ស្នងការដ្ឋាននគរបាលខេត្តកណ្តាលបំភ្លឺថា មិនឃើញមានបើកលេងល្បែងអនឡាញដូចការចុះផ្សាយនោះទេ!

(កណ្ដាល)៖ ក្រោយមានការចុះផ្សាយថា មានទីតាំងលួចបើកលេងល្បែងសុីសងឡូតូអនឡាញនៅក្នុងឃុំពោធិបាន ផ្ទះរបស់ឈ្មោះ ត្រិត រស់នៅភូមិកំពង់គរ ឃុំពោធិបាន ស្រុកកោះធំ ខេត្តកណ្តាល។

លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាលបានបញ្ជាឱ្យលោកវរសេនីយ៍ឯក សុីម ឃាងអធិការនគរបាលស្រុកកោះធំដឹកនាំឱ្យផ្នែកជំនាញស្រុកកោះធំ សហការជាមួយកម្លាំងប៉ុស្តិ៍នគរបាលរដ្ឋបាលពោធិ ចុះស្រាវជ្រាវបង្រ្កាបករណីខាងលើនេះភ្លាមៗ ដែលជាលទ្ធផល៖ កម្លាំងជំនាញពាក់ព័ន្ធបានចុះស្រាវជ្រាវនិងពិនិត្យជាក់ស្តែងទីតាំងខាងលើ មិនឃើញមានបើកលេងល្បែងអនឡាញនោះទេ។

តាមការបំភ្លឺរបស់ម្ចាស់ផ្ទះឈ្មោះ ហ៊ាង ត្រិត ភេទប្រុស អាយុ៥០ឆ្នាំ បានបំភ្លឺជូនសមត្ថកិច្ចថា នៅថ្ងៃទី៣១ ខែធ្នូ ឆ្នាំ២០២៥ មានខាងក្រុមហ៊ុនឆ្នោតឡូតូអនឡាញបានមកសុំជួលទីតាំងផ្ទះរបស់គាត់ដើម្បីដាក់ឆ្នោតឡូតូអនឡាញពិតប្រាកដមែន។ បន្ទាប់ពីបើកលេងបានតែ០៣ថ្ងៃក៏ត្រូវបានអ្នកសារព័ត៌មាន ចុះមកថតរូបរួចរាយការណ៍ដល់សមត្ថកិច្ចប៉ុស្តិនគរបាលរដ្ឋបាលពោធិបាន ទើបខាងក្រុមហ៊ុនឆ្នោតឡូតូ បានរើយកសម្ភារ និងឈប់ជួលទីតាំងខាងលើនេះ ចាប់តាំពីថ្ងៃទី០២ ខែមករា ឆ្នាំ២០២៦ មកម្លេះ។

ករណីខាងលើនេះ កម្លាំងជំនាញបានណែនាំធ្វើកិច្ចសន្យាម្ចាស់ផ្ទះឱ្យបញ្ឈប់ការជួលទីតាំងលួចបើកលេងល្បែងសុីសងខុសច្បាប់តទៅទៀត បើថ្ងៃក្រោយសមត្ថកិច្ចស្រាវជ្រាវដឹងថា មានលួចលាក់បើកបន្តទៀត នឹងបង្រ្កាបកសាងសំណុំរឿងចាត់ការតាមនីតិវិធី៕