រដ្ឋមន្ត្រី កែវ រតនៈ៖ រាជរដ្ឋាភិបាលកម្ពុជានៅតែទទួលបន្ទុកសម្ពាធថ្លៃផលិតអគ្គិសនី ដើម្បីរក្សាស្ថេរភាពថ្លៃភ្លើង

(ភ្នំពេញ)៖ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល បានបញ្ជាក់ថា រាជរដ្ឋាភិបាលកម្ពុជា នៅតែបន្តទទួលបន្ទុកសម្ពាធនៃការកើនឡើងថ្លៃដើមផលិតអគ្គិសនី ទោះបីជាមានវិបត្តិប្រេងឥន្ធនៈកើតឡើងនៅលើទីផ្សារអន្តរជាតិ ដើម្បីធានារក្សាស្ថេរភាពថ្លៃអគ្គិសនីសម្រាប់ប្រជាពលរដ្ឋ និងវិស័យសេដ្ឋកិច្ច។

ក្នុងកិច្ចសម្ភាសន៍ជាមួយអ្នកសារព័ត៌មាន ឯកឧត្តមរដ្ឋមន្ត្រីបានឱ្យដឹងថា វិបត្តិប្រេងឥន្ធនៈពិភពលោកកំពុងបង្កសម្ពាធមួយផ្នែកលើវិស័យអគ្គិសនីនៅកម្ពុជា។ ទោះបីប្រេងឥន្ធនៈត្រូវបានប្រើប្រាស់ក្នុងបរិមាណតិចសម្រាប់ការផលិតអគ្គិសនីក៏ដោយ ក៏ការកើនឡើងថ្លៃប្រេងបានប៉ះពាល់ដល់ថ្លៃដើមផលិតផងដែរ។ លើសពីនេះ ទឹកធ្យូងថ្មដែលប្រើសម្រាប់ផលិតអគ្គិសនីប្រមាណ៣០ភាគរយ ក៏ត្រូវការប្រេងឥន្ធនៈសម្រាប់ដឹកជញ្ជូន ដែលជាហេតុធ្វើឱ្យថ្លៃដើមផលិតអគ្គិសនីមានសម្ពាធផ្នែកហិរញ្ញវត្ថុ។

ឯកឧត្តម កែវ រតនៈ បានបន្ថែមថា ទោះបីមានស្ថានភាពបែបនេះក៏ដោយ រាជរដ្ឋាភិបាលក្រោមការដឹកនាំ និងចង្អុលបង្ហាញរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានណែនាំឱ្យក្រសួងរ៉ែ និងថាមពលផ្សព្វផ្សាយជូនប្រជាពលរដ្ឋ ក៏ដូចជាវិស័យឧស្សាហកម្ម និងពាណិជ្ជកម្ម ឱ្យរក្សាការស្ងប់ស្ងាត់ និងភាពជឿជាក់ ព្រោះការផ្គត់ផ្គង់អគ្គិសនីនៅតែមានគ្រប់គ្រាន់ ខណៈរាជរដ្ឋាភិបាលក៏បានប្តេជ្ញាមិនឱ្យមានការឡើងថ្លៃអគ្គិសនីនោះឡើយ។

សូមបញ្ជាក់ថា វិបត្តិថាមពលបច្ចុប្បន្ន ត្រូវបានគេយល់ថា កើតឡើងបន្ទាប់ពីភាពតានតឹង និងជម្លោះនៅតំបន់មជ្ឈិមបូព៌ា រួមទាំងស្ថានការណ៍ពាក់ព័ន្ធនឹងសង្គ្រាមរវាងអាម៉េរិក អ៊ីស្រាអែល និងអ៊ីរ៉ង់ ដែលបានប៉ះពាល់ដល់ការចម្រាញ់ និងការដឹកជញ្ជូនប្រេងឥន្ធនៈនៅលើទីផ្សារអន្តរជាតិ។ ប្រទេសជាច្រើននៅលើពិភពលោក ជាពិសេសនៅតំបន់អាស៊ី កំពុងរងផលប៉ះពាល់ពីការកើនឡើងតម្លៃប្រេង។ សម្រាប់កម្ពុជា តម្លៃប្រេងសាំង និងប្រេងម៉ាស៊ូត ក៏បានកើនឡើងផងដែរ៕