សម្ដេចតេជោ ហ៊ុន សែន សូមបងប្អូនខ្មែរឥស្លាមស្វែងយល់ឱ្យបានច្បាស់នូវវិធីបុកល័ក្ដក្នុងពិធីអាពាហ៍ពិពាហ៍ខ្មែរ ព្រោះជាបញ្ហាប្រពៃណីទំនៀមទម្លាប់យូរលង់មកហើយ

(ភ្នំពេញ)៖ នៅវេលាម៉ោង២ទៀបភ្លឺថ្ងៃ២៤ ខែកុម្ភៈ ឆ្នាំ២០២៦នេះ នៅពេលសម្ដេចបន្តចូលរួមក្នុងកម្មវិធីចម្រៀងគ្រួសារខ្មែរ សម្ដេចបានឃើញការបំភ្លឺរបស់អ្នកនាង ខាត់  សុឃីម និងសេចក្តីអំពាវនាវរបស់ក្រសួងវប្បធម៍វិចិត្រសិល្បៈទាក់ទងដល់វិធីបុកល័ក្ដក្នុងពិធីអាពាហ៍ពិពាហ៍ខ្មែរដែលទាក់ទងដល់បងប្អូនខ្មែរឥស្លាម។ នេះជាប្រសាសន៍របស់សម្ដេចតេជោ ហ៊ុន សែន ដែលអង្គភាព The Mirror News ទទួលបានពីលើបណ្ដាញសង្គមផ្លូវការរបស់សម្ដេចតេជោនាព្រឹកនេះ។

សម្ដេចតេជោមានប្រសាសន៍បន្តថា សម្ដេចសូមបងប្អូនខ្មែរឥស្លាមស្វែងយល់ឱ្យបានច្បាស់នូវចំណុចនេះ ព្រោះជាបញ្ហាប្រពៃណីទំនៀមទម្លាប់យូរលង់មកហើយ។

សម្ដេចបន្តទៀតថា ក្នុងឈុតឆាកទៀតសោត ពុំមានចំណុចណាជាការប្រមាថឬមើលងាយមើលថោកនោះទេតែផ្ទុយទៅវិញមានខ្លឹមសារសុីជម្រៅខ្លាំងណាស់លើបញ្ហាសាមគ្គីភាពជាតិសាសន៍និងសាសនា។ សម្ដេចបន្ថែមថា បងប្អូនឥស្លាមបានជួយដល់បងប្អូនខ្មែរដែលទៅរកល័ក្ដនៅពេលឆ្លងទឹក។

សម្ដេចបានបន្តឲ្យដឹងថា សម្រាប់សម្ដេចតាំងពីធំដឹងក្តីមកសម្ដេចតែងទៅចូលរួមបុកល័ក្តសម្រាប់អ្នកស្គាល់គ្នានិងបន្តមកទៀត សម្ដេចរៀបការកូន៥នាក់ដែលចាប់ផ្តើមនៅឆ្នាំ១៩៩៩។

សម្ដេចតេជោ ហ៊ុន សែន បានមានប្រសាសន៍ទៀតថា កូនទាំង៥របស់សម្ដេចសុទ្ធតែធ្វើពិធីបុកល័ក្ដដែលមានអ្នកដើរតួជាជនជាតិឥស្លាមចូលរួមដូចសម័យមុនដែរ។
សម្ដេចមានវីដេអូសម្រាប់បងប្អូនស្វែងយល់និងអ្វីដែលសម្ដេចឲ្យតម្លៃខ្ពស់គឺសាមគ្គីភាពជាតិសាសន៍និងសាសនាដែលប្រទេសយើងគ្មានជម្លោះជាតិសាសន៍និងសាសនានោះទេ។សម្ដេចតេជោបានបញ្ជាក់ថា សម្តេចត្រូវបង្ហោះសារនេះ ទាំងយប់ ព្រោះមិនចង់បិទក្រោលសេះនៅពេលសេះចេញផុតពីក្រោល៕