មេភូមិកំពង់បាស្រូវជើង ឈ្មោះ នៅ រស់ ត្រូវបានពលរដ្ឋចោទថា បានប្រព្រឹត្តអំពើពុករលួយ ក្រុមគ្រួសារនិយម និងកាងពេញភូមិ

(កំពង់ឆ្នាំង)៖ មេភូមិកំពង់បាស្រូវជើង ឈ្មោះ នៅ រស់ ត្រូវបាន ប្រជាពលរដ្ឋក្នុងភូមិចោទប្រកាន់ថា បានប្រព្រឹត្តិអំពើមិនត្រឹមត្រូវ អយុត្តិធម៌ មិនចម្រើនផលប្រយោជន៍របស់ប្រជាជន ជាពិសេស ធ្វើប្លង់ដីតម្រូវឱ្យពលរដ្ឋបង់ថវិកា១០០០០រៀល និងបានប្រព្រឹត្តអំពើពុករលួយនានា ស្ថិតនៅភូមិកំពង់បាស្រូវជើង ឃុំជលសារ ស្រុកជលគិរី ខេត្តកំពង់ឆ្នាំង។

ប្រភពពីប្រជាពលរដ្ឋសុំមិនបញ្ចេញឈ្មោះបានរាយការណ៍ថា លោកមេភូមិរូបនេះ តែងតែប្រើសិទ្ធិអំណាចគំរាមគំហែង ប្រជាពលរដ្ឋ ហើយបក្សពួកក្រុមគ្រួសារនិយម ដោយប្រើសិទ្ធិអំណាចកាងពេញភូមិ។

ប្រជាពលរដ្ឋស្នើសុំដល់លោកអភិបាលស្រុកជលគិរី គណ:ពង្រឹងស្រុកជលគិរី ឯកឧត្តម អ៊ុក ពញ្ញា ជួយផ្លាស់ប្តូរលោកមេភូមិ នៅ រស់ ចេញ ហើយរៀបចំកែសម្រួលរចនាសម្ព័ន្ធជាថ្មី ដើម្បីការពារមុខមាត់អាជ្ញាធរដែលបំពេញកិច្ចការល្អ។

ទាក់ទិនករណីនេះ លោក នៅ រស់ មេភូមិកំពង់បាស្រូវជើងបានប្រាប់ឲ្យ The Mirror News ដឹងនៅថ្ងៃនេះថា បញ្ហាដែលនេះមិនទាន់ត្រឹមត្រូវទេ អ្វីដែលលោកធ្វេីសុទ្ធតែបានពិគ្រោះគ្នាព្រោះប្លង់ដីនេះ ឃុំផ្តល់យោបល់ថា បេីគាត់យកទៅចុះហត្ថលេខាឃុំអស់ច្រេីន អញ្ចឹងសូមឲ្យភូមិប្រមូលយកទៅឃុំតែម្តងទៅ ហេីយសូមឲ្យគាត់បង់ប្រាក់១០០០០៛ ដោយប្រាក់១០០០០៛ បានទៅឃុំ៥០០០៛ បានមកភូមិ៥០០០៛ ហេីយភូមិបាន៥០០០៛នេះចែករំលែកទៅអនុភូមិ សមាជិក ដែលធ្វេីការទាំងអស់គ្នា ចំពោះប្រាក់នេះ ជូនបានជូន ជូនមិនបានក៏អត់ទៅ តែប្រជាពលរដ្ឋជាច្រេីនគេស្វាគមន៍ តែប្រជាពលរដ្ឋភាពតិចដែលគាត់មិនអោយ។ តែមិនអីទេ បេីលោកដកក៏ដកទៅព្រោះអ្នកធ្វេីមិនដែលត្រូវទេ។

ជុំវិញករណីនេះ អភិបាលស្រុកជលគិរី លោក ដូវ គឹមសិន បានឲ្យដឹងថា នៅមុននេះបន្តិចលោកក៏បានទទួលព័ត៌មានប្រហាក់ប្រហែលព័ត៌មានខាងលើដែរ។ លោកបន្តថា ជាគោលការណ៍របស់ស្រុកចំពោញមេភូមិអសកម្ម និងមេភូមិដែលមានបញ្ហាគឺត្រូវរុះរើ និងរៀបចំឡើងវិញ នេះជាគោលការណ៍របស់ស្រុក។ លោកបានបន្តទៀតថា ព័ត៌មានខាងលើនេះ ជាព័ត៌មានដែលមានសារៈសំខាន់ហើយលោកនឹងដាក់ជាធាតុចូលដើម្បីវាយតម្លៃ។ លោកបន្តទៀតថា ចំពោះរឿងយកលុយ យកកាក់ លោកនឹងចាត់តាំងឲ្យអភិបាលរងម្នាក់ដែលទទួលការងារដីធ្លីចុះទៅធ្វើការរឿងហ្នឹង៕