នាយឧត្តមសេនីយ៍ ស ថេត ជួបសំណេះសំណាលជាមួយប្រតិភូ គ្រូបង្វឹក កីឡាករ កីឡាការិនី នៃក្រុមប្រឹក្សាកីឡាក្រសួងមហាផ្ទៃ

(ភ្នំពេញ)៖ លោកនាយឧត្តមសេនីយ៍ ស ថេត អគ្គស្នងការនគរបាលជាតិ និងអនុប្រធានទី១ នៃក្រុមប្រឹក្សាកីឡាក្រសួងមហាផ្ទៃ នារសៀលថ្ងៃសុក្រ ទី២០ ខែមិថុនា ឆ្នាំ២០២៥នេះ បានជួបសំណេះសំណាលជាមួយប្រតិភូ គ្រូបង្វឹក កីឡាករ កីឡាការិនី នៃក្រុមប្រឹក្សាកីឡាក្រសួងមហាផ្ទៃ មុនទៅចូលរួមក្នុងព្រឹត្តិការណ៍ប្រកួតកីឡានគរបាល និងកងពន្លត់អគ្គិភ័យពិភពលោក (World Police & Fire Games) លើកទី២១ ឆ្នាំ២០២៥ នៅទីក្រុង Birmingham រដ្ឋAlabama សហរដ្ឋអាមេរិក។

ដោយមានការអញ្ជេីញចូលរួម​ពី​​រដ្ឋលេខាធិកា​រ​ អគ្គស្នងការរង​ អគ្គលេខាធិការដ្ឋាន​ នៃ​អគ្គលេខាធិការដ្ឋាន​ក្រុមប្រឹក្សា​កីឡា​​ ប្រធានសេនាធិការដ្ឋាន នៃអគ្គស្នងការដ្ឋាននគរបាលជាតិ​ គ្រូបង្វឹក​ និង​ កីឡាករ​ កីឡាការិនី​ ជាច្រើនរូបទៀត។

គួរជម្រាបថា យោងតាមការឯកភាពដ៏ខ្ពង់ខ្ពស់របស់ លោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃបានអនុញ្ញាតប្រធានប្រតិភូ អនុប្រធានប្រតិភូ គ្រូបង្វឹក និងកីឡាករ កីឡាការិនី សរុបចំនួន៥២រូប ចេញទៅចូលរួមក្នុងការប្រកួតកីឡានគរបាល និងកងពន្លត់អគ្គិភ័យពិភពលោក លើកទី២១ ( the 21st World Police and Fire Games) នៅទីក្រុង Birmingham រដ្ឋ Alabama សហរដ្ឋអាមេរិក ដែលគ្រោងនឹងប្រព្រឹត្តទៅចាប់ពីថ្ងៃទី២៧ខែមិថុនា ដល់ថ្ងៃទី៦ ខែកក្កដា ឆ្នាំ២០២៥។

ក្នុងនោះចំនួន០៩ប្រភេទ ត្រូវបានបញ្ជូនឱ្យទៅចូលរួមប្រកួតប្រជែង មាន​ដូចជា៖- វាយសី – ចំបាប់ – ជឺជិតស៊ូ – យូដូ – ហែលទឹក – វាយកូនឃ្លីលើតុ – ការ៉ាតេ – តេក្វាន់ដូ- បាល់ទះ៕