ឯកឧត្តម ហាក់ សុខមករា ស្នើដល់មន្ទីរ អង្គភាព អង្គការជាតិ-អន្តរជាតិ មេត្តាពិនិត្យ និងពិចារណានូវគម្រោងសកម្មភាពដែល ជាតម្រូវការចាំបាច់
(កណ្តាល)៖ ឯកឧត្តម ហាក់ សុខមករា អភិបាលរងខេត្តកណ្ដាល នាព្រឹកថ្ងៃ២៤ ខែវិច្ឆិកា ឆ្នាំ២០២៥ បានអញ្ជើញជាអធិបតីក្នុងសិក្ខាសាលាសមាហរណកម្ម កម្មវិធីវិនិយោគបីឆ្នាំរំកិលក្រុង ស្រុក និងឃុំ សង្កាត់ នៅថ្នាក់ក្រុង ស្រុក (២០២៦-២០២៨) ឆ្នាំ២០២៥ នៅក្រុងសំពៅពូន ខេត្តកណ្តាល ។
ឯកឧត្តមបន្តថា សិក្ខាសាលាសមាហរណកម្ម ផែនការវិនិយោគបីឆ្នាំរំកិល (២០២៦-២០២៨) ក្នុងឆ្នាំ២០២៥នេះ ជាឱកាសដើម្បីផ្សព្វផ្សាយគម្រោងវិនិយោគអាទិភាពបីឆ្នាំរំកិល និងកៀរគរប្រភពធនធានផ្សព្វផ្សាយគម្រោងវិនិយោគអាទិភាព សម្រាប់អនុវត្តន៍នៅឆ្នាំបន្ទាប់ និងសម្របសម្រួលធ្វើឱ្យមានការសហការគ្នារវាងគម្រោងនានា នៃកម្មវិធីវិនិយោគរបស់ក្រុង ស្រុក ជាមួយនឹងគម្រោងនៃកម្មវិធីវិនិយោគរបស់ឃុំ សង្កាត់ និងដើម្បីស្នើសុំការគាំទ្រពីមន្ទីរអង្គភាព អង្គការដៃគូរអភិវឌ្ឍន៍នានា ផ្នែកឯកជន និងសប្បុរសជនផងដែរ។ ឯកឧត្តមបន្តទៀតថា អង្គសិក្ខាសាលាសមាហរណកម្ម កម្មវិធីវិនិយោគបីឆ្នាំរំកិលក្រុង ស្រុក និងឃុំ សង្កាត់ នៅថ្នាក់ក្រុង ស្រុក ឆ្នាំ២០២៥ គឺដើម្បីឱ្យគម្រោងសកម្មភាពជាអាទិភាពដែលបានស្នើដោយឃុំ សង្កាត់ ឱ្យមានភាពស៊ីចង្វាក់ប្រទាក់ក្រឡាគ្នាទៅនឹងគោលនយោបាយយុទ្ធសាស្ត្រ និងសកម្មភាពនានា របស់បណ្តាមន្ទីរ អង្គភាពជំនាញ និងអង្គការមិនមែនរដ្ឋាភិបាលជាតិ-អន្តរជាតិ តាមរយៈការវិភាគ និងចរចារវាងមន្ទីរ អង្គភាព និងអង្គការនានា ជាមួយក្រុង ស្រុក និងឃុំ សង្កាត់ ដែលមានការទាក់ទងគ្នាដើម្បីប្រមូលផ្តុំធនធាន សម្រាប់គាំទ្រកិច្ចអភិវឌ្ឍន៍មូលដ្ឋានដោយប្រើប្រាស់សក្តានុពល នៃធនធានចាំបាច់ទាំងឡាយពីគ្រប់មជ្ឈដ្ឋានឱ្យបានកាន់តែល្អប្រសើរ ដោយមានកិច្ចសហប្រតិបត្តិការល្អ ដើម្បីសម្រេចទិសដៅរួមប្រកបដោយប្រសិទ្ធភាព។
ឯកឧត្តមអភិបាលរងខេត្តបានស្នើដល់មន្ទីរ អង្គភាព អង្គការជាតិ-អន្តរជាតិ មេត្តាពិនិត្យ និងពិចារណានូវគម្រោងសកម្មភាពដែលជាតម្រូវការចាំបាច់ និងធ្វើការសម្រេចចិត្តគាំទ្រគម្រោងសកម្មភាព អាទិភាពរបស់ក្រុង ស្រុក និងឃុំ សង្កាត់ ឱ្យបានសមស្រប ជៀសវាងគាំទ្រក្រៅគម្រោង ដែលមិនឆ្លើយតបនឹងតម្រូវការរបស់ប្រជាជននៅមូលដ្ឋាន។
ឯកឧត្តម ហាក់ សុខមករា បានបញ្ជាក់ទៀតថា៖គម្រោងឃុំ/សង្កាត់ ដែលបានស្នើឡើងទូទាំងខេត្តឆ្នាំ២០២៤ សម្រាប់ អនុវត្តឆ្នាំ២០២៥ សរុបមាន ៤ ៣១៤គម្រោង ក្នុងនោះវិស័យកសិកម្មមាន ៣៤១គម្រោង វិស័យអាជីវកម្មមាន ៥៣៣គម្រោង, វិស័យវិស័យអប់រំមាន ៤៩៩គម្រោង, វិស័យសុខ ភាពមាន ១ ០២៤គម្រោង, វិស័យភាពងាយរងគ្រោះមាន ១៨៩គម្រោង, វិស័យបរិស្ថាន មាន ៦២៩គម្រោង, វិស័យរដ្ឋបាល និងសន្តិសុខមាន ១ ០៧៩គម្រោង ហើយទទួលបាន ការគាំទ្រតាមរយៈការចុះកិច្ចព្រមព្រៀងបណ្តោះអាសន្នមានចំនួន ២ ២៤២គម្រោង ស្មើ នឹង ៥២ភាគរយ។ដោយឡែកក្រុងសំពៅពូនគម្រោងស្នើឡើងសរុបមាន ១៧២គម្រោង រួមមាន៖ វិស័យកសិកម្មមាន ១៦គម្រោង, វិស័យអាជីវកម្មមាន ២៩គម្រោង, វិស័យ អប់រំមាន ១៥គម្រោង, វិស័យសុខភាពមាន ៣៦គម្រោង, វិស័យភាពងាយរងគ្រោះ មាន ៤គម្រោង, វិស័យបរិស្ថានមាន ២៨គម្រោង, វិស័យរដ្ឋបាល និងសន្តិសុខ មាន៤៤គម្រោង ហើយទទួលបានការគាំទ្រតាមរយៈការចុះកិច្ចព្រមព្រៀងបណ្តោះអាសន្ន មានចំនួន ៩៥គម្រោងសម្រាប់សង្កាត់ ស្មើនឹង ៥៥ភាគរយ ក្រុងទទួលបានការគាំទ្រមានចំនួន ៣គម្រោង ស្មើនឹង០៨ភាគរយ។
គួរបញ្ជាក់ថា លទ្ធផលគាំទ្រក្នុងសិក្ខាសាលាសមាហរណកម្មសរុប មានចំនួន៩៥/១៧២គម្រោងស្មើនឹង៥៥ភាគរយ មន្ទីរជំនាញចំនួន៩៥/១៧២គម្រោងស្មើនឹង៥៥ភាគរយ អង្គការ០គម្រោង សប្បុរសជន០គម្រោង គម្រោងក្រុង ទទួលបានការគាំទ្រចំនួន៣/៤១០គម្រោង ស្មើនឹង ៨ភាគរយ៕
