អ្នកភូមិក្នុងមូលដ្ឋានឃុំឈើទាល ស្រុកកៀនស្វាយសម្ដែងការរីករាយនិងបានថ្លែងអំណរគុណឯកឧត្ដម គួច ចំរើន អភិបាលខេត្តកណ្ដាលដែលបានជួយសម្របសម្រួលដោះស្រាយរំដោះព្រែកឫស្រីស្រុកបានដោយជោគជ័យ ក្រោយពីមានគេបិទអស់រយៈពេលជាយូរលង់មកហើយ!
(កណ្ដាល)៖ ប្រជាពលរដ្ឋចំនួន២ភូមិ ភូមិឫស្សីស្រុក និងភូមិឫស្សីស្រុក២ ឃុំឈើទាល ស្រុកកៀនស្វាយ ខេត្តកណ្ដាល នៅព្រឹកថ្ងៃទី៧ ខែធ្នូ ឆ្នាំ២០២៥នេះ បានជួបជុំគ្នាប្រកបដោយស្នាមញញឹម និងបានថ្លែងអំណរគុណយ៉ាងជ្រាលជ្រៅចំពោះឯកឧត្ដម គួច ចំរើន អភិបាលខេត្តកណ្ដាលដោយបានជួយសម្របសម្រួលដោះស្រាយរំដោះបានព្រែកឫស្រីស្រុកយកមកវិញ ក្រោយពីមានគេបិទអស់រយៈពេលជាយូរលង់ណាស់មកហើយ ដើម្បីស្ដារនិងទម្លាយរំដោះទឹកដែលជន់លិចផ្ទះសម្បែង ស្រែកចំការ និងដំណាំរបស់ប្រជាពលរដ្ឋ។
បើតាមការលើកឡើងរបស់អ្នកភូមិថា ព្រែកឫស្សីស្រុកត្រូវបានគេបិទ ទើបធ្វើឲ្យទឹកចាល់ចូលក្នុងភូមិឫស្សីស្រុក និងភូមិឫស្សីស្រុក២ ជាហេតុនាំឱ្យប៉ះពាល់លំនៅដ្ឋានប្រជាពលរដ្ឋ ដំណាំដាំដុះ រងការខូចខាត ហើយសូម្បីតែសាលារៀនក៏ប្រឈមនឹងការលំបាកខ្លាំងណាស់ដែរ ព្រោះប្រជាពលរដ្ឋ សិស្សានុសិស្សនៅសហគមន៍នេះ សុទ្ធតែប្រឈមនឹងការលំបាកផងដែរ។ ហើយពួកគាត់ពិតជារីករាយខ្លាំងណាស់ដែលឯកឧត្ដម គួច ចំរើន អភិបាលខេត្តកណ្ដាលបានចុះទៅពិនិត្យផ្ទាល់និងជួយសម្របសម្រួលដោះស្រាយបានយ៉ាងជោគជ័យ ល្អប្រសើរ។
បើតាមលោកនាយកសាលាបឋមសិក្សាឫស្សីស្រុកបានថ្លែងថា សាលាបឋមសិក្សាឬស្សីស្រុក នៅផ្នែកខាងក្រោយមានការលិចលង់ទឹក ដោយសារតែទឹកចាល់ ពីខាងក្រោយមកធ្វើឲ្យមានបញ្ហាប្រឈមចំពោះសិស្សានុសិស្ស ជាពិសេសពាក់ព័ន្ធនឹងបញ្ហាបរិស្ថាន។ ការលិចលង់នេះ បានកើតឡើងជាយូរមកហើយដោយសឯកឧត្ដមអភិបាលខេត្តក៏បានជួយឧបត្ថម្ភចាក់ដីដែលអាចនឹងរៀបចំឲ្យមានតារាងបាល់ ឬក៏អាគារសិក្សានៅទីកន្លែងដែលធ្លាប់លិចទឹកនេះ។ លោកនាយកក៏បានថ្លែងអំណរគុណដល់ឯកឧត្ដមអភិបាលខេត្តដែលបានយកចិត្តទុកដាក់ក្នុងការជួយដោះស្រាយចំពោះការលំបាកទាំងនេះ។
នៅចំពោះមុខអ្នកសារព័ត៌មានអ្នកភូមិបានលើកឡើងថា លំនៅឋានរបស់ពួកគាត់ច្រើនគ្រួសារបានប្រឈមនឹងការលិចលង់ជាច្រើនឆ្នាំមកហើយ ព្រោះតែការបិទទឹកហូរចេញ-ចូល នៃព្រែកឬស្សីស្រុក។ ផលដំណាំរងការខូចខាតដោយសារជំនន់ទឹកភ្លៀងគ្មានច្រកចេញ សត្វពាហនៈ ក៏ដូចជាមាន់ ទា ប្រឈមនឹងការគ្មានជម្រក ជាពិសេសគ្មានសូម្បីតែទីកន្លែងសម្រាប់ធ្វើទ្រុង ឬឈរស៊ីស្មៅឬចំណី អាហារ។ ផលលំបាកប៉ះពាល់សុខភាពនិងការរស់នៅប្រចាំថ្ងៃរបស់ប្រជាពលរដ្ឋបានអូសបន្លាយរយៈពេលជាយូរមកហើយ។ ទើបតែថ្មីៗនេះ ឯកឧត្តមអភិបាលខេត្តកណ្ដាលបានចុះទៅពិនិត្យផ្ទាល់ និងដោះស្រាយបញ្ហាចំទិសដៅទើបធ្វើឲ្យប្រជាពលរដ្ឋនៅសហគមន៍ខាងលើរីករាយជាខ្លាំង៕
