បង្គាប់ឃុំខ្លួនជនត្រូវចោទ១៨នាក់ ករណីឆបោកអនឡាញនៅភ្នំពេញ តុលាការចាត់វិធានការតឹងរឹង

(ភ្នំពេញ)៖ លោក ហុក ពៅ ចៅក្រមស៊ើបសួរនៃសាលាដំបូងរាជធានីភ្នំពេញ បានចេញដីកាចំនួន ១៨ ផ្សេងគ្នា បង្គាប់ឱ្យឃុំខ្លួនជនត្រូវចោទចំនួន ១៨នាក់ ពាក់ព័ន្ធនឹងអំពើឆបោកតាមប្រព័ន្ធបច្ចេកវិទ្យា ដែលបានប្រព្រឹត្តនៅក្នុងរាជធានីភ្នំពេញ។

យោងតាមដីកាចុះថ្ងៃទី០១ ខែមេសា ឆ្នាំ២០២៦ ជនត្រូវចោទទាំងនេះ ត្រូវបានដាក់ឱ្យស្ថិតក្រោមការពិនិត្យពីបទ «ឆបោកមានស្ថានទម្ងន់ទោស ជាក្រុមមានការចាត់តាំង» តាមបញ្ញត្តិមាត្រា ៣៧៧ និងមាត្រា ៣៨០ ចំណុច ៥ នៃក្រមព្រហ្មទណ្ឌ ដែលអាចប្រឈមនឹងទោសពន្ធនាគារពី ២ឆ្នាំ ទៅ៥ឆ្នាំ។

ប្រភពព័ត៌មានបានបញ្ជាក់ថា ក្នុងចំណោមជនត្រូវចោទទាំង ១៨នាក់ មានជនជាតិចិន ១៤នាក់ ម៉ាឡេស៊ី ២នាក់ មីយ៉ាន់ម៉ា ១នាក់ និងជនជាតិខ្មែរ ១នាក់ ដែលភាគច្រើនស្នាក់នៅ និងបំពេញសកម្មភាពនៅក្នុងសណ្ឋាគារ «ជីនបៀនមេនឌូ» ស្ថិតនៅផ្លូវលេខ ១០១៩ ភូមិទ្រុងមាន់ សង្កាត់អូបែកក្អម ខណ្ឌសែនសុខ ទីតាំងដែលសមត្ថកិច្ចធ្លាប់បើកប្រតិបត្តិការបង្ក្រាបកន្លងមក។

ជនត្រូវចោទទាំងអស់ ត្រូវបានបង្គាប់ឱ្យឃុំខ្លួនបណ្តោះអាសន្ន ដើម្បីរង់ចាំនីតិវិធីតុលាការ ដោយបុរសត្រូវបានបញ្ជូនទៅមណ្ឌលអប់រំកែប្រែទី១ (ម១) ខណៈស្ត្រីត្រូវបានឃុំខ្លួននៅមណ្ឌលអប់រំកែប្រែទី២ (ម២)។

គួរបញ្ជាក់ថា ចាប់ពីខែកក្កដា ឆ្នាំ២០២៥ ដល់ខែមីនា ឆ្នាំ២០២៦ ក្នុងរយៈពេល ៩ ខែចុងក្រោយ សមត្ថកិច្ចកម្ពុជា បានបង្ក្រាបអំពើឆបោកតាមប្រព័ន្ធបច្ចេកវិទ្យាជាង ២៥០ ករណី និងបញ្ជូនសំណុំរឿងទៅតុលាការចំនួន ៨០ ករណី ពាក់ព័ន្ធជនសង្ស័យប្រមាណ ៧៥០នាក់ ដែលមានជនជាតិចម្រុះ។

ជាមួយគ្នានេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបញ្ជាក់យ៉ាងច្បាស់ថា កម្ពុជាមិនមែនជាទីកន្លែងសម្រាប់ឧក្រិដ្ឋជនបច្ចេកវិទ្យា ឬសកម្មភាពឆបោកឆ្លងដែនឡើយ ហើយបុគ្គលណាដែលពាក់ព័ន្ធ នឹងត្រូវប្រឈមមុខនឹងទោសទណ្ឌតាមច្បាប់យ៉ាងតឹងរឹង ដោយគ្មានការយោគយល់។

អាជ្ញាធរបញ្ជាក់ថា វិធានការដែលកំពុងអនុវត្តយ៉ាងតឹងរ៉ឹងនេះ មានគោលដៅបង្ក្រាប និងលុបបំបាត់បទល្មើសឆបោកតាមប្រព័ន្ធបច្ចេកវិទ្យាឱ្យបានជោគជ័យនៅពេលខាងមុខ៕