ករណីឃាតកម្ម, ប្អូនថ្លៃចូលទៅកាប់បងថ្លៃដល់ក្នុងបន្ទប់ឲ្យស្លាប់ក្នុងឈាម ត្រូវក្រុមប៉ូលិសខណ្ឌដង្កោចាប់បានហើយ!
(ភ្នំពេញ)៖ នៅថ្ងៃទី២៩ ខែមេសា ឆ្នាំ២០២៥ វេលាម៉ោង២០៖៣០នាទី មានករណីឃាតកម្មមួយកើតឡើង នៅចំណុចផ្ទះគ្មានលេខ ផ្លូវបេតុង ភូមិខ្វា សង្កាត់ដង្កោ ខណ្ឌដង្កោ ដែលជនរងគ្រោះឈ្មោះ វ៉ា ស្រីនិច ភេទស្រី អាយុប្រហែល ៣០ឆ្នាំ មុខរបរកម្មការិនីរោងចក្រ ត្រូវបានប្អូនថ្លៃចូលទៅកាប់នៅក្នុងបន្ទប់បណ្តាលឲ្យស្លាប់ បន្សល់ទុកឲ្យកូននៅកំព្រា។
ភ្លាមនោះ ស្នងការនគរបាលរាជធានីភ្នំពេញ លោកឧត្តមសេនីយ៍ឯក ជួន ណារិន្ទ បានបញ្ជាឲ្យកម្លាំងនគរបាលជំនាញ សហការជាមួយកម្លាំងនគរបាលខណ្ឌដង្កោ តាមចាប់ជនដៃដល់ឲ្យបានជាដាច់ខាត។ ក្រោយធ្វើការស្រាវជ្រាវតាមជំនាញ កម្លាំងនគរបាលបានតាមឃាត់ខ្លួនជនដៃដល់ឈ្មោះ ចិន ចាន់ចំណាប់ អាយុ២៩ឆ្នាំ មុខរបរមិនពិតប្រាកដ ស្នាក់នៅផ្ទះកើតហេតុខាងលើ ដែលត្រូវជាប្អូនថ្លៃជនរងគ្រោះ។
បើតាមរបាយការណ៍របស់នគរបាលមូលដ្ឋាន បានឲ្យដឹងថា មុនពេលកើតហេតុជនរងគ្រោះ បានដឹកកូនស្រីចេញពីបុរីមកផ្ទះ ពេលមកដល់ផ្ទះ ជនរងគ្រោះបានឱ្យកូនទៅម្ដាយក្មេក ហើយក៏ដើរចូលទៅក្នុងបន្ទប់របស់ខ្លួនជាន់ទី១។ ភ្លាមនោះស្រាប់តែជនដៃដល់ដែលត្រូវជាប្អូនថ្លៃ ដែលកំពុងតែនៅក្នុងផ្ទះ បានកាន់កាំបិតប៉័ងតោចូលទៅក្នុងបន្ទប់របស់ជនរងគ្រោះ ហើយបិទទ្វារ និងបានធ្វើសកម្មភាពកាប់ជនរងគ្រោះបណ្ដាលឱ្យស្លាប់នៅកន្លែងកើតហេតុតែម្ដង។ ក្រោយមកជននេះក៏បានរត់គេចខ្លួនបាត់ ទៅពួនសម្ងំនៅលេីផ្ទះប្រជាពលរដ្ឋ នៅជិតផ្ទះកេីតហេតុ ត្រូវបានប្រជាពលរដ្ឋលឺសូរសំលេងដូចមនុស្សដេីរលេីដំបូង ទេីបរាយការណ៍ប្រាប់សមត្ថកិច្ចនគរបាលខណ្ឌដង្កោ ដឹកនាំដោយលោកវរសេនីយ៍ទោ ជាង ហុកសែ អធិការរងខណ្ឌដង្កោ ឡោមព័ទ្ធរុករករហូតឃាត់បានជនសង្ស័យនោះ រួចនាំមកកាន់អធិការដ្ឋាននគរបាលខណ្ឌដង្កោ ដេីម្បីចាត់ការតាមនិតីវិធី។
តាមការបំភ្លឺពីម្ដាយបង្កើតរបស់ជនដៃដល់បានឲ្យដឹងថា ជននេះបានធ្លាប់យកទៅដាក់មណ្ឌលបន្សាបគ្រឿងញៀន៣ដងរួចមកហើយ។ បច្ចុប្បន្នជនដៃដល់ត្រូវបានឃាត់ខ្លួន ដើម្បីចាត់ការបន្តតាមច្បាប់៕
