យុវតីញៀនថ្នាំម្នាក់ត្រូវបានកម្លាំងប៉ូលិសស្រុកលើកដែកចាប់ឃាត់ខ្លួនពាក់ព័ន្ទរំលោភលើទំនុកចិត្ត ខណៈបក្ខពួក៤នាក់ទៀតកំពុងរត់គេចខ្លួន!

(កណ្ដាល)៖ ជនសង្ស័យម្នាក់ក្នុងចំណោមបក្ខពួក៥នាក់ត្រូវបានកម្លាំងនគរបាលស្រុកលើកដែកខេត្តកណ្ដាលចាប់ឃាត់ខ្លួនពាក់ព័ន្ធពីករណី រំលោភលើទំនុកចិត្តកាលពីវេលាម៉ោង ១៦៖៣០នាទី ថ្ងៃទី២៣ ខែកុម្ភៈ ឆ្នាំ២០២៦ នៅចំណុផ្ទះសំណាក់មានកោះមាស ស្ថិតនៅភូមិអំពិលទឹក ឃុំកំពង់ភ្នំ ស្រុកលេីកដែក ខេត្តកណ្តាល។ នេះបើតាមប្រភពដែលអង្គភាពព័ត៌មាន The Mirror News ទទួលបាននៅថ្ងៃទី២៦ ខែកុម្ភៈ​ ឆ្នាំ២០២៦នេះ។

ប្រភពបានឱ្យដឹងថា ជនរងគ្រោះ ឈ្មោះ ថន វុទ្ធី ភេទប្រុស អាយុ ១៧ ឆ្នាំ ជនជាតិខ្មែរ មុខរបរនៅផ្ទះ មានទីលំ នៅភូមិកំពង់ពោធិ៍ ឃុំកំពង់ភ្នំ ស្រុកលើកដែក ខេត្តកណ្តាល។ដោយឡែកក្រុមជនសង្ស័យមានគ្នាចំនួន៥នាក់៖ *១-ឈ្មោះ ជា ស្រីឡែន ភេទស្រី អាយុ ១៧ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅ ភូមិខាងជើង ឃុំព្រែក ខ្សាយ”ក” ស្រុកពាមរក៍ខេត្តព្រៃវែង ត្រូវបានឃាត់ខ្លួន និងមានសារធាតុញៀនក្នុងទឹកនោមវិជ្ជមាន(+)ជាអ្នកខ្ចីទី១។ *២-ឈ្មោះ មិត្ត រ៉ាយ៉ា ភេទប្រុស អាយុ១៧ឆ្នាំ ជនជាតិខ្មែរ មុខរបរមិនពិតប្រាកដ មានទីលំនៅ ភូមិអំពិលទឹក ឃុំកំពង់ភ្នំ ស្រុកលើកដែក ខេត្តកណ្តាល បានរត់គេចខ្លួន អ្នកខ្ចីទី២ ដោយបានយកម៉ូតូទៅបាត់។*៣-ឈ្មោះ តុក ភេទប្រុស ទីលំនៅឃុំព្រែកទន្លាប់ ស្រុកលើកដែក ខេត្តកណ្ដាលបានរត់គេចខ្លួន។*៤-ឈ្មោះ យ៉ុង ភេទប្រុស ទីលំនៅ ភ្នំពេញ បានរត់គេចខ្លួន។*៥-មិនស្គាល់អត្តសញ្ញាណបានរត់គេចខ្លួន។ ចំពោះសម្ភារៈដែលបាត់បង់គឺម៉ូតូ០១គ្រឿង ម៉ាកHONDA SCOO PY ពណ៌ស ឆ្នាំ២០២៣ ពាក់ស្លាកលេខ កណ្តាល 1AR-0791។

