ឧបនាយករដ្ឋមន្ត្រី ស៊ុន ចាន់ថុល៖ ការអភិវឌ្ឍប្រទេសជាតិ គឺនៅដំណើរការទៅមុខដដែល អត់មានថយក្រោយនោះទេ គឺនៅធ្វើតាមការគ្រោងទុក និងឱ្យបានចប់សព្វគ្រប់នៅឆ្នាំ២០២៨

(ភ្នំពេញ)៖ លោកឧបនាយករដ្ឋមន្ត្រី ស៊ុន ចាន់ថុល បានបញ្ជាក់ថា «មិនមានបញ្ហានោះទេ សម្រាប់ការសាងសង់ និងការអភិវឌ្ឍប្រទេសជាតិ គឺនៅដំណើរការទៅមុខដដែល អត់មានថយក្រោយនោះទេ គឺនៅធ្វើតាមការគ្រោងទុក និងឱ្យបានចប់សព្វគ្រប់នៅឆ្នាំ២០២៨ ដើម្បីយើងបន្ថែមទៀតនៅឯករាជភាព ឧត្តមភាពនៃការដឹកជញ្ជូនតាមផ្លូវទឹករបស់យើងឱ្យបានតភ្ជាប់នឹងសមុទ្រ»។

ការគូសបញ្ជាក់របស់លោកឧបនាយករដ្ឋមន្ត្រី ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងជាអនុប្រធានប្រចាំការគណៈកម្មាធិការពិសេស ដើម្បីជំរុញការអនុវត្តគម្រោងព្រែកជីកហ្វូណនតេជោ នាថ្ងៃទី២៥ ខែកក្កដា ឆ្នាំ២០២៥នេះ ក្នុងឱកាសដែលលោកដឹកនាំក្រុមការងារ ដោយមានការចូលរួមពីលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន និងជាប្រធានលេខាធិការដ្ឋានគណៈកម្មាធិការពិសេស និងមានថ្នាក់ដឹកនាំតាមក្រសួង-ស្ថាប័នពាក់ព័ន្ធ ចុះពិនិត្យផ្ទៀងផ្ទាត់ និងបោះបង្គោលបញ្ចប់ការងារកំណត់និយាមកានៃគម្រោងព្រែកជីកហ្វូណនតេជោ ក្នុងភូមិសាស្ត្រខេត្តកែប។

លោកបានបញ្ជាក់ទៀតថា ទោះបីកម្ពុជា កំពុងមានជម្លោះព្រំដែនជាមួយថៃ តែការការសាងសង់គម្រោងព្រែកជីកហ្វូណនតេជោ និងការអភិវឌ្ឍប្រទេសជាតិ គឺនៅដំណើរការទៅមុខដដែលអត់មានថយក្រោយនោះទេ។ ​លោកក៏បានរំលឹកផងដែរពីប្រសាសន៍របស់សម្តេចមហាបវរធិបតី ហ៊ុន ម៉ាណែត ដែលលោកតែងតែបានលើកឡើងថា កម្ពុជានឹងខិតខំអួសសមុទ្រ ឱ្យបានខិតជិតនឹងទន្លេ ដើម្បីសម្រួលការដឹកជញ្ជូនតាមផ្លូវទឹកឱ្យបានកាន់តែងាយស្រួល ខណៈដែលការដឹកជញ្ជូនតាមផ្លូវនេះនេះ មានភាពងាយស្រួល ហើយមានតម្លៃថោក។

គួរបញ្ជាក់ថា គម្រោងព្រែកជីកហ្វូណនតេជោ គឺជាគម្រោងដឹកជញ្ជូនផ្លូវទឹក តភ្ជាប់រវាងទន្លេ និងសមុទ្រដ៏មានសក្តានុពលមួយរបស់កម្ពុជា។ គម្រោងនេះត្រូវបានបើកការដ្ឋានសាងសង់ កាលពីថ្ងៃទី៥ ខែសីហា ឆ្នាំ២០២៤។ ព្រែកជីកហ្វូណនតេជោ តភ្ជាប់ពីទន្លេទៅសមុទ្រ មានប្រវែងជិត ១៨០គីឡូម៉ែត្រ ចាប់ផ្តើមពីព្រែកតាកែវ នៃទន្លេមេគង្គ ឆ្លងកាត់តាមព្រែកពោធិ៍ នៃទន្លេបាសាក់ រួចចូលតាមព្រែកតាហ៊ីងនៃទន្លេបាសាក់ និងបន្តរហូតដល់សមុទ្រខេត្តកែប ដោយឆ្លងកាត់ភូមិសាស្រ្តខេត្តចំនួន៤ រួមមាន ខេត្តកណ្តាល ខេត្តតាកែវ ខេត្តកំពត និងខេត្តកែប។

គម្រោងព្រែកជីកនេះនឹងត្រូវសាងសង់ស្ទើរទាំងស្រុង លើតម្រាយខ្សែផ្លូវទឹកធម្មជាតិ និងផ្លូវទឹកបុរាណដែលបានបន្សល់ទុកស្រាប់តាំងពីសម័យអាណាចក្រហ្វូណនមកម្ល៉េះ ក្នុងនោះផ្លូវទឹក ធម្មជាតិដែលមានស្រាប់ មានប្រវែងប្រមាណ ១៣៥គីឡូម៉ែត្រ ផ្លូវទឹកត្រូវជីកតម្រង់កុំឱ្យកោងពេក មានប្រវែងប្រមាណ ៣៨គីឡូម៉ែត្រ និងផ្លូវទឹកជីកថ្មីមានប្រវែងប្រមាណ ៧គីឡូម៉ែត្រ ដើម្បីកាត់បន្ថយកំណោង និងកាត់បន្ថយចម្ងាយតភ្ជាប់ទៅកាន់សមុទ្រ។

គម្រោងនេះប្រើប្រាស់រយៈពេលសាងសង់ប្រមាណ ៤៨ខែ និងគ្រោងបញ្ចប់នៅក្នុងអំឡុងឆ្នាំ២០២៨ ខាងមុខ ប្រើប្រាស់ទុនវិនិយោគ សរុបប្រមាណ ១,៧ពាន់លានដុល្លារអាម៉េរិក៕