្រពៃណីដូនតា៕