ឯកឧត្តម គីម រិទ្ធី ដឹកនាំកិច្ចសហប្រតិបត្តិការព្រំដែនកម្ពុជា-វៀតណាម ដំណាក់កាល ២០២៦-២០៣០

(ព្រះវិហារ)៖ ឯកឧត្តម គីម រិទ្ធី អភិបាលខេត្តព្រះវិហារ នៅ​ថ្ងៃទី២៩ ខែមិនា ឆ្នាំ២០២៦នេះ បានដឹកនាំប្រតិភូអញ្ជើញចូលរួមក្នុងកិច្ចប្រជុំ និងពិធីចុះហត្ថលេខាលើអនុស្សារណៈយោគយល់គ្នា រវាងខេត្តព្រះវិហារ ខេត្តស្ទឹងត្រែង និងខេត្តរតនគីរី នៃកម្ពុជា ជាមួយខេត្តយ៉ាឡាយ សាធារណរដ្ឋសង្គមនិយមវៀតណាម នៅសាលសន្និសីទនៃគណៈកម្មាធិការប្រជាជនខេត្តយ៉ាឡាយ។

កិច្ចសហប្រតិបត្តិការនេះ ផ្តោតលើវិស័យអាទិភាពចម្បង រួមមាន៖ ការរក្សាសន្តិសុខតាមខ្សែបន្ទាត់ព្រំដែន ការបង្ក្រាបបទល្មើសឆ្លងដែន ការអភិវឌ្ឍកសិកម្ម និងពាណិជ្ជកម្ម ការផ្លាស់ប្តូរបទពិសោធន៍ និងការបណ្តុះបណ្តាលធនធានមនុស្ស ផ្សព្វផ្សាយទេសចរណ៍ និងសហការក្នុងការព្យាបាលជំងឺតាមតំបន់ព្រំដែន។

ភាគីទាំងអស់បានវាយតម្លៃខ្ពស់ចំពោះសមិទ្ធផលក្នុងដំណាក់កាលកន្លងមក និងប្តេជ្ញាចិត្តរួមគ្នា បន្តរឹតចំណងសាមគ្គីភាព មិត្តភាព និងសហប្រតិបត្តិការឱ្យកាន់តែរឹងមាំ ដើម្បីនាំមកនូវផលប្រយោជន៍ជូនប្រជាជន និងជួយជំរុញកំណើនសេដ្ឋកិច្ចក្នុងតំបន់៕