ជូនដំណើរកម្លាំងថ្មី! អាវុធហត្ថកំពង់ស្ពឺបណ្តុះបណ្តាលយុវជនជាឆ្អឹងខ្នងសន្តិសុខជាតិ!

(កំពង់ស្ពឺ)៖ កម្លាំងថ្មី គឺជាថាមពលថ្មី។ ការហ្វឹកហ្វឺនល្អ គឺជាគន្លឹះនៃសន្តិសុខរឹងមាំ។ នេះជាសារសំខាន់ដែលត្រូវបានបញ្ជាក់យ៉ាងច្បាស់ ក្នុងពិធីសំណេះសំណាល និងជូនដំណើរយោធិនថ្មី របស់កងរាជអាវុធហត្ថខេត្តកំពង់ស្ពឺ។

នៅព្រឹកថ្ងៃទី២៣ ខែមីនា ឆ្នាំ២០២៦ លោកឧត្តមសេនីយ៍ត្រី ម៉េង ស្រ៊ុន មេបញ្ជាការ កងរាជអាវុធហត្ថខេត្តកំពង់ស្ពឺបានដឹកនាំរៀបចំពិធីសំណេះសំណាល និងជូនដំណើរយោធិនទើបជ្រើសរើសថ្មី (ជាប់ជាស្ថាពរ) ឲ្យចូលទៅហ្វឹកហ្វឺននៅវិទ្យាស្ថានកងរាជអាវុធហត្ថ (កំបូល) ក្រោមអធិបតីភាពលោកបណ្ឌិត ជាម ចន្ទ័សោភ័ណ អភិបាលខេត្តកំពង់ស្ពឺ។

ក្នុងបរិយាកាសពោរពេញដោយក្តីសង្ឃឹម និងក្តីមោទនភាព លោកឧត្តមសេនីយ៍ត្រី ម៉េង ស្រ៊ុន បានលើកឡើងថា៖ «យោធិនថ្មីទាំងអស់ ត្រូវតស៊ូអត់ធ្មត់ ខិតខំរៀនសូត្រ ហ្វឹកហ្វឺនឲ្យបានម៉ឺងម៉ាត់ គោរពវិន័យ និងបទបញ្ជាផ្ទៃក្នុងសាលា ដើម្បីក្លាយជាកងកម្លាំងមានគុណភាព និងសមត្ថភាពពិតប្រាកដ»។

លោកឧត្តមសេនីយ៍ក៏បានបញ្ជាក់បន្ថែមថា កងរាជអាវុធហត្ថខេត្តកំពង់ស្ពឺតែងតែបំពេញតួនាទីយ៉ាងសកម្ម ក្នុងការពារសន្តិសុខសង្គម និងសុវត្ថិភាពប្រជាពលរដ្ឋ ព្រមទាំងបានណែនាំអំពីសារៈសំខាន់នៃលេខអន្តរាគមន៍ «1292» ដែលជាឧបករណ៍សម្រាប់ប្រជាពលរដ្ឋសុំជំនួយបានទាន់ពេលវេលា។

ជាមួយគ្នានេះ លោកបណ្ឌិត ជាម ចន្ទ័សោភ័ណ អភិបាលខេត្តកំពង់ស្ពឺ ក៏បានផ្តល់អនុសាសន៍ដ៏មានន័យជ្រាលជ្រៅ ដល់យោធិនថ្មីទាំងអស់ថា៖ «ក្មួយៗត្រូវខិតខំរៀនសូត្រ បំពេញភារកិច្ចហ្វឹកហ្វឺនឲ្យបានជោគជ័យ និងគោរពច្បាប់វិន័យយោធា ដើម្បីអភិវឌ្ឍខ្លួនឯងឲ្យក្លាយជាធនធានមនុស្សល្អសម្រាប់សង្គមជាតិ»។

លោកបណ្ឌិតអភិបាលខេត្តក៏បានសង្កត់ធ្ងន់ថា យោធិនថ្មីទាំងនេះ គឺជាកម្លាំងស្នូល និងជាឆ្អឹងខ្នងនៃសន្តិសុខជាតិ ដែលនឹងចូលរួមធ្វើឲ្យប្រទេសមានសន្តិភាព និងការរីកចម្រើនបន្តទៅមុខ។

នៅក្នុងកម្មវិធីនោះផងដែរ លោកអភិបាលខេត្ត និងលោកមេបញ្ជាការក៏បានប្រគល់អំណោយលើកទឹកចិត្ត ដល់យោធិនថ្មីម្នាក់ៗ រួមមាន៖ ថវិកា ៨០,០០០រៀល អាវរងារ មី និងទឹកបរិសុទ្ធ ដើម្បីជួយសម្រួលជីវភាពក្នុងអំឡុងពេលហ្វឹកហ្វឺន។

គួរជម្រាបផងដែរថា ការចាប់ផ្តើមថ្ងៃនេះ មិនមែនគ្រាន់តែជាការចូលរៀនហ្វឹកហ្វឺនទេ ប៉ុន្តែជាជំហានដំបូង នៃការបង្កើត “អ្នកការពារជាតិ” នៅថ្ងៃអនាគត៕