រដ្ឋមន្ត្រី នេត្រ ភក្ត្រា បានជំរុញឱ្យគណៈបញ្ជាការឯកភាពរដ្ឋបាលខេត្ត ក្រុង ស្រុក ត្រូវពង្រឹងការការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមឱ្យបានល្អប្រសើរ

(ក្រចេះ)៖ លោករដ្ឋមន្ត្រី នេត្រ ភក្ត្រា បានជំរុញឱ្យគណៈបញ្ជាការឯកភាពរដ្ឋបាលខេត្ត ក្រុង ស្រុក ត្រូវពង្រឹងការការពារសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមឱ្យបានល្អប្រសើរ ក្នុងនោះត្រូវបន្តផ្តោតការយកចិត្តទុកដាក់លើការបង្ការ ទប់ស្កាត់ និងបង្ក្រាបបទលើ្មសនានាដូចជា លួច ឆក់ ប្លន់ ឧក្រិដ្ឋកម្ម ក្មេងទំនើង គ្រឿងញៀន ល្បែងអនឡាញ និងល្បែងស៊ីសងខុសច្បាប់ និងពង្រឹងការអនុវត្តច្បាប់ស្តីពីចរាចរណ៍ផ្លូវគោក។ ជាមួយគ្នានេះ ត្រូវខិតខំវឹកហាត់ និងបណ្តុះបណ្តាលបង្កើនសមត្ថភាព និងជំនាញបច្ចេកទេសនៅក្នុងការទប់ស្កាត់ និងបង្ក្រាបបទល្មើសដែលមានការវិវត្តន៍ប្រែប្រួល ជាពិសេសបទល្មើសឆបោកតាមអនឡាន បទល្មើសបច្ចេកវិទ្យាព័ត៌មាន បទល្មើសគ្រឿងញៀន បទល្មើសជួញដូរមនុស្សជាដើម។

ការជំរុញរបស់លោក​ នេត្រ ភក្ត្រា រដ្ឋមន្រ្តីក្រសួងព័ត៌មាន និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តក្រចេះ ក្នុងឱកាសអញ្ជើញបិទសន្និបាតបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ របស់រដ្ឋបាលខេត្តក្រចេះ នៅថ្ងៃទី២២ ខែមករា ឆ្នាំ២០២៦នេះ។

លោក នេត្រ ភក្រ្តា  ក៏បានជំរុញឱ្យអាជ្ញាធរខេត្ត និងនៅមូលដ្ឋានត្រូវពង្រឹងក្រមសីលធម៌វិជ្ជាជីវៈ ការទទួលខុសត្រូវ និងភាពស្អាតស្អំរបស់មន្រ្តីក្នុងការផ្តល់សេវាជូនប្រជាពលរដ្ឋ ហើយត្រូវចាត់វិធានការយ៉ាងម៉ឺងម៉ាត់ក្នុងការដាក់ទណ្ឌកម្មចំពោះមន្រ្តីណាដែលបំពានក្រមសីលធម៌វិជ្ជាជីវៈ និងរំលោភអំណាចក្នុងការអនុវត្តតួនាទី ភារកិច្ចរបស់ខ្លួន ក្នុងនាមជាអ្នកបម្រើប្រជាពលរដ្ឋ។ លោកក៏បានក្រើនរម្លឹកបន្ថែមដល់មន្ត្រីត្រូវបន្តលើកកម្ពស់ការផ្តល់សេវាសាធារណៈនានាជូនប្រជាពលរដ្ឋឱ្យកាន់តែមានប្រសិទ្ធភាព និងត្រូវពង្រឹងការផ្តល់សេវារដ្ឋបាលតាមយន្តការច្រកចេញចូលតែមួយខេត្ត និងការិយាល័យច្រកចេញចូលតែមួយក្រុង ស្រុក និងយន្តការច្រកចេញចូលតែមួយឃុំ សង្កាត់។

លោកបន្តថា កន្លងមកនេះ ការផ្តល់សេវារដ្ឋបាលតាមយន្តការច្រកចេញចូលតែមួយនៅថ្នាក់ក្រោមជាតិ ទទួលបាននូវការសារទរ និងការពេញចិត្តខ្លាំងពីសំណាក់ប្រជាពលរដ្ឋជាទូទៅ ប៉ុន្តែក៏មានចំណុចខ្វះខាតតិចតួចដែលត្រូវបន្តកែលម្អបន្ថែមទៀត ដើម្បីធានាឱ្យការផ្តល់សេវារដ្ឋបាលជូនប្រជាពលរដ្ឋកាន់តែងាយស្រួល និងឆាប់រហ័ស មានតម្លាភាព គណនេយ្យភាព និងមានទំនុកចិត្តខ្ពស់។

លោករដ្ឋមន្ត្រីបានបន្តថា ហេតុនេះ សូមបន្តពង្រឹង ការអនុវត្តការងាររបស់មន្ត្រីទទួលបន្ទុក និងយន្តការអនុវត្ត ដោយគោរពឱ្យបាននូវគោលការណ៍ ស្ដង់ដារ បែបបទ និងនីតិវិធី នៃការផ្ដល់សេវារដ្ឋបាលដែលបានកំណត់ជាធរមាន និងចូលរួមគាំទ្រការអនុវត្តការផ្តល់សេវាតាមប្រព័ន្ធអនឡាញ ស្របតាមគោលការណ៍ណែនាំរបស់ថ្នាក់ជាតិ។

លោកក៏បានណែនាំដល់អាជ្ញាធរខេត្តក្រចេះ ត្រូវរៀបចំឱ្យមានយន្តការ ឬក្រុមការងារមួយទទួលខុសត្រូវក្នុងការតាមដាន និងទប់ស្កាត់ការផ្សព្វផ្សាយព័ត៌មានមិនពិត ធ្វើឱ្យសាធារណៈមតិមានការយល់ច្រឡំ ជាពិសេសព័ត៌មានដែលមានចរិកចោទប្រកាន់ និងប្រឆាំងនឹងអាជ្ញាធរសាធារណៈ ដែលធ្វើឱ្យប៉ះពាល់ដល់មុខមាត់ កិត្តិយស និងកិច្ចខិតខំប្រឹងប្រែងរបស់រដ្ឋបាលថ្នាក់ក្រោមជាតិ ក៏ដូចជារាជរដ្ឋាភិបាលកម្ពុជា ហើយអ្នកនយោបាយប្រឆាំងតែងតែប្រើប្រាស់ព័ត៌មានមិនពិតទាំងនេះជាឧបករណ៍សម្រាប់ឃោសនា និងផ្សព្វផ្សាយបង្កើនប្រជាប្រិយភាពរបស់ខ្លួន។

លោករដ្ឋមន្ត្រីសូមឱ្យបន្តយកចិត្តទុកដាក់តាមដាន ស្រាវជ្រាវ និងបង្រ្កាបឱ្យបានទាន់ពេលវេលានូវបទល្មើសឆបោកតាមប្រព័ន្ធបច្ចេកវិទ្យា និងការគាំទ្រយ៉ាងពេញទំហឹងចំពោះការប្ដេជ្ញាចិត្តរបស់អាជ្ញាធរគ្រប់លំដាប់ថ្នាក់ កងកម្លាំងសមត្ថកិច្ចជំនាញ និងអ្នកពាក់ព័ន្ធក្នុងការលុបំបាត់មិនឱ្យមានបទល្មើសឆបោកតាមប្រព័ន្ធបច្ចេកវិទ្យានៅក្នុងដែនសមត្ថកិច្ចខេត្ត៕