សម្តេចធិបតី ហ៊ុន ម៉ាណែត៖ លើកទឹកចិត្តឱ្យគ្រូ និងអាណាព្យាបាល ចងក្រងគ្នាជាបណ្តាញ ដើម្បីតាមដានការសិក្សារបស់កូន

(កំពង់ស្ពឺ)៖ សម្តេចមហាបវរធិបតី ហ៊ុន ម៉ាណែត លើកទឹកចិត្តឱ្យគ្រូ និងអាណាព្យាបាល ចងក្រងគ្នាជាបណ្តាញ ដើម្បីតាមដានការសិក្សារបស់កូន។

ការថ្លែងរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជានៅព្រឹកថ្ងៃអង្គារ ទី៨ ខែកក្កដា ឆ្នាំ២០២៥នេះ ក្នុងឳកាសអញ្ជើញសម្ពោធសមិទ្ធក្នុងវិស័យអប់រំ មានដូចជាអគារសិក្សា អគារ​ទីចាត់ការ និងអគារស្នាក់នៅនៅតាមសាលានានា ទូទាំងខេត្តកំពង់ស្ពឺ សរុបចំនួន ១១ខ្នង ស្មើនឹង ១៤៩បន្ទប់។

សម្ដេចធិបតីបានបន្តថ្លែងថា​ ការកសាង និងអភិវឌ្ឍន៍ធនធានមនុស្ស គឺជាកិច្ចការចាំបាច់សម្រាប់កម្ពុជា ហើយរាជរដ្ឋាភិបាលកម្ពុជាជាច្រើនអាណត្តិដឹកនាំដោយគណបក្សប្រជាជនកម្ពុជា បានជំរុញជាប់ជាប្រចាំ។ សម្តេចបន្តថា មោទនភាពរបស់យើង មិនមែនសាលាល្អនោះទេ គឺសិស្សទទួលបានជោគជ័យក្នុងជីវិតរយៈពេល ១០ឆ្នាំ ទៅ២០ឆ្នាំក្រោយ។

សម្តេច ហ៊ុន ម៉ាណែត ណែនាំបន្តពង្រឹងអភិបាលកិច្ចសាលារៀន តាមរយៈការអនុវត្តស្តង់ដាសាលារៀនគំរូ និងសាលារៀនគោលដៅ «គវអ» ដើម្បីជំរុញការអភិវឌ្ឍប្រព័ន្ធអប់រំខេត្ត ឱ្យកាន់តែរឹងមាំ ទំនើប និងប្រកបដោយ​នវា​នុវត្តន៍ សំដៅធានាបាននូវសេវាអប់រំដែលមានគុណភាព ប្រសិទ្ធភាព និង សមធម៌ ។សម្តេចណែនាំបន្តជំរុញការសិក្សាពេញមួយជីវិតតាមរយៈការបង្កើត និងការដាក់ចេញនូវគំនិតផ្តួចផ្តើមនានា ដែលចូលរួមលើកកម្ពស់ការសិក្សាពេញមួយជីវិតសម្រាប់មនុស្សពេញវ័យ ក្នុងការទទួលបានឱកាសសិក្សា និង បណ្តុះបណ្តាលជាបន្តបន្ទាប់ សំដៅរក្សាភាពប្រកួតប្រជែង និងឆ្លើយតបបានកាន់តែប្រសើរទៅនឹងតម្រូវការជាក់ស្ដែងនៃទីផ្សារការងារ។

សម្តេចនាយករដ្ឋមន្ត្រីបានណែនាំឱ្យបន្តកែទម្រង់គ្រឹះស្ថានបណ្តុះបណ្តាលគ្រូសំដៅលើកកម្ពស់គុណវុឌ្ឍគ្រូ ឱ្យស្របតាមស្តង់ដាវិជ្ជាជីវៈគ្រូបង្រៀន, ជាតិ និង អន្តរជាតិ, ដោយត្រូវផ្តល់ ការបណ្តុះបណ្តាលវិជ្ជាជីវៈដល់គ្រូបង្រៀន ជាប្រចាំ និងឧបករណ៍គាំទ្រចាំបាច់នានា ស្របតាមវិធីសាស្ត្របង្រៀនបែបថ្មី និងការអប់រំឌីជីថល។

សម្តេចមហាបវរធិបតីបានណែនាំឱ្យបន្តធ្វើសមាហរណកម្ម​បច្ចេក​វិទ្យាឌីជីថលទៅក្នុងកម្មវិធីសិក្សាគ្រប់កម្រិត ដោយបន្តជំរុញ ការបង្កើតមជ្ឈមណ្ឌល​អប់រំឌីជីថល, ការរៀបចំថ្នាក់រៀនឆ្លាតវៃ និង ការភ្ជាប់បណ្ដាញអ៊ីនធឺណិត នៅតាម​គ្រឹះស្ថានសិក្សា, ព្រមទាំងបន្ត លើកកម្ពស់សមត្ថភាពឌីជីថលដល់គ្រូបង្រៀន, បញ្ចូល​ការប្រើប្រាស់បច្ចេកវិទ្យា ទៅក្នុងការបង្រៀន និង ការរៀន, កែលម្អមាតិកាសិក្សា និង ផ្សព្វផ្សាយមាតិកាឌីជីថលឱ្យបានទូលំទូលាយ។

សម្តេចណែនាំឱ្យបន្តលើកកម្ពស់អនាម័យនៅតាមសាលារៀន ដោយត្រូវត្រៀមវិធានការឆ្លើយតប និងចូលរួមទប់ស្កាត់​ភ្លាមៗ ព្រម​ទាំងបង្កើនការអប់រំអំពីសុខភាពសិក្សា និង សុវត្ថិភាពចំណីអាហារ, កែលម្អហេដ្ឋារចនាសម្ព័ន្ធសុខភាព ដូចជា បន្ទប់សុខភាពស្ដង់ដា, បរិស្ថានសាលារៀនបៃតង, សាលារៀនស្អាតគ្មានសំរាមជាដើម ។ ទន្ទឹមនេះ, ត្រូវគិតគូរអំពីការដោះស្រាយ​បញ្ហាសុខភាពផ្លូវចិត្ត និងសុខុមាលភាពរបស់សិស្សានុសិស្ស នៅតាមសាលារៀន ដោយត្រូវបញ្ចូល កម្មវិធីអប់រំសុខភាពផ្លូវចិត្ត និង សុខុមាលភាពនៅក្នុងសាលារៀន៕