ឧបនាយករដ្ឋមន្ត្រី ស សុខា៖ ផ្លូវគឺជាសរសៃឈាមមួយដ៏សំខាន់សម្រាប់ប្រជាពលរដ្ឋក្នុងការធ្វើដំណើរលើកកម្ពស់សេដ្ឋកិច្ចគ្រួសាររបស់ប្រជាពលរដ្ឋឲ្យកាន់តែមានភាពរីកចម្រើនបន្ថែមទៀត គឺមានផ្លូវគឺមានក្តីសង្ឃឹម

(ព្រៃវែង)៖ លោកអភិសន្តិបណ្ឌិត ស សុខា នៅថ្ងៃទី១២ ខែវិច្ឆិកា ឆ្នាំ២០២៥ បានគូសបញ្ជាក់ថា ផ្លូវគឺជាសរសៃឈាមមួយដ៏សំខាន់សម្រាប់ប្រជាពលរដ្ឋក្នុងការធ្វើដំណើរលើកកម្ពស់សេដ្ឋកិច្ចគ្រួសាររបស់ប្រជាពលរដ្ឋឲ្យកាន់តែមានភាពរីកចម្រើនបន្ថែមទៀត គឺមានផ្លូវគឺមានក្តីសង្ឃឹម។

ការគូសបញ្ជាក់របស់លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃក្នុងពិធីសម្ពោធដាក់ឱ្យប្រើប្រាស់ផ្លូវបេតុងប្រវែង ៨,៨០៩ម៉ែត្រ បង្គោលអំពូលសូឡា ចំនួន២៨៨ដើម និងចាក់សាបបេតុង ចំនួន១កន្លែង ទំហំ ២, ៣៦០ម៉ែត្រការ៉េ ស្ថិតក្នុងឃុំពោធិ៍រៀង និងឃុំព្រែកអន្ទះ ស្រុកពោធិ៍រៀង ខេត្តព្រៃវែង។

​ក្នុងឱកាសនោះ លោកអភិសន្តិបណ្ឌិត ស សុខា បានបន្តថា សមិទ្ធផលថ្មីទាំងនេះ នឹងរួមចំណែកយ៉ាងធំធេងក្នុងការលើកកម្ពស់ជីវភាពរស់នៅរបស់ប្រជាពលរដ្ឋក្នុងមូលដ្ឋាន តាមរយៈការសម្រួលដល់ការធ្វើដំណើរ ការដឹកជញ្ជូនផលិតផលកសិកម្ម និងការបង្កើនសោភ័ណភាព និងសុវត្ថិភាពនៅពេលយប់ផងដែរ។

លោកអភិសន្តិបណ្ឌិត បន្ថែមថា សមិទ្ធផលថ្មីនេះ គឺជាការឆ្លើយតបទៅនឹងតម្រូវការចាំបាច់របស់ប្រជាពលរដ្ឋ និងជាការបង្ហាញអំពីការយកចិត្តទុកដាក់របស់រាជរដ្ឋាភិបាលកម្ពុជា ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្នុងការជំរុញការអភិវឌ្ឍនៅទូទាំងប្រទេស ជាពិសេសតាមតំបន់ជនបទ។ ការសម្ពោធសមិទ្ធផលថ្មីនេះ គឺជាសមិទ្ធផលមួយទៀត ដែលកើតចេញពីកិច្ចខិតខំប្រឹងប្រែងរបស់ថ្នាក់ដឹកនាំ និងការសាមគ្គីភាពរបស់ប្រជាពលរដ្ឋ ក្នុងបុព្វហេតុនៃការអភិវឌ្ឍន៍មូលដ្ឋាន និងប្រទេសជាតិ៕