ក្តៅៗពីមណ្ឌលគិរី! បង្ក្រាបបទល្មើសព្រៃឈើជាបន្តបន្ទាប់ ខណៈអាជ្ញាធរជំរុញ “ភាពបៃតង” ឈានទៅអព្យាក្រឹតកាបូន ២០៥០

(មណ្ឌលគិរី)៖ មន្ទីរបរិស្ថានខេត្តមណ្ឌលគិរី កំពុងបន្តអនុវត្តយុទ្ធសាស្ត្រចក្រាវិស័យបរិស្ថាន ដោយផ្តោតលើ “ភាពស្អាត ភាពបៃតង និងចីរភាព” ស្របតាមអនុសាសន៍របស់ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន ដែលបានណែនាំឲ្យពង្រឹងការអភិរក្សធនធានធម្មជាតិ និងលើកកម្ពស់សុខុមាលភាពសង្គម។

ជាក់ស្តែង នៅថ្ងៃទី០១ ខែមេសា ឆ្នាំ២០២៦ កម្លាំងជំនាញបានចុះអនុវត្តវិធានការបង្ក្រាបបទល្មើសព្រៃឈើបានចំនួន២ករណីជាបន្តបន្ទាប់។

ករណីទី១ សមត្ថកិច្ចបានឃាត់ចាប់រថយន្ត Lexus 470 ពណ៌ស ១គ្រឿង រួមជាមួយឈើសុក្រំចំនួន ១១វង់ នៅភូមិស្រែអ៊ី សង្កាត់រមនា ក្រុងសែនមនោរម្យ។

ខណៈករណីទី២ បានឃាត់ចាប់គោយន្តចង្កូតកណ្តាល ១គ្រឿង និងជន្លុងម្រេច (ផ្ចឹក) ចំនួន ៤០ ជន្លុង នៅភូមិពូក្រូច ឃុំស្រែអំពូម ស្រុកពេជ្រាដា។

មិនត្រឹមតែបង្ក្រាបបទល្មើសប៉ុណ្ណោះទេ មន្ត្រីឧទ្យានុរក្សនៃដែនជម្រកសត្វព្រៃស្រែពក ក៏បានបន្តការងារដាំស្តារព្រៃឈើយ៉ាងសកម្ម ដោយបានច្រកដីថង់ និងស្ទូងកូនឈើសរុបជាង ១,៥០០ ដើម ក្នុងនោះរួមមាន កូនកកោះ ៨៤៨ ដើម និងកូនបេង ៦៨២ ដើម ដើម្បីពង្រឹងគម្របព្រៃ និងបង្កើនសមត្ថភាពធនធានធម្មជាតិឲ្យមានភាពធន់។

មន្ទីរបរិស្ថានខេត្តមណ្ឌលគិរី ក៏បានអំពាវនាវដល់ប្រជាពលរដ្ឋទូទៅ ឲ្យចូលរួមការពារធនធានធម្មជាតិ កាត់បន្ថយសកម្មភាពបំផ្លាញព្រៃឈើ និងគាំទ្រការអភិវឌ្ឍន៍ទេសចរណ៍ធម្មជាតិ (Eco-tourism) ដើម្បីរួមចំណែកកសាងបរិស្ថានស្អាត បៃតង មានចីរភាព និងឈានទៅសម្រេចគោលដៅអព្យាក្រឹតកាបូននៅឆ្នាំ២០៥០៕