ឧបនាយករដ្ឋមន្ត្រី ហ៊ុន ម៉ានី ណែនាំបន្ថែមដល់គណៈអភិបាលរាជធានី ខេត្តលើការអនុវត្តការវាយតម្លៃនិងការទទួលស្គាល់អង្គភាពផ្តល់សេវាសាធារណៈ គំរូក្នុងវិស័យអប់រំនិងវិស័យសុខាភិបាលសម្រាប់ឆ្នាំ២០២៥
(ភ្នំពេញ)៖ ឯកឧត្ដមឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈនៅថ្ងៃទី៣០ ខែមិថុនា ឆ្នាំ២០២៥បានចេញសេចក្ដីណែនាំបន្ថែមដល់ឯកឧត្តម លោកជំទាវ អភិបាលនៃគណៈអភិបាលរាជធានី ខេត្ត លើការអនុវត្តការវាយតម្លៃនិងការទទួលស្គាល់អង្គភាពផ្តល់សេវាសាធារណៈ គំរូក្នុងវិស័យអប់រំនិងវិស័យសុខាភិបាលសម្រាប់ឆ្នាំ២០២៥។ នេះបើតាមសេចក្ដីណែនាំរបស់ក្រសួងមុខងារសាធារណៈដែលអង្គភាព The Mirror News ទទួលបាននៅថ្ងៃទី០២ ខែកក្ដដានេះ។
ឯកឧត្ដមឧបនាយករដ្ឋមន្ត្រីបានលើកឡើងថា តាមស្មារតីនៃអនុក្រឹត្យស្តីពីការវាយតម្លៃនិងការទទួលស្គាល់អង្គភាព ផ្តល់សេវាសាធារណៈគំរូក្នុងវិស័យអប់រំនិងវិស័យសុខាភិបាល គណៈកម្មការវាយតម្លៃអង្គភាពផ្តល់សេវា សាធារណៈថ្នាក់រាជធានី ខេត្ត និងថ្នាក់ក្រុង ស្រុក ខណ្ឌ ត្រូវផ្សព្វផ្សាយ និងជូនដំណឹងស្តីពីការទទួលពាក្យ ចូលរួមប្រឡងប្រជែងជាអង្គភាពផ្តល់សេវាសាធារណៈគំរូក្នុងវិស័យអប់រំ និងវិស័យសុខាភិបាលពីអង្គភាព ជាគោលដៅនៃការវាយតម្លៃក្នុងដែនសមត្ថកិច្ចរបស់ខ្លួន នៅសប្តាហ៍ទី១ នៃខែកក្កដា និងត្រូវអនុវត្តនីតិវិធី នៃការវាយតម្លៃស្របតាមតួនាទីភារកិច្ចរបស់ខ្លួន និងកាលបរិច្ឆេទដែលបានកំណត់ រួចបញ្ជូនអង្គភាពដែលល្អ ជាងគេចំនួនពីរក្នុងមួយកម្រិតមកចូលរួមប្រឡងប្រជែងនៅថ្នាក់ជាតិ។
ឯកឧត្ដមរដ្ឋមន្ត្រីបានគូសបញ្ជាក់ថា ក្នុងឆ្នាំ២០២៥នេះ រាជរដ្ឋាភិបាល បានសម្រេចកំណត់សាលាបឋមសិក្សានិងអនុវិទ្យាល័យ ជាគោលដៅនៃការវាយតម្លៃអង្គភាពផ្តល់សេវា សាធារណៈគំរូក្នុងវិស័យអប់រំ និង មណ្ឌលសុខភាព ជាគោលដៅនៃការវាយតម្លៃនិងការទទួលស្គាល់អង្គភាពផ្តល់ សេវាសាធារណៈគំរូក្នុងវិស័យសុខាភិបាល។
ដើម្បីធានាបានប្រសិទ្ធភាពនៃការអនុវត្ត ស្របតាម ស្មារតីនៃអនុក្រឹត្យនិងប្រកាសអន្តរក្រសួងខាងលើ ឯកឧត្ដម ហ៊ុន ម៉ានី បានស្នើគណៈអភិបាលរាជធានី ខេត្ត អនុវត្តនូវវិធានការ ដូចខាងក្រោម៖
១. ណែនាំដល់គណៈកម្មការវាយតម្លៃអង្គភាពផ្តល់សេវាសាធារណៈថ្នាក់ក្រុង ស្រុក ខណ្ឌ ចំណុះ ឱ្យជូនដំណឹងដល់អង្គភាពជាគោលដៅនៃការវាយតម្លៃនិងការទទួលស្គាល់អង្គភាព ផ្តល់សេវាសាធារណៈគំរូក្នុងវិស័យអប់រំនិងវិស័យសុខាភិបាលសម្រាប់ឆ្នាំ២០២៥ និងជំរុញឱ្យអង្គភាពជាគោលដៅនៃការវាយតម្លៃទាំងអស់ក្នុងដែនសមត្ថកិច្ចក្រុង ស្រុក ខណ្ឌ របស់ខ្លួន ដាក់ពាក្យចូលរួមប្រឡងប្រជែងឱ្យបានផុសផុល
២. អនុវត្តការវាយតម្លៃបេក្ខភាពអង្គភាពផ្តល់សេវាសាធារណៈគំរូ ដែលត្រូវបានបញ្ជូនពីគណៈ កម្មការវាយតម្លៃវាយតម្លៃថ្នាក់ក្រុង ស្រុក ខណ្ឌ ដើម្បីជ្រើសសម្រាំងយកបេក្ខភាពអង្គភាព ផ្តល់សេវាសាធារណៈគំរូចំនួនពីរក្នុងមួយកម្រិត (សាលាបឋមសិក្សាចំនួន ២ អនុវិទ្យាល័យ ចំនួន២ និងមណ្ឌលសុខភាពចំនួន២) តំណាងរាជធានី ខេត្តរបស់ខ្លួន រួចបញ្ជូនមក ចូលរួមប្រឡងប្រជែងបន្តនៅថ្នាក់ជាតិ តាមគោលការណ៍និងនីតិវិធីកំណត់
៣.ផ្តល់កិច្ចសហការ និងណែនាំដល់អភិបាលនៃគណៈអភិបាលក្រុង ស្រុក ខណ្ឌចំណុះ ឱ្យ ផ្តល់កិច្ចសហការដល់ក្រុមការងារនៃគណៈកម្មការវាយតម្លៃអង្គភាពផ្តល់សេវាសាធារណៈ ថ្នាក់ជាតិ ដែលនឹងចុះបំពេញបេសកកម្មតាមដានត្រួតពិនិត្យការអនុវត្តការវាយតម្លៃនិង ការទទួលស្គាល់អង្គភាពផ្តល់សេវាសាធារណៈគំរូក្នុងវិស័យអប់រំ និងវិស័យសុខាភិបាល សម្រាប់ឆ្នាំ២០២៥៕
