លោកស្នងការ ហេង សុផល ផ្ដាំផ្ញើ ដល់បងប្អូនកងកម្លាំង ត្រូវប្រកាន់ខ្ជាប់នូវវិន័យ សីលធម៌ វិជ្ជាជីវៈ របស់កងកម្លាំងនគរបាលជាតិ កម្ពុជា បង្កើនការងារសាមគ្គីភាព ឯកភាពផ្ទៃក្នុង

(កំពង់ធំ)៖ ដោយអនុវត្តតាមអនុសាសន៍ដឹកនាំ និងយកចិត្តទុកដាក់ពីលោកនាយឧត្តមសេនីយ៍ ស ថេតអគ្គស្នងការនគរបាលជាតិ នៅរសៀលថ្ងៃទី១៤ ខែវិច្ឆិកា ឆ្នាំ២០២៥នេះ លោកឧត្តមសេនីយ៍ទោ ហេង សុផល ស្នងការនគរបាលខេត្តបានអញ្ជើញដឹកនាំកិច្ចប្រជុំពង្រឹងការងារប្រឆាំងគ្រឿងញៀនដល់មន្ត្រីពាក់ព័ន្ធ នៅសាលប្រជុំស្នងការដ្ឋាននគរបាលខេត្ត។

លោកឧត្តមសេនីយ៍ទោស្នងការបានថ្លែងសោកស្តាយចំពោះការបាត់បង់យុទ្ធមិត្តម្នាក់ ក្នុងជួរកងកម្លាំងនគរបាលជាតិ នៃស្នងការដ្ឋាននគរបាលខេត្តកំពង់ធំ ក្នុងកិច្ចប្រតិបត្តិការបង្ក្រាបករណីជួញដូរគ្រឿងញៀន នៅភូមិសាស្ត្រ ស្រុកតាំងគោក កាលពីថ្ងៃទី២៣ ខែតុលា ឆ្នាំ២០២៥នេះ គឺលោកវរសេនីយ៍ទោ ហួន សាវ័យ នាយរងការិយាល័យប្រឆាំងគ្រឿងញៀន។

លោកឧត្តមសេនីយ៍បានលើកទឹកចិត្តដល់មន្ត្រីជំនាញ ត្រូវបង្ក្រាបបទល្មើសគ្រឿងញៀន ដូចភ្លៀងរលឹម សំដៅទប់ស្កាត់លុបបំបាត់ កាត់បន្ថយបទល្មើសគ្រឿង ដែលអាចកើតមានឡើង ក្នុងមូលដ្ឋាន សំដៅថែរក្សាបាន សន្តិសុខ សុវត្ថិភាព សណ្តាប់ធ្នាប់ ជូនសង្គមជាតិ និងប្រជាពលរដ្ឋ ស្របតាមគោលនយោបាយ «ភូមិ-ឃុំ-សង្កាត់មានសុវត្ថិភាព»។

លោកស្នងការបានជម្រុញឱ្យពង្រឹងដល់កម្លាំងការិយាល័យប្រឆាំងគ្រឿងញៀន និងកម្លាំងអធិការដ្ឋាននគរបាលទាំង៩ក្រុង-ស្រុក រួមមាន៖*ទី១-វិធានការ រដ្ឋបាល។*ទី២-វិធានការ អប់រំផ្សព្វផ្សាយ។*ទី៣-វិធានការ អនុវត្តច្បាប់។*ទី៤-វិធានការ ស្ដារនីតិសម្បទា។*ទី៥-វិធានការ សហប្រតិបត្តិការ។

លោកស្នងការបានផ្ដាំផ្ញើ ដល់បងប្អូនកងកម្លាំង ត្រូវប្រកាន់ខ្ជាប់នូវវិន័យ សីលធម៌ វិជ្ជាជីវៈ របស់កងកម្លាំងនគរបាលជាតិ កម្ពុជា បង្កើនការងារសាមគ្គីភាព ឯកភាពផ្ទៃក្នុង កិច្ចសហប្រតិបត្តិការល្អជាពិសេសការអនុវត្តន៍ តាមទិសស្លោកប្រយុទ្ធប្រឆាំងគ្រឿងញៀនបីកុំ មួយរាយការណ៍គឺ៖
*កុំពាក់ព័ន្ធ : កុំជួញដូរ កុំចែកចាយ កុំធ្វើខ្នងបង្អែក កុំឃុបឃិត និងកុំប្រើប្រាស់គ្រឿងញៀន។
*កុំអន្តរាគមន៍ : កុំរារាំងការរអនុវត្តច្បាប់ចំពោះឧក្រិដ្ឋជនគ្រឿងញៀន ទោះបីជាក្រុមគ្រួសារ សាច់ញាតិ ឫ មិត្តភក្កិក៏ដោយ។
*កុំលើកលែង : កុំបន្ធូរបន្ថយការអនុវត្តច្បាប់ចំពោះឧក្រិដ្ឌជនគ្រឿងញៀន។ សមត្ថកិច្ចពាក់ព័ន្ធទាំងអស់ត្រូវអនុវត្តច្បាប់ដោយម៉ឺងម៉ាត់ និងស្មោះត្រង់វិជ្ជាជីវ:របស់ខ្លួន ហើយជនគ្រប់រូបត្រូវគោរព និងអនុវត្តច្បាប់។ មួយរាយការណ៍៖ ត្រូវរាយការណ៍ ផ្តល់ព័ត៌មាន ដល់សមត្ថកិច្ចអំពីមុខសញ្ញាជួញដូរ ចែកចាយ ប្រើប្រាស់ ទីតាំងកែច្នៃផលិតនិងទីតាំងស្តុកទុកគ្រឿងញៀនខុសច្បាប់ដល់សមត្ថកិច្ច៕