លោក សុខ សុវិទ្យា ណែនាំមន្ត្រីគយទាំងអស់ត្រូវកសាងសមត្ថភាពជាប់ជាប្រចាំ ប្រកាន់ភ្ជាប់ក្រមសីលធម៌ វិជ្ជាជីវៈ និងស្មារតីទទួលខុសត្រូវខ្ពស់ ក្នុងការបំពេញតួនាទីស្របតាម ស្តង់ដាវិជ្ជាជីវៈ និងសង្គតិភាពជាមួយការអនុវត្តន៍ល្អជាអន្តរជាតិ
(ភ្នំពេញ)៖ លោកអគ្គនាយករង សុខ សុវិទ្យា បានណែនាំមន្ត្រីគយទាំងអស់ត្រូវកសាងសមត្ថភាពជាប់ជាប្រចាំ ដើម្បីឱ្យទាន់ការវិវត្តនៃសកម្មភាពពាណិជ្ជកម្មអន្តរជាតិ និងការប្រកាន់ភ្ជាប់នូវក្រមសីលធម៌ វិជ្ជាជីវៈ និងស្មារតីទទួលខុសត្រូវខ្ពស់ ក្នុងការបំពេញតួនាទីស្របតាម ស្តង់ដាវិជ្ជាជីវៈ និងសង្គតិភាពជាមួយការអនុវត្តន៍ល្អជាអន្តរជាតិ។
ការណែនាំរបស់លោកអគ្គនាយករង សុខ សុវិទ្យា តំណាងដ៏ខ្ពង់ខ្ពស់ឯកឧត្តមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយនិងរដ្ឋាករកម្ពុជាក្នុងឱកាសបើកវគ្គបណ្តុះបណ្តាលកាលពីថ្ងៃទី១៩ ខែមិថុនា ឆ្នាំ២០២៥។
លោកអគ្គនាយករងបន្តថា វគ្គបណ្តុះបណ្តាលនេះ សំខាន់ណាស់ដើម្បីរួមចំណែកសម្រេចបាននូវបេសកកម្មចម្បងរបស់ អគរ លើការប្រមូលចំណូលជូនជាតិ ការពារសុខសុវត្ថិភាពសង្គម និងផ្តល់កិច្ចសម្រួលពាណិជ្ជកម្ម។
លោកបន្តថា វគ្គបណ្តុះបណ្តាលនេះ ត្រូវបានរៀបចំឡើងក្នុងគោលបំណងដើម្បីពង្រឹង និងបង្កើនសមត្ថភាពមន្រ្តីគយនិងរដ្ឋាករ តាមរយៈបទបង្ហាញរបស់មន្ត្រីជំនាញ ជាពិសេសពីនាយកដ្ឋានផែនការនិងបច្ចេកទេស ដែលផ្តោតលើការធ្វើបច្ចុប្បន្នភាពបទប្បញ្ញត្តិនិងនីតិវិធីគយថ្មីៗ ពាក់ព័ន្ធនឹងការងារបច្ចេកទេសគយ និងការចែករំលែកបទពិសោធន៍ពីបញ្ហានានាដែលបានជួបប្រទះកន្លងមក ដើម្បីជាការក្រើនរំលឹក និងកាត់បន្ថយកំហុសនានាឱ្យបានជាអតិបរមា ក្នុងដំណើការផ្ទៀងផ្ទាត់តម្លៃគិតពន្ធគយ ចំណាត់ថ្នាក់ទំនិញ និងសំអាងដើមកំណើតទំនិញ។
តំណាងលោក គុណ ញឹម បានផ្តាំផ្ញើ និងលើកទឹកចិត្តឱ្យសិក្ខាកាមទាំងអស់បន្តចែករំលែកចំណេះដឹងដែលទទួលបានពីវគ្គបណ្តុះបណ្តាលនេះ និងផ្សព្វផ្សាយឱ្យបានទូលំទូលាយដល់សហការីនៅតាមទីកន្លែងបំពេញការងាររៀងៗខ្លួន ហើយជាពិសេស គឺត្រៀមខ្លួនជាស្រេចសម្រាប់ការអនុវត្តការងារស្របតាម របត់គោលនយោបាយជាតិ។
គួរជម្រាបថា វគ្គបណ្តុះបណ្តាលស្តីពី «តម្លៃគិតពន្ធគយ ចំណាត់ថ្នាក់ទំនិញ និងវិធានដើមកំណើតទំនិញ» បានប្រព្រឹត្តទៅចាប់ពីថ្ងៃទី១៩ ដល់ថ្ងៃទី២០ ខែមិថុនា ឆ្នាំ២០២៥ នៅសាលាជាតិគយ សម្រាប់មន្ត្រីគយនិងរដ្ឋាករ ជាថ្នាក់ដឹកនាំនិងមន្ត្រីបច្ចេកទេសមកពីបណ្តានាយកដ្ឋាន សាខា និងការិយាល័យគយនិងរដ្ឋាករទូទាំងប្រទេស សរុប៦០រូប ដោយអនុលោមតាមផែនការសកម្មភាព ឆ្នាំ២០២៥ របស់អគ្គនាយកដ្ឋានគយនិងរដ្ឋាករកម្ពុជា(អគរ) ក្រោមកម្មវិធីកែទម្រង់ការគ្រប់គ្រងហិរញ្ញវត្ថុសាធារណៈ (PFM) ដំណាក់កាលទី៤៕
