ឯកឧត្ដមបណ្ឌិត ជិន ម៉ាលីន បានបើកកិច្ចប្រជុំដើម្បីពិនិត្យ និងពិភាក្សាលើរបៀបវារៈសំខាន់ៗចំនួន៤

(ភ្នំពេញ)៖ ឯកឧត្ដមបណ្ឌិត ជិន ម៉ាលីន រដ្ឋលេខាធិការប្រចាំការក្រសួងយុត្តិធម៌ និងជាអនុប្រធានប្រចាំការនៃ អ.ដ.ក. នៅថ្ងៃព្រហស្បតិ៍ ទី១០ ខែកក្តដា ឆ្នាំ២០២៥នេះ បានអញ្ជើញដឹកនាំកិច្ចប្រជុំដើម្បីពិនិត្យ និងពិភាក្សាលើរបៀបវារៈសំខាន់ៗចំនួន៤៖

*១. ផែនការការងារក្នុងការបន្តចុះផ្សព្វផ្សាយ និងបណ្ដុះបណ្ដាលសម្រាប់ឆមាសទី២ ឆ្នាំ២០២៥ របស់ អ.ដ.ក.

*២. ផែនការការងារក្នុងការចុះមូលដ្ឋានជួបជាមួយនឹងរដ្ឋបាលរាជធានី-ខេត្ត ដែលបានចុះ MOU រួចរាល់ ដើម្បីពិនិត្យលើការអនុវត្ត MOU និង ផែនការផ្សព្វផ្សាយដល់ប្រជាពលរដ្ឋនៅតាមមូលដ្ឋាន

*៣. កិច្ចសហប្រតិបត្តិការជាមួយដៃគូអភិវឌ្ឍន៍ក្នុងការអនុវត្តគម្រោងរបស់ អ.ដ.ក. ក្នុងការចុះដោះស្រាយវិវាទជូនប្រជាពលរដ្ឋនៅតំបន់ជនជាតិដើមភាគតិចនិងតំបន់ដាច់ស្រយាល

*៤. ការត្រៀមរៀបចំពិធីប្រកាសដាក់ឱ្យដំណើរការការិយាល័យតំណាង អ.ដ.ក. នៅខេត្តទាំង៤នៃភូមិភាគឦសាន នាថ្ងៃទី១ ខែសីហា ឆ្នាំ២០២៥ ខាងមុខនេះ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម កើត រិទ្ធ ឧបនាយករដ្ឋមន្រ្តី រដ្ឋមន្រ្តីក្រសួងយុត្តិធម៌ និងជាប្រធាន អ.ដ.ក.។

គួរជម្រាបជូនថា នៅក្នុងកិច្ចប្រជុំដ៏មានសារៈសំខាន់ខាងលើនេះ ក៏មានការអញ្ជើញចូលរួមពីសំណាក់ ឯកឧត្ដម ឯម ច័ន្ទមករា រដ្ឋលេខាធិការក្រសួងយុត្តិធម៌ និងជាសមាជិក អ.ដ.ក., លោកជំទាវ ជា វាសនា រដ្ឋលេខាធិការក្រសួងយុត្តិធម៌ និងជាសមាជិកនៃ អ.ដ.ក., ឯកឧត្ដម ប៉ូច សោភ័ណ អនុរដ្ឋលេខាធិការក្រសួងយុត្តិធម៌ និងជាសមាជិក អ.ដ.ក., ឯកឧត្តម មាស សុកែវ អនុរដ្ឋលេខាធិការក្រសួងយុត្តិធម៌ និងជាសមាជិក អ.ដ.ក.,ឯកឧត្ដម យ៉ម ផារ៉ូត អគ្គលេខាធិការនៃ អ.ដ.ក., និងថ្នាក់ដឹកនាំនៃ អគ្គលេខាធិការដ្ឋាននៃ អ.ដ.ក.ផងដែរ៕