កម្លាំងប៉ូលិសស្រុកត្រាំកក់ចាប់វ៉ៃខ្នោះ អ្នករកស៊ីទិញលក់ដីម្នាក់ ឈ្មោះ ឡេង សុគន្ធ ពាក់ព័ន្ធករណីរំលោភលើទំនុកចិត្ត!

(តាកែវ)៖ កម្លាំងសមត្ថកិច្ចនគរបាលស្រុកត្រាំកក់ ខេត្តតាកែវ កាលពីថ្ងៃទី១២ ខែវិច្ឆិកា ឆ្នាំ២០២៥បានចាប់ឃាត់ខ្លួនវ៉ៃខ្នោះអ្នកទិញលក់ដីម្នាក់ឈ្មោះ ឡេង សុគន្ធ ពាក់ព័ន្ធករណីរំលោភទំនុកចិត្ត ដែលបានទិញដីពីប្រជាពលរដ្ឋលក់បន្តឲ្យរោងចក្រហើយភាគីរោងចក្របានឲ្យលុយគ្រប់រួចរាល់ហើយ ប៉ុន្តែបុគ្គលនេះ មិនប្រគល់លុយឲ្យប្រជាពលរដ្ឋគ្រប់ចំនួននោះឡើយ។ ករណីដីធ្លីនេះ កើតឡើនៅភូមិតាសិ ឃុំពពេល ស្រុកត្រាំកក់​​ ខេត្តតាកែវ។ នេះបើតាមប្រភពដែលបណ្ដាញសារព័ត៌មាន The Mirror News ទទួលបាននៅថ្ងៃនេះ។

ពាក់ព័ន្ធករណីជនសង្ស័យខាងលើនេះ លោក ឌុក ធីយ៉ា អធិការនគរបាលស្រុកត្រាំកក់បានបញ្ជាក់ឱ្យអ្នកកាសែតដឹងថា កម្លាំងរបស់លោកពិតជាបានឃាត់ខ្លួនឈ្មោះ ឡេង សុគន្ធ នោះមែន ពាក់ព័ន្ធនឹងរំលោភសេចក្តីទុក ចិត្ត ហើយបានបញ្ជូនទៅស្នងការដ្ឋាននគរបាលខេត្តរួចរាល់ហើយ។ លោកអធិការបន្តថា កម្លាំងជំនាញបានឃាត់ខ្លួនបញ្ជូនទៅស្នងការដ្ឋាននគរបាលខេត្តរួចហើយកាលពីម្សិលមិញ។

លោកអធិការបន្តថា ការឃាត់ខ្លួននេះ តាមបណ្ដឹងរបស់ប្រជាពលរដ្ឋ (ភូមិតាសិ ឃុំពពេល) ដែលលោក ឡេង សុគន្ធ ជំពាក់លុយហើយមិនព្រមសង។ លោកបញ្ជាក់ថា ជំពាក់លុយប្រជាពលរដ្ឋករណីទិញដីមិនឲ្យលុយប្រជាពលរដ្ឋដូច្នេះព្រះរាជអាជ្ញាបានចោទពីបទរំលោភសេចក្តីទុកចិត្ត។

ប្រជាពលរដ្ឋរងគ្រោះក្នុងរឿងនេះឲ្យដឹងថា ឈ្មោះ ឡេង សុគន្ធ បានយកលុយពីភាគីរោងចក្រគ្រប់ចំនួនរួចរាល់អស់ហើយ ប៉ុន្តែមិនប្រគល់ឲ្យប្រជាពលរដ្ឋម្ចាស់ដីនោះឡើយ។ ប្រជាពលរដ្ឋបានទារលុយពួកគាត់ជាច្រើនលើកច្រើនសារ​ ប៉ុន្តែបុគ្គលខាងលើ តែងតែគេចវេស។

ប្រជាពលរដ្ឋបានសុំឲ្យមានការសម្របសម្រួលប្រគល់លុយកាក់គ្រប់ចំនួនឲ្យពួកគាត់ដែលជាម្ចាស់ដី ប៉ុន្តែឈ្មោះ ឡេង សុគន្ធ មិនទទួលខុសត្រូវ។ ដូច្នេះមានតែការចាត់ចែងតាមផ្លូវច្បាប់ពីបទរំលោភសេចក្តីទុកចិត្ត៕