ប្រភពដដែលបានបន្តថា នៅមុនពេលកើតហេតុនៅល្ងាចថ្ងៃទី២៣ ខែកុម្ភៈ ឆ្នាំ២០២៦ វេលាម៉ោង១៦៖៣០នាទី ឈ្មោះ ជា ស្រីឡែន បានឆាតខ្ចីលុយឈ្មោះ ថន វុទ្ធី ជាជនរងគ្រោះ ចំនួន២ម៉ឺនរៀល បន្ទាប់មកឈ្មោះ វុទ្ធី ក៏បានជិះម៉ូតូចេញពីផ្ទះយកលុយទៅឲ្យឈ្មោះ ស្រីឡែន នៅផ្ទះសំណាក់មានកោះមាស ពេលទៅដល់ ឈ្មោះ វុទ្ធី ក៏បានយកលុយទៅឲ្យឈ្មោះ ស្រីឡែន នឹងបានឡើងទៅអង្គុយលេងក្នុងបន្ទប់ផ្ទះសំណាក់ខាងលើ ហើយបានអង្គុយចុចទូរសព្ទលេងនៅក្នុងបន្ទប់ផ្ទះសំណាក់ លុះមួយសន្ទុះក្រោយមក ឈ្មោះ ស្រីឡែន ក៏បានខ្ចីម៉ូតូម៉ាក Scoopy របស់ឈ្មោះ វុទ្ធី ថាទៅទិញអីហូបនៅឯរង្វង់មូលស្ពាអ្នកលឿង ត្រើយខាងលិច ពេលទិញរួចហើយឈ្មោះ ស្រីឡែន ក៏បានត្រឡប់មកផ្ទះសំណាក់វិញ និងបានអង្គុយលេងជាមួយមិត្តភក្តិផ្សេងទៀតតែមិនទាន់ឲ្យសោរម៉ូតូទៅឈ្មោះ វុទ្ធី វិញទេ លុះក្រោយមកទៀត ឈ្មោះ យ៉ា ក៏បានមកខ្ចីម៉ូតូពីស្រីឡែន ថាខ្លួនបានខ្ចីឈ្មោះ វុទ្ធី ហើយ ថាខ្ចីទៅនោះមួយភ្លែត ហើយឈ្មោះ យ៉ា ក៏បានយកសោរម៉ូតូពីឈ្មោះ ស្រីឡែន នឹងបានបើកម៉ូតូជាមួយឈ្មោះ តុ នឹងគ្នាពីរនាក់ទៀតដែលមិនស្គាល់អត្តសញ្ញាណចេញបាត់ទៅ។

ប្រភពបន្តថា ដោយឃើញរៀងយូរ ហើយមិនទាន់ឃើញឈ្មោះ យ៉ា ត្រឡប់មកវិញ ឈ្មោះ ស្រីឡែន ក៏បានយកទូរសព្ទរបស់ឈ្មោះ វុទ្ធី ឆាតទៅឈ្មោះ យ៉ា តែឆាតពុំចូលឡើយ ហើយឈ្មោះ វុទ្ធី ក៏នៅអង្គុយរង់ចាំឈ្មោះ យ៉ា រហូតដល់ម៉ោង២៣ជាង នៅតែមិនទាន់ឃើញឈ្មោះ យ៉ា ត្រឡប់មក វិញទៀត ខ្លួនក៏សុំឲ្យម្ចាស់ផ្ទះសំណាក់ជូនទៅផ្ទះ និងបានប្រាប់ឪពុកម្ដាយថា គេយកម៉ូតូបាត់ហើយ។  លុះថ្ងៃទី២៤ ខែកុម្ភៈ ឆ្នាំ២០២៦ ឈ្មោះ សេន សាម៉េត ត្រូវជាម្ដាយ បានមកដាក់ពាក្យបណ្តឹងនៅប៉ុស្តិ៍រដ្ឋបាលកំពង់ភ្នំ។ ក្រោយពីបានទទួលបណ្តឹងភ្លាម កម្លាំងប៉ុស្តិ៍រដ្ឋបាលកំពង់ភ្នំបានរាយការណ៍មកផ្នែកជំនាញនគរបាលយុត្តិធម៌បានចុះទៅដល់ទីតាំងកើតហេតុ និងបាននាំខ្លួនជនសង្ស័យឈ្មោះ ស្រីឡែន មកអធិការដ្ឋាននគរបាលស្រុកលើកដែក ដើម្បីបន្ត។

ប្រភពបានបញ្ជាក់ថា នៅចំពោះមុខសមត្ថកិច្ចជនសង្ស័យបានសារភាពថា ខ្លូនពិតជាបានខ្ចីម៉ូតូពីឈ្មោះ វុទ្ធី ប្រាកដមែន ហើយបានឱ្យឈ្មោះ យ៉ា ខ្ចីបន្តយកទៅបាត់។ បន្ទាប់មកជនសង្ស័យត្រូវបានសមត្ថកិច្ចនគរបាលឃាត់ខ្លួននៅអធិកាដ្ឋានស្រុកលើកដែកជាបណ្តោះអាសន្នដើម្បីអនុវត្តតាមនីតិវិធីច្បាប់៕