លោកឧត្តមសេនីយ៍ទោ សិទ្ធិ ឡោះ ទទួលភារកិច្ចថ្មីជានាយករងខុទ្ទកាល័យឯកឧត្តម ស សុខា

(ភ្នំពេញ)៖ ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ បានសម្រេចតែងតាំង លោកឧត្តមសេនីយ៍ទោ សិទ្ធិ ឡោះ ឲ្យកាន់តំណែងជា «នាយករងខុទ្ទកាល័យ» របស់ឯកឧត្តមអភិសន្តិបណ្ឌិត ស សុខា បន្ថែមលើមុខងារបច្ចុប្បន្ន។

សេចក្ដីសម្រេចក៏បានបញ្ជាក់ឲ្យអង្គភាពពាក់ព័ន្ធទាំងអស់ក្រោមក្រសួងមហាផ្ទៃ អនុវត្តភារកិច្ចនេះឲ្យមានប្រសិទ្ធភាព ចាប់ពីថ្ងៃចុះហត្ថលេខាតទៅ ដើម្បីធានាបាននូវការបំពេញការងារដោយរលូន និងមានប្រសិទ្ធភាពខ្ពស់។

ការតែងតាំងនេះ ត្រូវបានចាត់ទុកថា ជាជំហានសំខាន់មួយក្នុងការពង្រឹងរចនាសម្ព័ន្ធ និងសមត្ថភាពដឹកនាំក្នុងជួរនគរបាលជាតិ ឲ្យកាន់តែរឹងមាំ ស្របតាមគោលនយោបាយកែលម្អការគ្រប់គ្រង និងបម្រើសេវាសាធារណៈជូនប្រជាពលរដ្ឋ។

គួរជម្រាបថា ដោយសារតែការខិតខំប្រឹងប្រែង មិនចេះនឿយហត់ ការដឹកនាំប្រកបដោយប្រសិទ្ធភាព និងស្មារតីទទួលខុសត្រូវខ្ពស់ លោកឧត្តមសេនីយ៍ទោ សិទ្ធិ ឡោះ តែងតែត្រូវបានគេចាត់ទុកជាមន្ត្រីគំរូមួយរូប ក្នុងជួរនគរបាលជាតិ។

ស្នាដៃជាក់ស្តែង និងភាពស្មោះត្រង់ក្នុងការងារ បានធ្វើឲ្យលោកទទួលបានការគាំទ្រ និងជំនឿទុកចិត្តពីថ្នាក់ដឹកនាំជាបន្តបន្ទាប់។ ការតែងតាំងនេះ ក៏ជាភស្តុតាងបញ្ជាក់ថា “មនុស្សមានសមត្ថភាព មិនខ្វះឱកាស” ហើយជាកម្លាំងជំរុញដ៏មានន័យ សម្រាប់មន្ត្រីទាំងអស់ ឲ្យបន្តបម្រើជាតិ និងប្រជាពលរដ្ឋឲ្យកាន់តែប្រសើរឡើង។

ម្យ៉ាងទៀតការការតែងតាំងខាងលើនេះ ក៏បានបង្ហាញពីការជឿទុកចិត្ត និងការវាយតម្លៃខ្ពស់ចំពោះសមត្ថភាព និងបទពិសោធន៍ការងាររបស់លោកឧត្តមសេនីយ៍ទោ សិទ្ធិ ឡោះ ផងដែរ៕