ឯកឧត្ដម គង់ វិមាន អញ្ជើញចុះជួបសួរសុខទុក្ខប្រជាពលរដ្ឋ ក្នុងមូលដ្ឋានភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ
(ភ្នំពេញ)៖ តំណាងឯកឧត្ដម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក.អ.ក. និងប្រធានក្រុមកាងារចុះមូលដ្ឋានខណ្ឌមានជ័យ ឯកឧត្ដម គង់ វិមាន អគ្គលេខាធិការនៃអគ្គលេខាធិការដ្ឋានក្រុមប្រឹក្សាអភិវឌ្ឍន៍កម្ពុជា (ក.អ.ក.) និងជាប្រធានក្រុមការងារគណបក្សចុះមូលដ្ឋានសង្កាត់ចាក់អង្រែលើ រួមជាមួយសមាជិក សមាជិកា នាព្រឹកថ្ងៃសៅរ៍ ទី៣ ខែមករា ឆ្នាំ២០២៦ បានចុះជួបសួរសុខទុក្ខ និងសំណេះសំណាលជាមួយប្រជាពលរដ្ឋ ក្នុងមូលដ្ឋានភូមិព្រែកតាគង់ សង្កាត់ចាក់អង្រែលើ ខណ្ឌមានជ័យ។
ឯកឧត្ដម គង់ វិមាន បានពាំនាំនូវការផ្តាំផ្ញើសួរសុខទុក្ខ និងការជូនពរក្នុងឱកាសឆ្នាំថ្មី ឆ្នាំសកល២០២៦ ពីឯកឧត្ដមឧបនាយករដ្ឋមន្រ្តី ស៊ុន ចាន់ថុល ព្រមទាំងបាននាំយកសម្ភារៈប្រើប្រាស់មួយចំនួនដូចជា៖ អង្ករ ទឹកសុទ្ធ ទឹកត្រី មី ក្រមា ភួយ និងថវិកា១០ម៉ឺនរៀល ឧបត្ថម្ភជូនពលរដ្ឋមួយចំនួន។ ក្នុងនោះដែរក្រុមការងារក៏បានប្រគេន ជូនវត្តចាក់អង្រែលើនូវសម្ភារៈប្រើប្រាស់ដូចមានរៀបរាប់ខាងលើ និងបច្ច័យមួយចំនួនផងដែរ។
ឯកឧត្ដមបានជម្រាបជូនលោកយាយ អ៊ុំ ពូ មីង អំពីវឌ្ឍនភាពថ្មីៗនៃបញ្ហាព្រំដែនកម្ពុជា-ថៃ និងកិច្ចខិតខំប្រឹងប្រែងរបស់រាជរដ្ឋាភិបាល ក្នុងការដោះស្រាយបញ្ហាជូនប្រជាជន តាមបណ្ដោយព្រំដែនដែលទទួល រងផលប៉ះពាល់ផ្ទាល់។
ឯកឧត្ដម គង់ វិមាន ក៏បានណែនាំឱ្យក្រុមការងារចុះមូលដ្ឋានទាំងអស់បន្តការចុះសួរសុខទុក្ខ និងស្វែងយល់អំពីបញ្ហាប្រឈមរបស់ប្រជាពលរដ្ឋក្នុងមូលដ្ឋាន ដើម្បីជំរុញឱ្យការទទួលបានសេវាសាធារណៈ បានកាន់តែប្រសើរ។
ឯកឧត្ដម គង់ វិមាន ក៏បានចុះពិនិត្យមើលទីតាំងត្រៀមបញ្ចុះបឋមសិលាសាងសង់ព្រះវិហារថ្មីនៅក្នុងវត្តចាក់អង្រែលើ ដែលនឹងត្រូវធ្វើឡើងនៅចុងសប្តាហ៍ខាងមុខ ក្រោមវត្តមានឯកឧត្ដមឧបនាយករដ្ឋមន្រ្តី ស៊ុន ចាន់ថុល៕
