ឯកឧត្តម ផៃ ប៊ុនឈឿន៖ កត្តាសាមគ្គីភាពឯកភាពផ្ទៃក្នុងគឺជាព្រលឹងនៃចលនា ដែលទាមទារឲ្យយើងត្រូវតែថែរក្សា

(ស្ទឹងត្រែង)៖ ឯកឧត្តម ផៃ ប៊ុនឈឿន បានគូសបញ្ជាក់ថា ក្រោមការដឹកនាំរបស់រាជរដ្ឋាភិបាលអាណត្តិទី៧ គោលដៅស្នូលក្នុងយុទ្ធសាស្ត្របញ្ចកោណក៍បានយកកត្តាសាមគ្គីភាពឯកភាពផ្ទៃក្នុង គឺជាព្រលឹងនៃចលនា ដែលទាមទារឲ្យយើងត្រូវតែថែរក្សា។

ការគូសបញ្ជាក់របស់ឯកឧត្តម ផៃ ប៊ុនឈឿន រដ្ឋមន្ត្រីប្រតិភូអមនាយករដ្ឋមន្ត្រី និងជាប្រធានក្រុមការងាររាជរដ្ឋាភិបាលចុះជួយមូលដ្ឋាន ខេត្តស្ទឹងត្រែងកាលពីថ្ងៃទី៣១ ខែធ្នូ ឆ្នាំ២០២៥ នៅក្នុងពិធីបិទសន្និបាតបូកសរុបលទ្ធផលការងារប្រចាំឆ្នាំ២០២៥ និងលើកទិសដៅការងារឆ្នាំ២០២៦ នៅសាលាខេត្តស្ទឹងត្រែង។

ឯកឧត្ដមប្រធានក្រុមការងារបានចាត់ទុកការលើកកម្ពស់ការអភិវឌ្ឍន៍ធ្វើឲ្យជីវភាពរស់នៅរបស់ប្រជាជន រីកចម្រើនមានភាពសុខសាន្ត នៅគ្រប់មូលដ្ឋានក្នុងខេត្តគឺកើតចេញពីកត្តាដែលយើងទាំងអស់គ្នា មានសាមគ្គី ភាពតែមួយ មិនបែកបាក់ផ្ទៃក្នុង។

ឯកឧត្ដមបន្តថា សមិទ្ធិផលសព្វបែបយ៉ាងដែលយើងសម្រេចបានគឺសុទ្ធតែផ្តើមចេញពីយើងបានរួមគ្នាសាមគ្គីគ្នាជាធ្លុងមួយក្នុងការជួយគ្នាទៅវិញទៅមក ។

ឯកឧត្តមរដ្ឋមន្ត្រីប្រតិភូអមនាយករដ្ឋមន្ត្រីបានថ្លែងទៀតថា  «ពេលនេះខ្ញុំសុំឱ្យយើងទាំងអស់គ្នាដែលជាថ្នាក់ដឹកនាំ ជាមន្ត្រីរបស់រាជរដ្ឋាភិបាល យើងត្រូវជួបជាមួយប្រជាជនមហាជន ខ្ញុំឃើញបងប្អូនប្រជាពលរដ្ឋ យកអ្វីៗមកផ្គត់ផ្គង់ រៀបចំជូនទៅវរៈកងទ័ព ត្រៀមស្បៀងហ្នឹង នេះហើយជាចំណុចដែលយើងជួយឧបត្ថម្ភគ្នា នេះជាចំណុចទាក់ទងទៅនឹងបញ្ហាសាមគ្គីភាពខ្លាំងណាស់ បើគ្មានសាមគ្គីភាពទេព្រលឹងនៃចលនាវាទៅបាត់ហើយ ហើយសកម្មភាពក៍មិនលេចធ្លោទេ ហើយយើងនឹងបាត់បង់អ្វីៗទាំងអស់»។

នៅក្នុងពិធីនោះ ឯកឧត្តម សរ សុពុត្រា អភិបាលខេត្តបានថ្លែងផងដែរថា រដ្ឋបាលខេត្តបានដាក់ចេញនូវក្របខណ្ឌនិងកម្មវិធីអភិវឌ្ឍន៍មូលដ្ឋាន ក្នុងការជំរុញការអភិវឌ្ឍសង្គមសេដ្ឋកិច្ច តាមរយៈការអនុវត្តកម្មវិធីវិនិយោគបីឆ្នាំរំកិល។ ឯកឧត្តម មានប្រសាសន៍បន្តថា៖ ក្នុងផែនការសកម្មភាពជាយុទ្ធសាស្ត្ររបស់មន្ទីរអង្គភាពក្នុងខេត្ត គម្រោងមូលនិធិរបស់រដ្ឋបាលមូលដ្ឋាន បង្ហាញពីកត្តាសាមគ្គីរួមចំណែកធ្វើឱ្យសម្រេចបាននូវសមិទ្ធផលជាសារវ័ន នៅតាមក្រុងស្រុកទាំង៦ ឃុំសង្កាត់ទាំង ៣៤ និងភូមិទាំង ១៣៧ នៅក្នុងខេត្ត។

គួរបញ្ជាក់ថា ខេត្តស្ទឹងត្រែង មានប្រជាពលរដ្ឋចំនួន ១៩១.០៧១ នាក់ ស្មើនឹង ៤២.០៨៣ គ្រួសារ ហើយកន្លងមកនេះបងប្អូនប្រជាពលរដ្ឋយើងរួមសាមគ្គីគ្នាយ៉ាងល្អប្រសើរជាពិសេសបានបរិច្ចាកនៅធនធានគ្រប់បែបយ៉ាងដើម្បីគាំទ្រដល់សមរភូមិមុខនិងជួយដល់ជនភៀសសឹកបង្ហាញពីកត្តាសាមគ្គីភាពយ៉ាងធំធេង ខ្មែរស្រឡាញ់ខ្មែរ ខ្មែររួមជាតិតែមួយ៕