អគ្គិសនីកម្ពុជាអំពាវនាវឱ្យប្រើភ្លើងមានវិចារណញាណ ក្នុងស្ថានភាពប្រេងឡើងថ្លៃ!

(ភ្នំពេញ)៖ អនុវត្តតាមសារាចរណែនាំរបស់រាជរដ្ឋាភិបាលកម្ពុជា អគ្គិសនីកម្ពុជា បានអំពាវនាវដល់ប្រជាពលរដ្ឋទូទាំងប្រទេស ឱ្យចូលរួមសន្សំសំចៃការប្រើប្រាស់ថាមពលអគ្គិសនី ខណៈតម្លៃប្រេងឥន្ធនៈសកលកំពុងកើនឡើង និងអាកាសធាតុក្តៅកំពុងបន្តរំខាន។

ការអំពាវនាវនេះ មិនត្រឹមតែជាការឆ្លើយតបនឹងវិបត្តិបច្ចុប្បន្នប៉ុណ្ណោះទេ ប៉ុន្តែថែមទាំងជាវិធានការសំខាន់ ក្នុងការកាត់បន្ថយចំណាយទាំងជាតិ និងបុគ្គលផងដែរ។

អគ្គិសនីកម្ពុជាបានណែនាំឱ្យអនុវត្តវិធានការសាមញ្ញៗ ប៉ុន្តែមានប្រសិទ្ធភាពខ្ពស់ ដូចជា ត្រួតពិនិត្យ និងថែទាំឧបករណ៍អគ្គិសនីឱ្យបានត្រឹមត្រូវ បិទភ្លើង និងម៉ាស៊ីនត្រជាក់ពេលមិនប្រើ កំណត់សីតុណ្ហភាពម៉ាស៊ីនត្រជាក់ចាប់ពី ២៤°C ឡើងទៅ និងដកឌុយឧបករណ៍ពេលមិនប្រើប្រាស់។

ជាពិសេស ការជ្រើសរើសឧបករណ៍មានប្រសិទ្ធភាពខ្ពស់ និងការបិទទ្វារ-បង្អួចឱ្យជិតល្អ ពេលបើកម៉ាស៊ីនត្រជាក់ ក៏ជាចំណុចសំខាន់ក្នុងការកាត់បន្ថយការប្រើថាមពលផងដែរ។

មិនត្រឹមតែប្រជាពលរដ្ឋទេ ស្ថាប័នអគ្គិសនីកម្ពុជាផ្ទាល់ ក៏បានដាក់ចេញវិធានការផ្ទៃក្នុង ដោយណែនាំឱ្យមន្ត្រី និងបុគ្គលិក ប្រើប្រាស់ថាមពល និងប្រេងឥន្ធនៈយ៉ាងប្រុងប្រយ័ត្ន កាត់បន្ថយការធ្វើដំណើរមិនចាំបាច់ និងលើកទឹកចិត្តប្រជុំតាមអនឡាញ។

អគ្គិសនីកម្ពុជាសង្ឃឹមថា ស្មារតីចូលរួមពីសាធារណជន នឹងក្លាយជាកម្លាំងរួមដ៏មានអត្ថន័យ ក្នុងការប្រឈមមុខនឹងស្ថានភាពលំបាកនេះ ខណៈការសន្សំថ្ងៃនេះ គឺជាការពារថ្ងៃស្អែក៕