សម្តេចនាយករដ្ឋមន្ត្រី ហ៊ុន ម៉ាណែត៖ «ចាប់ពីឆ្នាំ២០២៦ទៅ នឹងចាប់ផ្តើមអនុវត្តនូវច្បាប់កាតព្វកិច្ចយោធា ដែលនេះគឺជាការប្តេជ្ញាចិត្តរបស់យើង»
(កំពង់ឆ្នាំង)៖ ក្នុងសម្ពោធដាក់ឱ្យប្រើប្រាស់សមិទ្ធផលនៃមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយ និងអបអរសាទរខួបលើកទី៣២ ទិវាកងរាជអាវុធហត្ថ (១៤ កក្កដា ១៩៩៣-១៤ កក្ដដា ២០២៥) នៅមជ្ឈមណ្ឌលហ្វឹកហ្វឺនកងរាជអាវុធហត្ថជុំសែនរីករាយ ស្ថិតនៅភូមិច្រកកូវ ឃុំពាម ស្រុកសាមគ្គីមានជ័យ ខេត្តកំពង់ឆ្នាំង នាព្រឹកថ្ងៃទី១៤ ខែកក្កដា ឆ្នាំ២០២៥នេះ សម្តេចមហាបវរធិបតី ហ៊ុន ម៉ាណែត បានបញ្ជាក់ថា «សម្តេចបានឱ្យជាគោលការណ៍ដល់ក្រសួងពាក់ព័ន្ធ ក្នុងការរៀបចំវិសោធនកម្មច្បាប់ចំនួន២ ក្នុងនោះមានទី១៖ ច្បាប់កាតព្វកិច្ចយោធា ឆ្នាំ២០០៦ និងទី២៖ ច្បាប់សោធន»។ សម្តេចនាយករដ្ឋមន្ត្រីបានបញ្ជាក់ថា «ចាប់ពីឆ្នាំ២០២៦ទៅ នឹងចាប់ផ្តើមអនុវត្តនូវច្បាប់កាតព្វកិច្ចយោធា ដែលនេះគឺជាការប្តេជ្ញាចិត្តរបស់យើង»។
សម្តេច ហ៊ុន ម៉ាណែត បានបន្តថា សម្តេចឱ្យពិនិត្យមើលក្នុងការកែសម្រួល ដែលកន្លងទៅ ត្រូវអនុវត្ត១៨ខែ ដែលរយៈពេល១៨ខែនេះ ជារយៈពេលខ្លីហ្វឺកហ្វឺនបានតិចបំផុត ដោយបូករួមទាំងនីតិវិធីផ្សេងៗ រួមទាំងការចល័តផងដែរ។ ដូច្នេះសម្តេចចង់ឱ្យកែទៅរយៈពេល២៤ខែវិញ ដែលគោលការណ៍នេះ មានការអនុវត្តនៅតាមបណ្តាប្រទេសជាច្រើន។ ច្បាប់ស្តីពីកាតព្វកិច្ចយោធា ត្រូវបានប្រកាសឡើងកាលពីថ្ងៃទី២២ ខែធ្នូ ឆ្នាំ២០០៦ ដោយមាន៦ជំពូក និង១៨មាត្រា។ ច្បាប់នេះ បានកំណត់ថា ប្រជាពលរដ្ឋខ្មែរទាំង២ភេទ ដែលមានអាយុ១៨ដល់៣០ឆ្នាំ ត្រូវតែបំពេញកាតព្វកិច្ចយោធា ហើយការបំពេញនេះទៀតសោតសម្រាប់ស្ត្រី គឺផ្អែកទៅតាមការស្ម័គ្រចិត្ត។
សម្តេចធិបតីបានពន្យល់ឱ្យដឹងបន្ថែមថា ច្បាប់នេះ ជួយឱ្យកម្ពុជា *ទី១៖ បង្កើនបរិមាណបំពេញសាច់ទ័ព និង*ទី២៖ បង្កើនប្រសិទ្ធភាពក្នុងការបំពេញសាច់ទ័ព ដែលការបំពេញសាច់ទ័ពនេះ នឹងធ្វើឱ្យកម្ពុជាមិនខ្វះកូនទាហាននោះទេសម្រាប់ថ្ងៃអនាគត។សម្តេចនាយករដ្ឋមន្ត្រីបានបញ្ជាក់ថា«អ្វីដែលសំខាន់នោះគឺប្រសិទ្ធភាព ទ័ពដែលរើសជាកាតព្វកិច្ច យកទៅផ្សុាំ២ឆ្នាំ ចប់២ឆ្នាំគាត់មាន លទ្ធភាពស្ម័គ្រចិត្ត គាត់ចង់ចូលសង្គម ឬគាត់ស្ម័គ្រចិត្តចូលជាទ័ពអាជីព»។
សម្តេចមហាបវរធិបតីបានថ្លែងថា បញ្ហានេះ ក៏ងាយស្រួលក្នុងការរើសកងទ័ព ដែលអាចជ្រើសរើសចេញពីអ្នកដែលចូលទៅបំពេញកាតព្វកិច្ចយោធាផងដែរ។ អ្នកដែលមិនត្រូវបានជ្រើសរើស ក្រោយពេលបំពេញកាតព្វកិច្ចយោធាហើយ គាត់ក៏អាចចូលទៅក្នុងសង្គម ដែលយ៉ាងហោចណាស់ក៏គាត់ជាមនុស្សដែលបានអប់រំ បណ្តុះបណ្តាល មានវិន័យ ហើយបើសិនជាពលរដ្ឋមិនបានបណ្តុះបណ្តាលតាមរយៈការបំពេញកាតព្វកិច្ចយោធាទេ នោះគាត់អាចជាមនុស្សផ្សេង ដែលបង្កបញ្ហាដល់សង្គមជាដើម។ សម្តេចបានបញ្ជាក់ទៀតថា បើសិនជាមានសភាពការណ៍ចាំបាច់ យើងមានទ័ពដែលអាចចុចឈ្មោះមកបាន ហើយគាត់មានការហ្វឹកហ្វឺនរួចជាស្រេច៕ 
