ពិតជាមានករណីវាយប្លន់យកម៉ូតូពីជនរងគ្រោះឈ្មោះ ម៉ា ពិសិដ្ឋ នៅតាមបណ្ដោយផ្លូវជាតិលេខ៤ ស្ថិតនៅក្នុងឃុំបែកចាន ស្រុកអង្គស្នួល ប្រាកដមែន

(កណ្ដាល)៖ បន្ទាប់ពីមានសារព័ត៌មានក្នុងស្រុកមួយបានផ្សាយថា ពិតជាហ៊ានមែន មុននេះបន្តិចមាន ករណី ប្លន់យកម៉ូតូបុរសម្នាក់នៅតាមបណ្តោយផ្លូវជាតិលេខ៤ ស្ថិតក្នុងឃុំបែកចាន ស្រុកអង្គស្នួល ខេត្តកណ្តាល។ សង្ឃឹមថាសមត្ថកិច្ចស្រុកអង្គស្នួល ជួយមានវិធានការផង នៅវេលាម៉ោង ៥:០០ទៀបភ្លឺ ត្រូវនឹងថ្ងៃទី១៦ ខែកញ្ញា ឆ្នាំ២០២៥។

លោកឧត្តមសេនីយ៍ទោ ឈឿន សុចិត្ត ស្នងការនគរបាលខេត្តកណ្តាលបានបញ្ជាកម្លាំងជំនាញពាក់ព័ន្ធនិងកម្លាំងអធិការដ្ឋាននគរបាលស្រុកអង្គស្នួលស្រាវជ្រាវករណីខាងលើភ្លាមៗ ដោយលទ្ធផលបានឱ្យដឹងថា ពិតជាមាន ករណីវាយយកម៉ូតូពីឈ្មោះ ឈ្មោះ ម៉ា ពិសិដ្ឋ នៅថ្ងៃទី១៦ ខែកញ្ញា ឆ្នាំ២០២៥ វេលាម៉ោង៥៖១៨នាទី
នៅតាមបណ្ដោយផ្លូវជាតិលេខ៤ ភូមិត្រពាំងក្រសាំង ឃុំបែកចាន ស្រុកអង្គស្នួល ខេត្ដកណ្ដាល ប្រាកដមែន។

ប្រភពបានឱ្យដឹងថា ជនរងគ្រោះ មានឈ្មោះ ម៉ា ពិសិដ្ឋ ភេទប្រុស អាយុ៣៤ឆ្នាំ ជនជាតិខ្មែរ មុខរបរកម្មករ ទីលំនៅបច្ចុប្បន្នស្នាក់នៅបន្ទប់ជួលភូមិតាសេក សង្កាត់កំបូល ខណ្ឌកំបូល រាជធានីភ្នំពេញ ។

ដោយឡែក ជនសង្ស័យមានគ្នាចំនួន៤នាក់ ដែលមិនស្គាល់អត្តសញ្ញាណ។ សម្ភារៈបាត់បង់រួមមាន៖ ម៉ូតូមួយគ្រឿង ម៉ាកសង់ឌ្រីម ពណ៌ខ្មៅ ផលិតឆ្នាំ2025 ពាក់ផ្លាកលេខ ភ្នំពេញ 1LE-1025 ។

ប្រភពបានបន្តថា ក្រោយកើតហេតុភ្លាមៗ ជនរងគ្រោះបានព្យាយាមស្រែកហៅអ្នកនៅក្បែរនោះឱ្យជួយដែរ តែគ្មានអ្នកចេញមកជួយឡើយ។ ភ្លាមនោះ មានអ្នកដំណេីរបានទៅជូនដំណឹងដល់សមត្ថកិច្ចប៉ុស្តិ៍នគរបាលរដ្ឋបាលបែកចានឱ្យជួយអន្តរាគមន៍ភ្លាមៗ ហេីយទើបជនរងគ្រោះទៅដាក់ពាក្យបណ្ដឹងនៅប៉ុស្តិ៍នគរបាលរដ្ឋបាលបែកចាន នៃអធិការដ្ឋាននគរបាលស្រុកអង្គស្នួល។

ប្រភពបានបញ្ជាក់ថា ចំពោះករណីនេះ​ កម្លាំងផ្នែកជំនាញពាក់ព័ន្ធ កំពុងស្រាវជ្រាវ ស្វែងរកមុខសញ្ញាយកមកចាត់ការតាមនីតិវិធី៕