រំឭកគុណអ្នកប្រាជ្ញខ្មែរ! លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ចូលរួមទិវាធំគោរពសម្ដេចព្រះមហាសង្ឃរាជ ជួន ណាត នៅសៀមរាប

(សៀមរាប)៖  លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានអញ្ជើញចូលរួមក្នុងទិវាបុណ្យរំឭកឧបការគុណសម្ដេចព្រះមហាសង្ឃរាជ ជោតញ្ញាណោ ជួន ណាត និងក្រុមជំនុំព្រះត្រៃបិដកខ្មែរ លើកទី១៥ ដែលធ្វើឡើងនៅក្នុងវត្តរាជបូណ៌ ស្ថិតក្នុងក្រុងសៀមរាប ខេត្តសៀមរាប។

ពិធីនេះរៀបចំឡើង ដើម្បីរំឭកគុណបំណាច់ និងស្នាព្រះហស្ថដ៏ធំធេងរបស់សម្ដេចព្រះមហាសង្ឃរាជ ជួន ណាត និងអ្នកប្រាជ្ញខ្មែរ ដែលបានចំណាយពេលជាង ៤០ឆ្នាំ រៀបចំ គម្ពីរព្រះត្រៃបិដកខ្មែរ ១១០ភាគ ជាមរតកព្រះពុទ្ធសាសនាដ៏មានតម្លៃសម្រាប់ជាតិខ្មែរ។

សម្ដេចព្រះមហាសង្ឃរាជ ជួន ណាត ក៏មានស្នាព្រះហស្ថសំខាន់ៗជាច្រើន រួមមាន វចនានុក្រមខ្មែរ និងស្នាដៃអក្សរសាស្ត្រផ្សេងៗ ព្រមទាំងបទ «នគររាជ» ដែលក្លាយជាភ្លេងជាតិរបស់កម្ពុជា។

ក្នុងឱកាសនោះ ក៏មានពិធីធម្មយាត្រា ព្រះធម៌ទេសនា និងពិធីរាប់បាត្រព្រះសង្ឃចំនួន ៣៥០អង្គ ដោយមានការចូលរួមពីថ្នាក់ដឹកនាំ និងពុទ្ធបរិស័ទជាច្រើន ដើម្បីឧទ្ទិសបុណ្យកុសលថ្វាយសម្ដេចព្រះមហាសង្ឃរាជ និងក្រុមជំនុំព្រះត្រៃបិដកខ្មែរ៕