រដ្ឋបាលខេត្តសៀមរាបហាមឃាត់ដាច់ខាតការប្រើប្រាស់អាកាសយានគ្មានមនុស្សបើក(ដ្រូម) ការបង្ហោះបាឡុង ម៉ូតូហោះលើអាកាស និងការប្រើប្រាស់ផាវ អុជកាំជ្រួចផ្ទុះលម្អគ្រប់ប្រភេទក្នុងភូមិសាស្ត្រ

(សៀមរាប)៖  ដើម្បីធានាបានសន្តិសុខ សុវត្ថិភាព សណ្តាប់ធ្នាប់ និងរបៀបរៀបរយសាធារណៈដល់បងប្អូន ប្រជាពលរដ្ឋក្នុងខេត្តសៀមរាប ព្រមទាំងជៀសវាងបង្កឱ្យមានបញ្ហាជាយថាហេតុណាមួយ រដ្ឋបាលខេត្តសៀមរាបហាមដាច់ខាតការប្រើប្រាស់អាកាសយានគ្មានមនុស្សបើក(ដ្រូន) ការបង្ហោះបាឡុង ម៉ូតូហោះ លើអាកាស និងការប្រើប្រាស់ផាវ អុជកាំជ្រួចផ្ទុះលម្អគ្រប់ប្រភេទក្នុងភូមិសាស្ត្រខេត្តសៀមរាប។​ នេះបើតាមសេចក្ដីជូនដំណឹងដែលអង្គភាព The Mirror News ទទួលបាននៅព្រឹកថ្ងៃទី៣០ ខែធ្នូ ឆ្នាំ២០២៥នេះ។

រដ្ឋបាលខេត្តសៀមរាបបានធ្វើការណែនាំដូចខាងក្រោម៖

១- ហាមដាច់ខាតការប្រើប្រាស់អាកាសយានគ្មានមនុស្សបើក(ដ្រូន) ការបង្ហោះបាឡុង ម៉ូតូហោះ លើអាកាស និងការប្រើប្រាស់ផាវ អុជកាំជ្រួចផ្ទុះលម្អគ្រប់ប្រភេទក្នុងភូមិសាស្ត្រខេត្តសៀមរាប។

២- ជនណាដែលបំពាន ឬប្រើប្រាស់អាកាសយានគ្មានមនុស្សបើក (ដ្រូន) ការបង្ហោះបាឡុង ម៉ូតូ ហោះលើអាកាស និងការប្រើប្រាស់ផាវអុជកាំជ្រួចផ្ទះលម្អ ដោយគ្មានការអនុញ្ញាតពីរដ្ឋបាលខេត្ត ត្រូវទទួលខុសត្រូវទាំងស្រុងនៅចំពោះមុខច្បាប់ជាធរមាន។

៣- ករណីបងប្អូនប្រជាពលរដ្ឋបានប្រទះឃើញមានការប្រើប្រាស់អាកាសយានគ្មានមនុស្សបើក (ដ្រូន) ការបង្ហោះបាឡុង ម៉ូតូហោះលើអាកាស និងការប្រើប្រាស់ផាវ អុជកាំជ្រួចផ្ទុះលម្អ សូមរាយការណ៍ជាបន្ទាន់ទៅអាជ្ញាធរមានសមត្ថកិច្ចដែលនៅជិតបំផុត ដើម្បីចាត់វិធានការ ឱ្យបានទាន់ពេលវេលា។

៤- ស្នងការដ្ឋាននគរបាលខេត្ត បញ្ជាការដ្ឋានកងរាជអាវុធហត្ថខេត្ត មន្ទីរទេសចរណ៍ខេត្ត មន្ទីរ ព័ត៌មានខេត្ត និងគណៈបញ្ជាការឯកភាពរដ្ឋបាលក្រុង ស្រុកទាំង១៣ ត្រូវបង្កើនការយកចិត្ត ទុកដាក់ តាមដាន ចាត់ចែង និងគ្រប់គ្រងសភាពការណ៍ ឱ្យបានល្អប្រសើរ។ ក្នុងករណីពិនិត្យ ឃើញមានជនណាបំពាននូវសេចក្តីណែនាំនេះត្រូវចាត់វិធានការច្បាប់ជាបន្ទាន់។